Í Kastljósþætti Ríkissjónvarpssins í gærkvöldi var fjallað um skottulækningar á afskaplega óvandaðan máta. Rætt var við Margeir Sigurðsson, kennara í Bowen tækni og meðferðaraðila. Hann tjáði sig með illskiljanlegum frösum í Kastljósinu og eftir það var rætt við ánægða sjúklinga (í þessu tilviki foreldra ungra barna). Engin tilraun var gerð til að skoða málið ofan í kjölinn, til dæmis með því að ræða við sérfræðinga í barnalækningum. Margeir virðist, samkvæmt umfjöllun Kastljóss, meðal annars lækna ungbarnakveisu með því að pota laust í börnin.
Mér finnst alltaf dálítið óhugnalegt þegar skottulæknar gera út á ungabörn en sumu fólki finnst þetta eflaust bara sætt.
Eins og ég sagði mælti Margeir í frösum, skoðum gullkornin. Svona lýsir Margeir meðferðinni:
Bowen tækni eru léttar rúllandi hreyfingar þvert á vöðva og sinar, ólíkt öllum öðrum meðferðum sem til eru og þetta er gert þannig að maður kemur og gerir þessar léttu hreyfingar og fer svo fram, skilur fólkið eftir til að leyfa líkamanum að vinna úr þeirri truflun sem verður milli boðskipta heila og líkama við þessar hreyfingar
Margeir segir að með því að pota létt á vissa staði örvi hann taugaflæði, blóðflæði og orkuflæði líkamans til þess að leiðrétta og laga það sem er að. Jahá, þetta hljómar aldeilis sennilega. Með því að pikka létt hér og þar á líkamann fer barasta allt á fullt og líkaminn byrjar að lækna sig sjálfur. Margeir er samt nógu heiðarlegur til að taka sérstaklega fram að þau lækni engann. Hversu margar af þessum óhefðbundnu meðferðum eiga ekki að virka á "orkuflæði líkamans". Þessi úrelta hugmynd um orkuflæði eða qi er grundvöllur gamalla kínverskra lækningaaðferða en á bak við hana er enginn fræðilegur grunnur. Orka flæðir ekki milli orkustöðva í líkamanum!
Hvernig var þessi aðferð eiginlega fundin upp? Er þetta afrakstur rannsókna, liggur mikil vinna á bak við - hafa fræðimenn um allan heim unnið ötullega að grunni þessara tækni? Ónei.
Bowen á rætur sínar að rekja til Ástralíu, en kom til evrópu fyrir um tíu árum. Tom Bowen er upphafsmaður þess eins og nafnið gefur til kynna. “Hann getur ekki með neinum hætti útskýrt hvernig hann skapaði aðferðina,” segir Margeir og bætir við að “Tom hafi verið mikil íþróttaáhugamaður og oftar en ekki horft á menn detta og slasast og borna útaf. Einnig vann hann í steypueiningarverksmiðju þar sem mikið var um eymsli og vanlíðan.. Hann byrjaði allt í einu eitthvað að pota og pikka í vinnufélagana sem fundu mun á sér.” Tom hætti í skóla 14 ára og fór að vinna til að leggja hönd á plóg heima fyrir og hefur því enga menntun í átt að þeim aðferðum sem hann hefur tamið sér til að hjálpa öðrum. Eini rökstuðningur hans er að þetta sé Guðs gjöf. #
Staðreyndin er að Bowen tæknin sem fjallað var um í Kastljós er kjaftæði.
Skoðum fleiri gullkorn:
"við meðhöndlum enga sjúkdóma, við meðhöndlum fólk með sjúkdóma"
Margeir er búinn að greina ungbarnakveisuna og segir að yfirleitt alltaf sé rót hennar sú sama. Ekki kemur mjög vel fram hver rótin sé, önnur en truflanir á orkuflæðinu eða eitthvað álíka gáfulegt. Síðar lýsir Margeir aðferðinni svona:
"ég segi alltaf að einfaldleikinn í meðferðinni er það góða við hana og hún virkar svolítið mikið eins og hómópatía, minna er meira og þessi meðferð getur ekki gert nokkrum manni skaða. Þó eru dæmi þess að fólki hefur versnað fyrst eftir meðferð og það er yfirleitt vegna þess að meðferðaraðilinn hefur gert of mikið
Það er gott að heyra að meðferðin virkar eins og hómópatía, því smáskammtalækningar virka alls ekki. Hverju er Margeir að lýsa hér? Jú, hann er að lýsa skorti á meðferð, því minna sem er gert, því betur virkar það. Kvillarnir sem Margeir meðhöndlar eiga það sameiginlegt að fólk læknast af þeim af sjálfum sér. Sumum sjúklingum líður betur eftir að hafa hitt Margeir, öðrum líður verr. Ef þeim líður verr er Margeir kominn með pottþétta afsökun, hann ýtti bara aðeins og mikið á vöðvana, úbbs. Hann passar sig bara á því að ýta minna næst! Að sjálfsögðu er lítið merkilegt við það að sumu fólki líði betur eftir smá slökun, því meðferðin sem Margir lýsir felst í raun ekki í neinu öðru en því að fólk slakar á. Kosturinn við meðferð Margeirs er að ólíkegt er að hann valdi skaða, jafnvel þó um ungabörn sé að ræða. En tvennt skyggir á, annars vegar er hætta á að fólk leiti frekar til Margeirs en hefðbundinna lækna auk þess sem Margeir selur falska vöru. Fólk greiðir honum peninga fyrir þjónustu sem er kjaftæði. Hættan á að fólk leiti ekki annað er ekki uppdiktuð því Margeir lýsir meðferðinni á þann hátt að hún sé eins og öfundsjúkur elskhugi, virki ekki ef fólk leitar annað!
Hún var búin að vera í sjúkraþjálfun í mörg ár án teljandi árangurs. Eftir þrjá tíma í Bowen gat hún vinkað bless,” segir Margeir og bætir við að “hún hafi tekið frí frá sjúkraþjálfun því Bowen er eins og öfundsjúkur elskhugi. Sjúklingurinn megi ekki vera í öðrum líkamsmeðferðum á sama tíma.” #
Hvað er hægt að segja?
Þegar Margeir var spurður hvort þetta væru ekki óhefðbundnar lækningar svaraði hann eins og þrautþjálfaður rugludallur (sem hann er)
"...persónulega lít ég á nútíma lækningar sem óhefðbundnar, því þær eru svo ungar, hinar eru miklu eldri þannig að þær eru miklu hefðbundnari"
Það er afskaplega kvimleitt og kjánalegt þegar skottulæknar gera lítið úr hefðbundnum lækningum með því að vísa í aldur skottulækninga. Vissulega eru nútíma lækningar frekar ungar en árangurinn er stórkostlegur svo ég taki ekki stærra til orða, á hverjum degi eru framin "kraftaverk" á sjúkrastofnunum landsins, aðgerðir sem forfeður okkar hefði ekki getað dreymt um. Læknavísindin eru ekki fullkomin en þau eru í stöðugri þróun, sífellt næst meiri árangur í baráttu við sjúkdóma og stöðugt aukast lífslíkur þeirra sem lenda í slysum, þökk sé nútíma læknavísindum. Það er óþolandi að hlusta á gagnslausa skottulækna gera lítið úr nútíma læknavísindum til að upphefja kjaftæði. Hver er árangur skottulækninganna? Hver er þróunin? Hefur framþróun síðustu hundrað ára alveg farið framhjá þessu liði?
Það er skammarlegt að skottulæknar fái svona auglýsingu í sjónvarpi allra landsmanna og ókeypis í þokkabót. Við hljótum að gera þá kröfu til þessa miðils að þar sé gerð tilraun til að fjalla á ábyrgan og heiðarlegan hátt um jafn mikilvægt málefni og heilsu ungbarna. Í þættinum í gærkvöldi var verið að höfða til foreldra sem eru í afskaplega erfiðri aðstöðu því vissulega getur verið erfitt að meðhöndla ungbarnakveisu og skiljanlega eru foreldrar til í að prófa næstum hvað sem er til að lina þjáningar barna sinna, þar með talið að henda peningum í loddara eins og Margeir Sigurðsson.
Góð grein. Það er alveg magnað hvað skottulækningar og önnur hindurvitni eiga greiða leið í fjölmiðla á meðan umfjöllun um vísindi eru nánast engin. Þetta er stór alvarlegt. Það er ekki langt síðan að talað var við annan skottulæknir í Kastljósi eða NFS sem var með einhverjar olíur sem voru í beinu sambandi við einhverjar gyðjur og guði. Þetta átti auðvitað að lækna allan andsk... Og svo endaði hann innslagið á að kyrja eitthvað með aðstoðarkonu sinni. Fjölmiðlar eru að aðstoða við markaðsetningu á þessum lygum.
Svo er þjókirkjan komin með fastan þátt á NFS svo ég tali nú ekki um vikulega útsendingu frá messu í kirkjum landsinns. Síðan er það Omega!!! Þetta er ekki gott mál.
Hehe, ég kímdi við þegar ég sá þessa umfjöllun í Kastljósinu í gær og hugsaði "sjitt hvað þessi kjáni á eftir að verða rifinn í tætlur á Vantrú á morgun". :-)
Hins vegar fór ég að pæla í þessum gaur og því sem hann er að gera: nudda lítil börn sem líður afskaplega illa, með mjúkum og notalegum strokum.
Hefðbundnir læknar viðurkenna fúslega að þeir vita ekki nákvæmlega hvað veldur kveisu í börnum, og né heldur kunna þeir óbrigðult ráð við henni - sem hjálpar úttauguðum og örvæntingarfullum foreldrum ekkert sérstaklega við að halda sönsum í erfiðum aðstæðum.
Lyfleysulæknar eins og þessi Margeir gefa þessu fólki pínu von, lætur það slaka aðeins á, og svo er hann góður við barnið, nuddar það og sýnir því athygli.
Þjónustan sem hann veitir er í sjálfu sér ekkert svo galin - þótt umbúðirnar eru hins vegar tómt kjaftæði.
Eins og ég tek fram í pistlinum er ég sammála því að aðferðin er ósköp saklaus í sjálfu sér og veldur engum skaða, slökunin og athyglin getur svo haft ágæt áhrif fólk. Það getur aftur á móti verið afar alvarlegt mál þegar skottulæknar halda ranghugmyndum að fólki og ég tala nú ekki um þegar þeir ráðleggja fólki að fara ekki í hefðbundna meðferð.
Amm... það hvernig hann pressar á fólk að hætta í öðrum meðferðum er hins vegar öllu verra. Eiginlega alveg hræðilegt
Þetta með ranghugmyndirnar er hins vegar svo útbreitt í allri sölumennsku. Fjögurra ára sonur minn trúir því að hann fái kraft úr Kókómjólk, og að Svali sé hollur ávaxtasafi (ég er að vinna í að leiðrétta þetta).
Hins vegar má ekki gleyma því að lyfleysa virkar , en þá er frumforsendan sú að sjúklingurinn trúi að hún sé ekki lyfleysa. :-)
Ég verð að segja fyrir mitt leyti að ég hef ekki hugmynd um hvort að bowen sé kjaftæði eða ekki. Ætla ekki að alhæfa neitt um slíkar "skottulækningar", því ég er í engri aðstöðu til að dæma slíka meðferð sem heilagur sannleikur eða kjaftæði. Þekki bara ekki nógu mikið um sögu bowen og reynslusögur til að geta sagt til um það. En oft er líka sterkur leikur að einfaldlega prófa svona meðferð, án allra fyrirframákveðna fordóma eða álita og athuga hvað allir þessir foreldrar eru að hrósa hjá honum Margeiri.
Ég sjálf hef farið til hans þrisvar sinnum með mitt ungabarn. Ég var í raun tilbúin til að skoða allar mögulegar lausnir á magakveisuvanda sonar míns, og eftir að hafa farið til viðurkenndra "nútímalækna",sem skilaði engum árangri, þá reyndi ég bowen tæknina. Eftir fyrstu heimsókn þá urðum við ofboðslega hissa á virkninni...hvað svo sem Margeir er að gera ( en eins og þú Matti, tel ég þetta nudd hans ekki hafa skaðleg áhrif og lét til leiðast að prófa ), þá virkaði það, allavega til skamms tíma. Var svefnvana og sá litli mjög svo ergilegur og vansæll, og eftir heimsókn til Margeirs, sem var gjaldfrjáls í öll skiptin, þá hætti hann að gráta, og varð vær og glaður strákur. Um leið og við gengum út í bíl. Steinsofnaði og við áttum æðislega 2-3 daga....en svo fór það versnandi aftur.
Þannig að fyrir mína parta, þá get ég sagt af minni reynslu, að já, þetta virkar..að einhverju leyti allavega. Þetta virkaði ekki 100%, en til skammtíma þá fann ég gífurlegan mun á barninu.
Það er kannski svona auðvelt að plata mann, veit ekki...
Ég nuddar líka litla börn. Þau fá líka smáskammtur af svona jesus juice.
Er ég þá ekki svona bowen? lol
Hins vegar má ekki gleyma því að lyfleysa virkar , en þá er frumforsendan sú að sjúklingurinn trúi að hún sé ekki lyfleysa. :-)
Þetta er útbreiddur misskilningur. Mýmargar rannsóknir hafa sýnt fram á að hin svo nefndu lyfleysuáhrif eru óskhyggja. Einna erfiðast er að sýna fram á þetta þegar kemur að einkennum eins og sársauka, þar sem mat á gagni eða gagnsleysi lyfja og lyfleysa er örðugt, en þar sem hægt er að mæla niðurstöður(t.d. bata) er fátt sem styður hugmyndir um lyfleysuáhrif.
G2, hvorki er ég sérfræðingur í þessum fræðum, né heldur nenni ég að standa í hártogunum við þig um hvernig má túlka hugtakið "að virka".
Mér finnst þessi síða gefa sæmilega skynsamlega útlistun á lyfleysuáhrifunum og "deilunni" um þau: http://skepdic.com/placebo.html
Már, ég er heldur enginn sérfræðingur í lyfleysum og þessi athugasemd var alls ekki ætluð sem skot á þig eða tilefni til hártogana. Ætlunin var einungis að taka fólki vara við þeirri útbreiddu og oftast órökstuddu skoðun að lyfleysur hafi áhrif.
Bendi á grein Sigurðar Hólm um Bowen tæknina og fréttaflutning af óhefðbundnum lækningum
Það er heilmikil pæling í því hvort að það sé nokkru sinni réttlætanlegt að nota lyfleysuáhrif viljandi sem nokkurs konar friðþægingu því varanleg meðferð getur lyfleysa vart talist.
T.d. mætti hugsa sér að aldraður kvíðasjúklingur með áráttu fyrir hug-líkamlegu einkenni gæti haft af því friðþægingu að halda að hann sé að taka inn lyf sem létti á einkenninu. Þar sem ekki eru til neinar töflur með óvirkum efnum yrði að gefa t.d. verkjalyf og því gæti fylgt því hætta á aukaverkunum. Þetta væri náttúrulega bara alger gervilausn og ætti ekki mögulega við nema ekkert raunverulegt úrræði væri til. Ég tel þetta varasamt og þetta er ekki viðurkennt innan læknavísindanna. Notkun gervilausna býður uppá hugsanleg mistök og jafnvel slæma meðhöndlun. Ég get heldur ekki réttlætt notkun lyfleysu hjá græðurum því að því fylgir of mikil blekking og sóun á tíma og fé fólks. Við eigum að hafa metnað til að leita raunverulegra úræða og horfa beint framan í staðreyndir lífsins.
Fór með son minn til Margeirs að ráði vinkonu minnar. Hún sagði sitt barn hafa stórbatnað við þetta pot. Þar sem ég var alveg viss um að þetta skaðaði ekki barnið fannst mér ekkert að því að prófa. Ég hef enga trú á þeim yfirnáttúrulegu skýringum sem fylgja þessum "skottulækningum". Hins vegar er ég ekkert hissa á að nudd virki. Hann þrýsti og nuddaði vissa staði sem hann sagði að hraðaði þroska þannig að meltinginn batnaði. Því get ég bara vel trúað. Hann tók ekkert fyrir, sagðist bara vilja hjápa þessum greium að ná sér af magakveisu þar sem hann kynni það og það tæki hann enga stund. Efast um að hann sé búinn að taka upp gjald núna.
Ég held að þessi tækni sé eins og svo margt annað, aðferðir sem menn hafa rambað á og náð leikni í með tímanum. Oftar en ekki er það sannfæring sjúklingsins sem gerir í raun gæfumuninn. Sonur minn jafnaði sig af magakveisunni fljótlega.
Fram hefur komið, bæði hjá Reyni og Maríu, að Margeir tekur ekki gjald fyrir að meðhöndla ungabörn. Gott að fá það á hreint.
Ég geri ráð fyrir að Margeir taki gjald fyrir að meðhöndla aðra en ungabörn og væntanlega kostar sitt að læra "fræðin" hjá honum.
En hann fær þó smá kredit fyrir að þiggja ekki greiðslu fyrir að meðhöndla ungabörn. Betra þætti mér samt ef hann léti það alveg eiga sig!
Ég þekki ekki Bowen tækni, en þetta hljómar dálítið eins og það sé skylt nálastungum og þrýstipunktanuddi. Ég er mjög skeptísk á "heilun" og alls kyns skottulækningar en ég held að hvorki nálastungur né þrýstipunktanudd flokkist undir slíkt. Reyndar er hvorugt þeirra guðs gjöf..
Ég hef reyndar upplýsingar um hjón sem fóru til Margeirs með barn sem þjáðist af magakveisu/krampa og meðferðin skilaði engum árangri í því tilfelli. Ég efast ekki að honum gengur gott eitt til. En það breytir ekki því að ekki hefur verið sýnt fram á með (vönduðum)vísindalegum rannsóknum að Bowen tæknin virki og því eðlilegt að setja spurningarmerki við þessa meðferð.
Það er alveg rétt sem komið hefur hér fram að skýringar Bowenista á virkni verka þeirra fær ekki staðist vísindalega. En við höfum þó hér að ofan og í sjónvarpinu tilvikssögur þar sem fylgni (í tíma) virðist á milli nuddsins og breyttar hegðunar barnanna. Tilvikssögur sem þessar eru veikasta form sannana fyrir virkni meðferðar og þær má ekki hunsa alveg. Ég ætla hinsvegar að voga mér að koma með þá tilgátu að létt nudd á kvið og maga ungbarna geti losað um loft og hægðastíflur sem valda smáfólkinu sársauka, gráti og svefnleysi án þess að það komi Bowen "tækni" nokkurn skapaðan hlut við. Það að Bowenistinn nuddar kviðsvæði barns með innantökur styður þessa tilgátu. Allir sem hafa rekið verulega við eftir að hafa reynt á kviðvöðva sína rétti upp hönd!
Ragnar,Það er líka fjöldi fólks sem trúir að guð sé til. Það dugar mér samt ekki til að ég trúa því að hann sé til, einfaldlega vegna þess að það eru engar forsendur fyrir tilvist hans. Ekki frekar enn fyrir tilvist álfa og huldufólks. Vitnisburður er bara ekki nothæfur þegar á að sýna fram á eða sannreyna hluti.
Ég er hinns vegar sammála þér með nuddið og prumpið. Það er ekki ósennilegt að það sé ástæðan og sennilega hefði fólkið sjálft náð sama árangri með því að hnoðast smá með börnin heima hjá sér.
Bara að passa að hnoðast þvert á taugar, vöðva og sinar!!! :)
Arnold Alveg sammála fyrstu þremur setningunum þínum, enda gefa skrifin mín ekkert annað til kynna. Ég hefði þó reyndar átt að nota vísbendingar um sambönd breyta í stað "veikt form sannana." Með þessu var ég að benda á að það kann að vera fallsamband (functional) á milli kviðnudds og hægða- og prumps ungbarna. Margar helstu uppgötvanir vísindafólks hefðu aldrei orðið svo ef það hefði ekki fyrst tekið eftir veikum breytusamböndum þeim þótti vert að skoða nánar. Einn þekktur vísindamaður orðaði það svo: "Serendipity is a wonderful thing."
Ég velti hinsvegar fyrir mér hvað Bowenistar mundu segja ef manneskja sem ekki hefur "lært" aðferðir þeirra og er ósammála þeirra sýn á manninn fer að nudda ungbörnin og þau fara að ropa, reka við og hægðir losna ílange baner. Munu þeir telja að viðkomandi hafi notað Bowentæknina engu að síður eða er það bara á færi innvígðra? Ef þeir telja hið fyrrnefnda þá gera þeir lítið úr eigin námi og ef þeir telja hið síðarnefnda þá samþykkja þeir að aðrar skýringar (og einfaldari) eru tækar í þessu sambandi.
Það sem vegur þyngst hér, ef þetta er það sem tækning gerir (prump og hægðalosun) er að hver sem er getur gert þetta, en Bowenistar slá sér upp með því að þetta sé eitthvað voða flókið of tæknilegt (ef ekki bara yfirnáttúrlegt). Þeir selja fólki falskan raunveruleika og taka fyrir það fjármuni.
Sælir félagar. Gott að vita af ykkur á vaktinni. Bowen tæknina þekki ég ekki en eitthvað hljómar þetta samt ósannfærandi, þetta með potið og strokurnar. Sjálfur lærði ég siatsu þrístinudd á sínum tíma og það, eins og reyndar flest allt nudd sem útfært er af vandvirkni og einlægni, virkar slakandi og spennulosandi. En ansi þyrfti að teygja sig langt til að samsama það lækningu. Slökun hefur bætandi áhrif þar sem náttúrulegar varnir og viðgerðareiginleikar líkamans fá þá næði og tækifæri til að virka. En það er stórhættuleg blekking að halda því fram að hægt sé að lækna kvilla með strokum og/eða handayfirlagningum. Nú eða dansi kringum varðeld í skrautlegum búningum, kyrjandi möntrur. Snerting er góð en hún kemur ekki í stað meðferðar ef um kvilla er að ræða. Höfuðbeina og spjaldhryggjameðferð sem ég fór með son minn, eins árs gamlan í, virkaði vel. Í því tilfelli er nánast hægt að fullyrða að drengurinn, sem var svefnlaus og ómögulegur en ekkert fannst að við hefðbundna skoðun, náði sér á strik eftir eina heimsókn og var orðinn stálsleginn eftir tvær í viðbót. Hann hefur ekki kennt sér meins eftir það og þessi ónot hafa ekki truflað hann meir. En sú meðferð var í raun meðferð, mjög ákveðnar og jafnvel fastar snertingar á höfuðskel og hrygg, ekki eitthvert fálm og laust pot í vöðva og sinar. Nudd bætir, en læknar ekki, allar fullyrðingar um annað eru ekki læknisfræðilegar heldur byggðar á trú og hindurvitnum. Keep up the good work !
mér finnst þetta ekki rétt hjá mörgum ykkar, það er ekki bara verið að pota í mann eins og e-ð kjötstykki heldur er fokusað á ákv. punkt og nuddað útfrá honum. Hvort þetta virkar verður hver og einn að dæma fyrir sig (og að sjálfsögðu með því að prófa þetta annars er lítið að marka). Fyrir mér virkar þetta eins og nudd virkar. Það losar spennu, hjálpar blóðinu og súrefninu að dreifast betur um líkamann, hjálpar manni að losna við vöðvabólgu og fleira. Sé ekki neitt rangt við það.
Í athugasemd Silju er lítið nýtt en skoðum aðeins þessa algengu hugsunarvillu:
Hvort þetta virkar verður hver og einn að dæma fyrir sig (og að sjálfsögðu með því að prófa þetta annars er lítið að marka).
Nei, það er skylda þeirra sem fullyrða að þetta geri gagn að sanna það. Það er engin sönnun fyrir virkni þó hinum og þessum líði betur eftir slökunina.
Eins og fram kemur í greininni og athugasemdum hér efast enginn um að slökun geti hjálpað fólki og að mörgum líði örlítið betur í smá tíma eftir "meðferð". Það sem er athugavert er að það er verið að selja fólki kjaftæði, grunnurinn á bak Bowen byggir á fáfræði og fordómum gegn læknisfræði.
Ég þarf ekki að prófa að láta þennan gaur pota létt í vöðvana á mér til að geta fullyrt að þarna eru stundaðar skottulækningar af verstu sort.
Sæll. Ég mátti til með að deila reynslu minni því ég sé að svo margir hér eru á móti Bowen. Ég er ófrísk og var mjög illa á mig komin líkamlega. Ég þjáðist af þreytu og miklum brjóstsviða ásamt því að hafa hræðilega grindagliðnun. Ég hef farið í eina Bowen-meðferð hjá ljósmóður minni og líkaminn minn er allt annar á eftir. Brjóstsviðinn er horfinn, ég finn ekki fyrir grindagliðnun og ég hef ekki sofið svona vel á nóttunni í langan tíman. Ég er að ganga með mitt þriðja barn og veit hvað það er að ganga í gegnum erfiða meðgöngu. Ég þakka Bowen að ég get enn stundað mína vinnu og sinnt hinum börnunum mínum á lokasprettinum á meðgöngunni. Svo ég mæli með að þið prófið sjálf svona tíma áður en þið dæmið. Það þarf ekki allt að vera sannað af rannsóknum til þess að það virki vel á líkamann. Kveðja Sigga
Það þarf ekki allt að vera sannað af rannsóknum til þess að það virki vel á líkamann.
Vissulega. En það er samt heppilegra að "meðferðin" felist í einhverju öðru en að pota fingrum örlétt í líkamann (því minna, því betra).
Því miður, jafnvel þó fólk hafi jákvæðar reynslusögur, þá er Bowen tæknin kjaftæði.
Öll afbrigði skottulækninga eiga það sameiginlegt að til er safn af reynslusögum, frásagnir fólks sem hefur upplifað "lækningu" eftir glórulausa meðferð. Því miður teljast slíkir vitnisburðir yfirleitt ekki nægileg sönnun á því að meðferð virki.
Sigga,
Var einhver heima við hjá þér sem veitti þér athygli eða umhyggju með snertingu sem gerði þá ekki sama gagn og bowen-tæknin?
Hafðiru samanburð við venjulega snertingu, þ.e. "ótæknivædda"?
Persónulega þá hef ég upplifað það í barnsfæðingu hvað snerting á hárréttu augnabliki getur gert fyrir mann. Ekkert kraftaverk eða tækni þar á ferðinni, aðeins áþreifanleg og nærandi umhyggja.
Vá hvað þið eruð vangefin! Ég hef farið í svona og þetta virkar.
Það þarf ekki allt að vera "vísindalega sannað". Áður en þið farið að vera svona ógeðslega gagnrýnin og fáránleg, mæli ég með því að þið prófið þetta. Það getur enginn sagt neitt annað fyrr en hann prófar.
Silja veit nokkuð til síns máls
Kæra Alma. Bowentækni er gagnslaus. Aldei hefur verið bent á gangsemi Bowentækninnar með rannsóknum eða könnunum.
-Bara fólk sem segir "Víst virkar Bowen! Systir bestu vinkonu minnar fór til Bowentæknis..bla bla bla". Engin rannsókn bendir til að þetta þukl virki nokkurn skapaðan hlut. það er tvennt sem virkar við Bowentækni. Annarsvegar er það (eins og Kristín benti réttilega á) að hjá Bowentækni fær fólk athygli og tíma, snertingu og einhverja fullvissu um að það sé verið að "lækna" það. -Sannfæring um að allt fari vel. Þetta virkar náttúrulega í smá stund en þetta er ekki nein lækning. Ef þessi vafasama Bowentækni virkaði (og lestu nú með athygli Alma) Þá væri Bowentækni kennd í háskólum út um allan heim. -Ekki á 2 vikna námskeiði í Keflavík.
Hitt sem virkar í Bowentækni er að hún veitir Bowentækninum þægilega innivinnu og ágæta tekjumöguleika. Í fyrsta lagi getur Bowentæknirinnn tekið inn "sjúklinga" (oft börn) 10 á dag gera um 50.000 kall. Hinsvegar getur Bowntæknirinn stofnað skóla og kennt öðurm Bowentækni. Margeir bowentæknir hefur útskrifað 41 bowentækna. Kennslan er þannig uppbyggð að hver nemandi þarf að borga oft til að klára eihver "stig" í bowentækninni. Þannig er alltaf hægt að bæta við námskeiði til að drýgja tekjurnar.Reikna má með að nám í Bowentækni kosti milli 400 til 600 þúsund. Margeir hefur s.s grætt um 20 miljónir bara á Bowenskólanum sínum.
Ég hef fylgst vel með þróunuinni í þessum lækningageira og hef tekið eftir að um leið og einhverjum fer að ganga vel með "skóla", þá spretta upp aðrir sviðaðir. Ný félög eru klofna út úr þeim sem fyrir eru því margir sjá að besta leiðin til að græða í þessum bransa er að stofna skóla. Nýverði var slíkur skóli stofnaður til höfðus Margeiri og skólanum hans. -Bowentæknifélag Íslands. Hvorug þessara félaga eru í BIG. (bandalagi íslenskra græðara) sem stofnðu voru fyrir tilstuðlan yfirvalda til að hafa hemil/stjórn á óhefðbundum lækningum. Það m því segja að ekki einusinni æðsta ráð gagnslausra lækninga vill nokkuð með þetta bowen-dæmi að gera.
Mikið er einkennilegt að rekast á svona greinar á netinu. Fólk sem er tilbúið til að dæma, og það harkalega með alls kyns fullyrðingum (ekki rekist á eina einustu tilvitnun í bækur, viðurkennd vísindatímarit osfrv hjá þessum snillingum), fyrir sig og alla aðra án þess að vera tilbúið til að reyna. Maður reynir líklega ekki nema einu sinni meðferð sem virkar ekki, eða hvað?
Bullið. Eykur ekki tiltrú á Vantru.is ;o)
Undrandi, hvað hefur þú efnislega út á þennan pistil minn að setja?
Það er rétt að ég vísa ekki í bækur eða viðurkennd vísindatímarit í þessari grein - en það var ekki heldur gert í Kastljósþættinum sem ég fjalla hér um heldur komu þar fram ótal fullyrðingar sem ekki standast rýni. Það er það sem ég gagnrýni í þessum pistli. Ekki veit ég heldur um nokkra grein í viðurkenndur vísindatímariti sem styður fullyrðingar þeirra sem selja Bowen tæknina. Getur þú vísað mér á slíkar greinar?
Ég vísa í pistlinum á nokkrar vefgreinar máli mínu til stuðnings. Ef þú lest þær til enda er þar vísað á bækur og greinar í vísindatímaritum.
Nudd er nu vel thekkt fyrirbæri og hafa kinverjar beitt theirri adferd nokkur thusund ar. I hinum vestræna heimi thykkir edlilegt ad nota lyf vid øllum kvillum. Gamalt folk er kannski ad taka 10-50 tøflur a dag,folk med gedsykingu er dopad sem hefr langtima skadlegt ahrif....og oft grunar madur oedlileg samband milli læknis og lyfjafyrirtækja og væri kannski betra ad beina sjonum ad thvi misferli sem a ser stad med systemmatiskum misførum a folki med ad fylla thvi ad gagnlausm lyfjamedferdum...
Mín persónulega reynsla af Bowen tækni er hreint út sagt frábær. Ég var greind með mígreni sem barn og var mjög oft og mikið veik. Árið 2007 var svo komið að köstin komu einu sinni í viku og þá var ég ófær um að gera nokkuð og allur dagurinn fór í að kasta upp og á endanum missti ég vinnuna mína útaf veikindunum. Ég prófaði að fara í Bowen og ég fór þrisvar. Síðan þá hef ég ekki fengið eitt einasta mígreniskast og ég gæti ekki verið ánægðari! Mig langaði bara að deila þessari reynslu þar sem ég sé að margir hérna byrja á því að staðhæfa að þeir þekki ekki Bowen tæknina og hafa aldrei prófað þetta.
Lokað hefur verið fyrir athugasemdir við þessa færslu. Við bendum á spjallið ef þið viljið halda umræðum áfram.
frelsarinn@gmail.com (meðlimur í Vantrú) - 22/08/06 08:12 #
Mjög góð grein, ég var í vægu sjokki eftir Kastljós í gær.