Lög Vantrúar

1. Félagið heitir Vantrú. Heimili þess og varnarþing er í Reykjavík.
2. Tilgangur félagsins er að veita mótvægi við boðun hindurvitna og vinna gegn áhrifum þeirra í samfélaginu, s.s. skipulögðum trúarbrögðum, skottulækningum og gervivísindum.
3. Tilganginum hyggst félagið m.a. ná með því að stuðla að gagnrýninni umræðu um trúmál og halda úti vefsíðu sem fjallar um trúmál, trúleysi og efahyggju. Félagið vinnur að tilgangi sínum með upplýsingagjöf, útgáfustarfsemi, rekstri vefsíðu, þátttöku í umræðum, ráðstefnum, fyrirlestrum, rannsóknum og greinaskrifum..
4. Félagið er opið trúleysingjum og þeim sem hafna yfirnáttúru, samþykki þeir að vinna að markmiðum félagsins, hlíta lögum þess og séu orðnir fullra 18 ára. Ritari tekur við umsóknum og ber þær undir stjórn. Stjórnin ákveður svo, að höfðu samráði við aðra félagsmenn ef þörf krefur, hvort umsækjandi er samþykktur inn í félagið.
5. Á aðalfundi er kosið í stjórn félagsins sem skipuð er fimm félagsmönnum: Formaður, varaformaður, ritari, gjaldkeri og ritstjóri. Formaður og stjórnarmenn eru kosnir til árs í senn. Nú hefur formaður setið í fjögur ár samfleytt og skal hann þá ekki gefa kost á sér til embættisins næstu tvö ár hið minnsta. Firmaritun félagsins er í höndum stjórnar. Stjórnin fundar eins oft og hún sér ástæðu til, þó ekki sjaldnar en ársfjórðungslega. Geti stjórnarmeðlimur ekki sinnt hlutverki sínu til lengri tíma skal boða til aukaaðalfundar þar sem nýr stjórnarmaður er kosinn. Stjórnarmeðlimir skulu aðstoða hver annan eftir bestu getu en hafa þó hver sitt hlutverk:
   a) Formaður er stýrir starfi félagsins og reynir að ná samhljóm meðal félagsmanna um stefnuna. Hann er einnig aðaltalsmaður félagsins út á við.
   b) Varaformaður sinnir hlutverkum formanns í forföllum hans og er honum og öðrum stjórnarmeðlimum einnig til aðstoðar eftir þörfum.
   c) Ritari sér um félagaskráningu og ber ábyrgð á því að lög félagsins séu rétt uppfærð á vefsíðu félagsins.
   d) Gjaldkeri sér um fjármál félagsins.
   e) Ritstjóri er aðalumsjónarmaður vefritsins Vantrúar og skipar einnig í ritstjórn þess.
6. Reikningsár félagsins er almanaksárið. Stjórnin ber ábyrgð á starfsemi félagsins milli aðalfunda. Stjórnarfundur er löglegur ef hann situr meirihluti stjórnarmanna. Meirihluti stjórnar getur skuldbundið félagið fjárhagslega á grundvelli bókaðra samþykkta á stjórnarfundi. Meiriháttar fjárfestingar skulu þó bornar undir aðalfund eða almennan félagsfund.
7. Aðalfundur fer með æðsta vald í málefnum félagsins. Til hans skal boðað með minnst 7 daga fyrirvara. Á aðalfundi hefur hver félagsmaður 1 atkvæði. Aðalfundur er löglegur ef löglega er til hans boðað. Hann skal haldinn í janúarmánuði ár hvert. Á dagskrá aðalfundar skal vera:
   1. Kosning fundarstjóra og skoðunarmanns reikninga.
   2. Skýrsla stjórnar um starf félagsins á liðnu ári.
   3. Endurskoðaðir reikningar félagsins lagðir fram til afgreiðslu.
   4. Lagabreytingar.
   5. Stjórnarkjör.
   6. Félagsgjöld næsta ár ákveðin.
   7. Önnur mál.
   Aukaaðalfund skal boða svo fljótt sem unnt er, ef formaður, meirihluti stjórnar eða a.m.k. fimmtungur félagsmanna æskir þess og leggur fram tillögu að dagskrá.
8. 8. Rekstrarafgangi/hagnaði af starfsemi félagsins ráðstafar stjórn þess með tilliti til markmiða þess, sbr. 2. og 3. gr.
9. Þessum lögum má breyta á aðalfundi með samþykki einfalds meirihluta. Komi fram tillaga um að slíta félaginu skal farið með hana eins og lagabreytingartillögu. Þó fæst hún eigi afgreidd nema a.m.k. fjórðungur félagsmanna mæti til aðalfundar og 2/3 samþykki hana. Ef ekki næst tilskilin fundarsókn skal boða til framhaldsaðalfundar um tillöguna innan mánaðar. Sá fundur getur afgreitt tillöguna án tillits til fjölda fundarmanna. Verði félagið lagt niður skal á sama fundi ráðstafa eignum þess í samræmi við tilgang félagsins.