TRÚFÉLAGSLEIÐRÉTTING

Biskup íslands er sauður. Þetta er ekki sagt honum til lasts. Heldur er þetta hans eigin sjálfsmynd, sem hann gengst fúslega við í Jésú nafni. Sauðir eru hins vegar ekki greindar skepnur. En að jafnaði hóglyndar, oftast styggar nokkuð og er gjarnt að fylgja hjörðinni hvert sem henni kann að vera smalað.

Eins og hundur, sem snýr aftur til spýju sinnar, svo er heimskingi, sem endurtekur fíflsku sína. [Ok. 26:11]

Þessi tilvitnun í Orðskviðina virtist vera í sérstöku uppáhaldi hjá Sigurbirni Einarssyni biskupi, föður Karls Sigurbjörnssonar biskups sem tók við af Ólafi Skúlasyni biskupi, fyrsta æskulýðsfulltrúa Þjóðkirkjunnar, barnaníðingi og kynferðisbrotamanni.

Maður verður að passa sig á sölumönnum, því að oft verður sannleikurinn fórnarlamb í viðleitni þeirra við að selja vöruna sína. Prestar eru sölumenn, þeir selja kristni. Þegar þeir fjalla um kristni þá er söluvaran þeirra svo frábær að ætla mætti að allt frá regnboganum til almenningssundlauga sé kristni að þakka.

Karl Sigurbjörnsson biskup og séra Hjálmar Jónsson hafa nú báðir lýst því yfir að þeir hafi ekki reynt að þagga niður í Sigrúnu Pálínu árið 1996 þegar þeir funduðu með henni eftir að hún reyndi að benda kirkjunni á glæpi Ólafs Skúlasonar biskups.