Félagið Vantrú harmar þá stefnu ríkisstjórnarinnar að viðhalda mismunun fólks eftir trúarviðhorfum.
Samkvæmt nýsamþykktu frumvarpi ríkisstjórnarinnar á að hætta þeirri yfirborðsmennsku sem viðgengist hefur að svokölluð sóknargjöld þeirra sem ekki tilheyra neinu trúfélagi renni til Háskóla Íslands. Hugsanlega mætti fagna þeirri ákvörðun ef þetta þýddi í raun að mismununin væri felld niður. Svo er ekki.
Ríkisstjórnin hefur með þessu gjörningi ákveðið að ganga áfram gegn anda 64. grein stjórnarskrárinnar sem kveður á um að enginn sé skyldur til að inna af hendi persónuleg gjöld til trúfélags sem hann á ekki aðild að. Hugsanlega getum við þakkað fyrir það að nú er misréttið grímulaust. Við erum hér neydd til að niðurgreiða starfsemi trúfélaga (eða öllu heldur ríkiskirkjunnar sem fær hlutfallslega miklu hærri greiðslur frá hinu opinbera en önnur trúfélög).
Enginn ætti að þurfa að styrkja starfssemi trúfélags sem hann á ekki aðild að. Við sem stöndum utan trúfélaga og þeir sem tilheyra trúfélagi sem ekki nýtur viðurkenningar ættum að fá ígildi sóknargjalda endurgreidd í ágúst á hverju ári þar til að þetta kerfi verður endanlega lagt af. Ríkið ætti einfaldlega ekki að innheimta félagsgjöld fyrir trúfélög eða niðurgreiða starfssemi þeirra á nokkurn hátt.
Ef þetta misrétti verður ekki leiðrétt, ef þessum brotum á grundvallarmannréttindum verður ekki hætt er ekki annar kostur í stöðunni en að höfða mál gegn íslenska ríkinu til að fá réttarstöðu okkar tryggða.
Ríkisstjórnin ætti að minnsta kosti að sjá sóma sinn í því að veita lífsskoðunarfélögum sömu réttarstöðu og trúfélög njóta eins og bæði Vinstri græn og Samfylking hafa þó ályktað um á sínum flokksþingum. Þetta misrétti ætti að leiðrétta núna en ekki seinna.
Því ber þó að fagna að óvissu um stöðu Háskóla Íslands í kjölfar væntanlegs aðskilnaðar ríkis og kirkju hefur verið eytt og mun það án efa koma fyrir andvökunætur rektors í framtíðinni.
Um leið er rétt að benda á að í dag er staðan þannig að fólk á ákaflega erfitt með að leiðrétta trúfélagsskráningu sína og tryggja að hún sé rétt. Vantrú leggur til að á meðan þetta óréttláta skipulag er við líði verði fólki gert auðveldara að breyta trúfélagsskráningu sinni. Eðlilegast væri að þessar upplýsingar væru að finna í skattframtali einstaklinga enda er hér í raun verið að gefa fólki kost á að ákvarða hvernig skattpeningum þess er varið. Þetta verk er sérstaklega knýjandi þar sem kannanir benda til þess að mikið misræmi sé milli trúarskoðana Íslendinga og trúfélagsaðildar þeirra.
Hann hverfur bara í hinn almenna ríkiskassa. Ég hef áður fært rök fyrir því að svokölluð "sóknargjöld" séu alls ekki "félagsgjöld" sem innheimt séu af félagsmönnum trúfélaga heldur séu þau einfaldlega hreinn og klár ríkisstyrkur til trúfélaganna. Þessi nýjasta lagabreyting sýnir að stjórnvöld eru í raun sammála því. Í raun fagna ég þessari breytingu að vissu leyti vegna þess að með henni verður fáránleiki "sóknargjaldanna" ennþá skýrari, það rennir vonandi stoðum undir það að þessum ríkisstyrkjum verði hætt í fyllingu tímans.
Mér finnst engin lausn ásættanleg önnur en að ríkið hætti alfarið að styrkja trúfélög með svokölluðum sóknargjöldum. Mér finnst það t.d. ekki vera nein lausn að félag eins og Siðmennt fái sömu stöðu og trúfélög og þannig hlut í sóknargjaldadellunni. Það hefði þann eina tilgang að sefa gagnrýnisraddir og réttlæta tilvist kerfisins.
Þetta er svipað og þeir sem hefðu hvorki áskrift að Mogganum né DV þyrftu samt að greiða "blaðagjald" til ríkisins. Menn þurfa jú að aðhyllast einhver blöð, er það ekki?
Vantrú og fleiri félög eiga að láta reyna á það fyrir dómi hvort að þetta sé löglegt. Annars breytist ekki neitt.
Eru Vantrúar-menn eitthvað að velta fyrir sér að höfða mál vegna þessa?
Það er mjög ólíklegt að Vantrú fari nokkuð í mál. Aftur á móti vitum við að það eru dómsmál í undirbúningi vegna þess misréttis sem viðgengst hér á landi.
nú þegar hefur á það reynt fyrir dómstólum hvort það brjóti gegn 62. gr (trúfrelsis ákvæði) stjórnarskránnar túlkuð með hliðsjón af 65. gr sts (jafnræðisreglan) að ríkiskirkjan fái fjármagn umfram önnur trúfélög. Var það fyrirkomulag talið standast vegna sérstaks eðlis þjóðkirkjunnar og þess lögbundna hlutverks sem hún gegnir. Var talið að þjóðkrikjan væri ekki samkynja eða eðlislík öðrum trúfélögum og því ekki sambærileg og jafnræði væri þar af leiðandi ekki stefnt í hættu, mismununin byggð á málefnalegum grundvelli. sbr Hrd. 25. okt 2007 mál nr 109/2007 (Ásatrúarfélagið)
Get ekki sagt að ég sé sammála þessum dómi, ber vott forneskjulegan hugsunarhátt.
Eftir því sem ég best veit ætlaði Ásatrúarfélagið lengra með þetta mál. Ég veit þó ekki hvernig staðan er á því.
Svo vil ég benda á ítalska otto per mille kerfið til samanburðar. Ég held að það sé dálítið betra en það sem við búum við.
Hefur einhver einstaklingur sem stendur utan trúfélaga kært þetta fyrirkomulag á sóknargjöldunum t.d. til umboðsmanns Alþingis? Ég spyr sem einstaklingur utan trúfélaga.
Var sæmilega sátt við það að þetta gjald rynni til Háskóla Íslands, en ef þetta á bara að vera einhver aukaskattur á mig sem rennur almennt til ríkisins, skattur sem aðrir (fólk í trúfélögum) geta ráðstafað til síns hugðarefnis, þá get ég ekki annað séð en að þetta sé enn klárara mannréttindabrot en áður.
Ég gæti alveg hugsað mér að fá að velja að láta mitt gjald renna t.d. til Siðmenntar, Amnesty International eða barna í Jemen, eða hreinlega að borga lægri skatt fyrst að ég er ekki í trúfélagi. En að ég þurfi að borga meira í ríkiskassann en aðrir, af því að ég er ekki trúuð, getur ekki verið annað en mismunun vegna trúarbragða.
Hreint og beint hneyksli - um leið og eitthvað mál kemst á stað mun ég (aldrei þessu vant) mæta með pott og sleif. Ef hægt er að fá tilvísun í pappírsvinnuna á stafrænu formi (ef slíkt er til) væri gott að fá tengil til að breyta Wikipedíu síðunni:
http://en.wikipedia.org/wiki/Religion_in_Iceland#Non-religion_or_secularism
Lokað hefur verið fyrir athugasemdir við þessa færslu. Við bendum á spjallið ef þið viljið halda umræðum áfram.
Hjörtur Haraldsson - 01/07/09 10:25 #
Þannig að peningurinn sem ég borga (er utan trúfélaga) fer hvert? Verður honum dreift á trúfélögin eða til ríkiskirkjunnar?