Rafræn trúfélagsleiðrétting

Við viljum benda lesendum og öðrum áhugasömum á það að Þjóðskrá hefur boðið uppá þann möguleika að leiðrétta trúfélagsskráninguna sína rafrænt, eða einsog segir á heimasíðunni:

Þrjár leiðir eru til að skila eyðublaðinu:

1.Netskil (sjá upplýsingar um rafræn skjalaskil á Island.is). Þessi eyðublöð eru merkt með tákninu. Vistið skjalið á tölvunni og smellið hér til að skila. Undirritun er óþörf, en í stað hennar þarf viðkomandi að auðkenna sig með rafrænu skilríki á debetkorti eða veflykli Ríkisskattstjóra.
2. Bréfapóstur. Prentið út eyðublaðið, undirritið og sendið í pósti á Þjóðskrá Íslands, Borgartúni 21, 105 Reykjavík
3. Bréfasími. Prentið út eyðublaðið, undirritið og sendið í bréfasíma 569 2949.

Þetta ætti að auðvelda málin töluvert fyrir fólk sem hefur annars ekki gefið sér tíma til þess að uppfæra skráninguna (ef þörf er á) og þannig gera trúfélagsskráningu á Íslandi margfalt nákvæmari en hún hefur verið til þessa.

Prestafélag Íslands fundar

Í dag fundar Prestafélag Íslands og því er ekki úr vegi að minna á að í febrúar ræddu þeir á sama vettvangi "að laun biskups Íslands séu óeðlilega lág miðað við stöðu hans meðal embættismanna þjóðarinnar og miðað við vægi embættis hans". #

Lesa Prestafélag Íslands fundar

Blóðsugur

Nú er verið að skera niður út um allt samfélag, í heilbrigðisgeiranum jafnt sem öðrum þjóðþrifapóstum. Ríkiskirkjan segir nei og vill ekki taka á sig byrðar sínar. Frekja ríkiskirkjunnar á þrengingartímum er yfirgengileg.

Og á hvaða forsendum telur kirkjan að sér sé stætt á því að víkja sér undan ábyrgð? Jú, aukakirkjuþingið segir velferð samfélagsins vera í húfi, að safnaðarstarf kirknanna sé svo samfélagslega mikilvægt.

Við í Vantrú mótmælum þessu harkalega og höldum því fram að þótt skorið yrði niður um 100% hjá kirkjunni myndi samfélaginu ekki stafa nokkur ógn af. Það mikilvægasta sem kirkjan innir af hendi eru brúðkaup og jarðarfarir í krafti hefðarinnar og fyrir þær athafnir þurfa kúnnarnir hvort eð er að borga úr eigin vasa fá prestarnir greitt aukalega. Það hvort messað er í hverjum hól alla sunnudaga er aukaatriði, enda sést það á mætingunni.

Lesa Blóðsugur

Að gefnu tilefni

Vegna frétta af skuldastöðu sókna ríkiskirkjunnar vill Vantrú koma því á framfæri að félagið skuldar ekki krónu og hefur engin lán tekið, hvorki gengislán né verðtryggð. Félagið hefur ekki eytt milljörðum í að byggja of stórar byggingar, hundruðum milljóna í að kaupa gríðarlega stór orgel, tugmilljónum í hurð eða hundruðum þúsunda í rauðvínsglas. Vantrú óskar ekki eftir því að gjöld ríkis til félagsins hækki, enda eru þau engin. Vantrú mun hér eftir sem hingað til sjá um sín fjármál án aðstoðar ríkisins.

Heildarskuldir sóknanna virðast slaga uppí milljarð ef ekki meira, sem er athyglisvert í því ljósi að ríkiskirkjan hefur verið ansi dugleg undanfarið við að telja fólki trú um að ástæða allra fjárhagslegra hörmunga sé skortur á kristilegum hugsunarhætti. Ekki verður annað séð en ríkiskirkjan sé umvafin ljósi krists svo það hlýtur að vera guðfræðilega óskiljanlegt fyrir helstu guðviðskiptasiðfræðinga hvernig þessi stofnun komst í hann krappan.

Lesa Að gefnu tilefni

Heimsókn James Randi

Vonandi fór það ekki fram hjá neinum að sjónhverfinga- og efasemdamaðurinn James Randi sótti okkur Íslendinga heim og hélt fyrirlestur á vegum Vantrúar og Siðmenntar í Háskóla Íslands 24. júní sl.

Tilefni komu hans var að í þætti sem hægt er að finna á Youtube sagðist hann gjarnan vilja fara til Íslands áður en ævin væri öll. Við í Vantrú tókum hann á orðinu og buðum honum hingað sem hann og þáði ef okkur tækist að greiða kostnaðinn. Á móti bauðst hann til að halda hér fyrirlestur endurgjaldslaust. Þar sem Vantrú fær enga milljarða úr ríkissjóði, líkt og ríkiskirkjan, ákváðum við að leita eftir samstarfi við Siðmennt til að minnka áhættuna á stórtapi af þessu fyrirtæki.

Lesa Heimsókn James Randi

James Randi í kvöld

Við minnum á að fyrirlestur James Randi er í kvöld.

• Staður: Háskólatorg, salur 105
• Tími: 20-21
• Aðgangseyrir: Eitt þúsund krónur greiðist við inngang. Ekki er tekið við greiðslukortum en hraðbanki er á svæðinu.

Daniel C. Dennet: A Human Mind as an Upside-down Brain

Bandaríski heimspekingurinn Daniel C. Dennet heldur fyrirlestur í Háskólanum í Reykjavík, mánudaginn 21. júní kl. 16:00, sem ber yfirskriftina, “A human mind as an Upside-down brain“

Dennett er með þekktari fyrirlesurum samtímans og mikilvirkur fræðimaður á sviði heimspeki hugans, vísindaheimspeki og hugrænna vísinda (e. philosophy of mind, philosophy of science, cognitive science). Dennett hefur einnig fjallað mikið um þróunarkenningu og trúmál.

Nánari upplýsingar um Dennett má finna á:
Heimasíðu Dennetts
Fyrirlestrar Dennetts á TED.com
Wikipedia um Dennett

Fyrirlesturinn verður haldinn húsnæði Háskólans í Reykjavík í Nauthólsvík, Bellatrix (stofu M1.01).

Lesa Daniel C. Dennet: A Human Mind as an Upside-down Brain

Mótmæli við Hallgrímskirkju í sumar

Í kjölfarið á mótmælunum fyrir framan Hallgrímskirkju laugardaginn 5. júní sl., hafa einstaklingarnir sem stóðu að þeirri samkomu efnt til mótmæla í allt sumar fyrir framan Hallgríms- og Akureyrarkirkju - og eflaust bara fyrir framan allar kirkjur á landinu. Fólk er hvatt til þess að mæta - eða jafnvel mynda sín eigin mótmæli við sínar "sóknarkirkju" - og krefjast aðskilnaðar ríkis og kirkju.

Lesa Mótmæli við Hallgrímskirkju í sumar

Efast á kránni 1. júní - Pöbbkviss

[Facebook] [Heimasíða]

Það verður pöbbkviss á næsta EÁK með kvissmaster Óla Gneista (þjóðfræðing og fyrrverandi formann Vantrúar).

Við ætlum að hittast á Thorvaldsen, 1. júni kl 20:00. Komið og sannið yfirburðar þekkingu ykkar. Verðlaun verða í boði!

Sumarfrí

Vefrit Vantrúar fer nú í hálfgert sumarfrí fram að miðjum ágúst. En það þýðir einfaldlega að greinarskrif og -birtingar verða ansi stopular einsog verið hefur í maí. Að sjálfsögðu munu birtast einhverjar greinar og tilkynningar um tilfallandi efni út sumarið og svo er aldrei að vita nema einhver niðurstaða náist núna í sumar varðandi athugasemdir okkar til siðanefndar Háskóla Íslands um tiltekið kennsluefni eins stundarskennara á guðfræði- og trúarbragðafræðideild HÍ, þannig að vefritið gæti tekið óvæntan kipp til skamms tíma.

En ef ykkur leiðist alveg agalega, þarfnist smá upplýsingar, eruð að skrifa ritgerð, kennsluefni og/eða annað slíkt, eða bara að ykkur vantar smá vantrúarfix getiði rennt í gegnum greinar (og annað) alveg frá upphafi ágúst 2003 og fram til dagsins í dag.

Svo er auðvitað töframaðurinn James Randi væntanlegur til landsins.

Annars óskum við lesendum gleðilegs sumars og að þið hafið það sem allra best