Allar færslur Allir flokkar Sos Um félagið Úrskráning Lógó Spjallid@Vantru Póstfang Vantru@Facebook Vantru@Youtube Vantru@Twitter

Mannréttindagúlagið Reykjavík

Forystusauðir

Biskup íslands er sauður. Þetta er ekki sagt honum til lasts. Heldur er þetta hans eigin sjálfsmynd, sem hann gengst fúslega við í Jésú nafni. Sauðir eru hins vegar ekki greindar skepnur. En að jafnaði hóglyndar, oftast styggar nokkuð og er gjarnt að fylgja hjörðinni hvert sem henni kann að vera smalað.

Okkar eigin Ovis

Fyrir hjörðinni fer jafnan forystusauður og má líklegt telja að biskup fari á svipaðan hátt fyrir sauðahjörð klerka sinna og íslenskt forystusauðakyn af ættkvíslinni Ovis fer fyrir sinni mislitu hjörð.

Til eru margar sögur af þolgæði, greind og trygglyndi íslenska forystusauðakynsins og telja margir það hafa mannsvit. Slíku verður þó seint haldið fram um biskup, þ.e. að hann hafi mannsvit – hann er aðeins sauður, sem hefur verið vanaður með guðsorði. Eins og títt er um fólk af hans sauðahúsi er ímyndaði vinur hans honum allt. Satt eða logið, rétt eða rangt skiptir hann engu máli í ofstækisfullri þjónkun við almættið.

Þann 27. nóvember síðastliðinn fór hann mikinn í heilagri vandlætingu gegn sjálfsagðri mannréttindabót mannréttindaráðs Reykjavíkur til að hindra trúboð ríkiskirkjunnar í skólum borgarinnar. Ekki einasta fór hann rangt með staðreyndir heldur laug hann blygðunarlaust úr predikunnarstólnum. Hann beit svo algerlega höfuðið af skömminni með þessum ummælum um reglur mannréttindaráðs:

Tilburðir yfirvalda í Reykjavík minna óhugnanlega á Sovétið sáluga.

Mannréttindaráð Reykjavíkur og morðvargurinn Stalín, kúgun, ofbeldi og sturlun Sovétkommúnismans er m.ö.o. keimlíkt. Þessi orð biskups dæma sig ekki sjálf heldur dæma þau hann úr leik í allri umræðu.

Helvítis kommúnasistar!

Sagt var um einn forvera hans á biskupsstóli að sá gæti afkristnað heilt sólkerfi og yrði ekki lengi að því. Núverandi biskup er ekki jafnoki hans, en hefur þó unnið ötullega að því að afkristna Íslendinga á sinni biskupstíð. Það eru ekki síst ummæli á borð við þessi, sem hafa fækkað sauðunum í hjörð biskups. Biskup á raunar ekki langt að sækja samlíkinguna og orðfærið.

Faðir hans og forveri á biskupsstóli líkti á sínum tíma mótmælum gegn kristnihátíð við:

... það allra versta sem verstu nasistar og kommúnistar höfðu fram að færa á sínum tíma.#

Þetta sauðakyn er greinilega ekki þær hæglætisskepnur sem hafðar hafa verið í hávegum í sveitum lands um aldir. Það er við hæfi að þau óþverralegu ummæli núverandi biskups verði öllum hvatning að spyrna fæti við því ofstæki og mannhatri sem forystusauðir ríkiskirkjunnar útdeila í orði og á borði eins og hverju öðru sakramenti.

Guðmundur Guðmundsson 02.12.2011
Flokkað undir: ( Kristindómurinn , Íslenskir biskupar )

Viðbrögð


frelsarinn (meðlimur í Vantrú) - 03/12/11 12:47 #

Góð grein Guðmundur. Orðbragð sumra presta og biskupa eru oft ljótari orð fá lýst gagnvart gagnrýni og gagnrýnendum. Sömu menn gera sér svo upp óendanlega viðkvæmni og fjölmiðlagrát ef einhver vogar sér að benda á hátterni þeirra. Tala nú ekki um þá sem hafa gert sér að leik og snúið orðaforða biskupa/presta upp á þá sjálfa. Slík gagnrýni flokkast yfirleitt undir einelti, ofbeldi og níðingshátt, þ.e.a.s. ef þeir heyra sömu orð sögð um sjálfan sig sem þeir hafa haft um aðra.


Jón Steinar - 03/12/11 15:30 #

Hafið þið lesið "exposé" Barkar Gunnarssonar í lesbók morgunblaðsins í dag? Skítmoksturinn heldur áfram.


Jón Steinar - 03/12/11 15:34 #

Vantaði tengilinn í síðasta komment: http://helgi-ingolfsson.blog.is/blog/helgi-ingolfsson/entry/1209037/


Matti (meðlimur í Vantrú) - 03/12/11 15:50 #

Já, það má svo sannarlega segja að skítmoksturinn haldi áfram.

Annars kemur ekkert nýtt fram í grein Barkar, þessu hefur öllu verið svarað.

Lokað hefur verið fyrir athugasemdir við þessa færslu. Við bendum á spjallið ef þið viljið halda umræðum áfram.