Allar færslur Allir flokkar Sos Um félagið Úrskráning Lógó Spjallid@Vantru Póstfang Vantru@Facebook Vantru@Youtube Vantru@Twitter

Skólaprestar og skóladjáknar

Þjóðkirkjan vígði nú um helgina einn skólaprest og einn skóladjákna. Með þessu má segja að hún sé búin að fella grímuna og byrjuð að stunda blygðunarlaust trúboð innan veggja skólanna. Allt sem menn hafa áður látið sér um munn fara, að innan skólaveggjanna ætti að fara fram hlutlaus fræðsla en ekki innræting, er nú ómerkt og dautt. Kirkjan er í herferð og fórnarlömbin eru auðtrúa og saklaus börn. Sjá nánar þetta myndskeið.

Byrjunarlaun prests (án sóknarbarna = skólaprestur) er 365.010,- kr. en byrjunarlaun kennara sem er undir 30 ára er í dag 158.039,- Síðan fá flestir kennarar aukagreiðslur fyrir yfirvinnu og fleira. Athugið að skólaprestur, sem er sérþjónustuprestur, fær greidda að auki 21 einingu, sem gera 4974 * 21 eða 104.460,- Hann er því með 469.470,- á mánuði. Það mætti því ráða þrjá kennara með raunverulega menntun til að kenna krökkum fyrir hvern svona sérfræðing í Nýja-testamentisfræðum og hebresku sem ráfa mun um skólagangana og lokka saklaus börn til að trúa á staðlausa stafi.

Ritstjórn 02.10.2006
Flokkað undir: ( Vantrúarbíó , Vinaleið )

Viðbrögð


Aiwaz (meðlimur í Vantrú) - 02/10/06 09:44 #

Staða "Skólaprests Þjóðkirkjunnar" hlýtur að brjóta í bága við Grunnskólalög þar sem skýrt er kveðið á um að ekki megi mismuna nemendum eftir kyni, kynþætti eða trúarbrögðum. Er þetta ekki bara lögmannsmál?


Birgir Baldursson (meðlimur í Vantrú) - 02/10/06 10:35 #

Góður punktur.


foreldri - 02/10/06 11:06 #

Þetta brýtur í bága við grunnskólalög, siðareglur kennara og aðalnámsskrá grunnskóla. Þetta stangast líka á við meginhugmyndina um trúfrelsi í stjórnarskránni og mannréttindanefnd Sameinuðu þjóðanna hefur kveðið á um að trúarleg innræting í skólum (svo sem bænahald, ferðir í kirkjur, sálmasöngur, teiknun mynda o.s.frv.) brjóti í bága við mannréttindi. En það má auðvitað valta yfir það allt saman þegar kirkjan er annars vegar. Fari fólk inn á vef biskupsstofu sést að þar er heilt apparat (á launum skattborgara) sem rekur í raun kristnifræðikennslu í skólum, semur námsefni, kemur með ítarefni, heldur námskeið fyrir kennara og svo framvegis. Auðvitað er hér ekki um neitt annað að ræða ræða en gróflega mismunun, forréttindi eins trúfélags og algjört tillitsleysi í garð þeirra sem vilja frábiðja sér og börnum sínum hugmyndafræði bronsaldar. Tveir þriðju hlutar þjóðarinnar vilja aðskilnað ríkis og kirkju (en eru hunsaðir) og nú að bræða saman skóla og kirkju.


Sveinn - 02/10/06 14:49 #

Innan skólakerfisins á að rýkja trúlegt hlutleysi, auðvitað er eðlilegt að kenna krökkunum kristinfræði svo þau viti eithvað um sögu trúar föðurlands þeirra.

Þessir skólaprestar og djáknar eiga ekki heima í almenningsskólum og ættu að drulla sér í einkaskólana.

Ath að ég ber fulla virðingu fyrir trú fólks.


erlingur - 02/10/06 14:55 #

málið er að menntun presta er meiri en venjulegra kennara.

Það skýrir ef til vill launamuninn?

Mér finnst þetta ekkert brjáluð laun!


Jón Magnús (meðlimur í Vantrú) - 02/10/06 15:14 #

Það er mikill munur á menntun kennara og presta. Kennarar eru sérhæfðir í því að kenna börnum og unglingum staðreyndir um lífið og tilveruna.

Prestar eru sérhæfðir í því að bera á borð ósýnilegann anda sem á víst að gera allskonar kraftaverk.

En báðar þessar stéttir eru háskólamenntaðar og því enginn munur á því "level" sem þær eru menntaðar á. Því kemur 3-faldur launamunur svolítið mikið á óvart.

Það er hinsvegar algjörlega siðlaust að hafa presta starfandi innan opinbera skóla. Það er verið að gefa eitt risastórt fockmerki á þá sem hafa einhverjar aðrar lífsskoðanir en kristni.


Arnold Björnsson (meðlimur í Vantrú) - 02/10/06 15:20 #

"málið er að menntun presta er meiri en venjulegra kennara. Það skýrir ef til vill launamuninn? Mér finnst þetta ekkert brjáluð laun!"

erlingur, hvað eru venjulegir kennarar? Mér finnst þetta fáránleg athugasemd. Væri ekki réttara að launin væru tengd gansemi viðkomandi starfa? Kennarar sinna afskaplega mikilvægu starfi í þjóðfélaginu. Ég vildi frekar að kennara væru borguð 460 þúsund á mánuði fyrir að kenna barninu mínu praktíska hluti sem gagnast því í lífinu frekar en presti fyrir að uppfylla barnið af ósannindum.

Góður kennari er 460 þúsund króna virði, ekki presturinn.

Við gætum haldið áfram. Hvort starfið heldur þú að skili þjóðarbúinu meiri verðmætum? Er það ekki augljóst.


Elma - 02/10/06 16:26 #

mér finnst þetta alveg fáránlegt!!!! prestar og allt það lið á að halda sig i kirkjunum, ekki í skólunum!! hver ákvað þetta??


Kjartan - 02/10/06 16:27 #

Ég veit ekki betur en að djákn tekur mikið að sér að ræða um vanlíðan nemenda í skóla frekar en trúmál. Enda er það ekki þeirra hlutverk innan skólan að stunda trúboð heldur vera til staða fyrir þá sem eiga við vanlíðan að stríða t.d. vegna missir ættvina. Þá vakna oft upp spurningar hjá börnum sem foreldra eiga erfitt með að svara því gott að geta leitað til fagaðila. Mér skilst að djáknar tali oftast við foreldra barna sem eru í öðrum trúfélögum heldur en þjóðkirkjuni og fá samþykki þeirra áður en lengra er haldið.


Matti (meðlimur í Vantrú) - 02/10/06 16:31 #

Þá vakna oft upp spurningar hjá börnum sem foreldra eiga erfitt með að svara því gott að geta leitað til fagaðila.

Nákvæmlega. fagaðila. Djákni er ekki fagaðili, skólasálfræðingur er það aftur á móti.

Í Garðabæ er starfandi skólasálfræðingur, hverju eiga djákni og prestur að bæta við hans starf?


Alexander E. - 02/10/06 16:38 #

Skammarlegt.


Sól - 02/10/06 16:54 #

Það hefur nú aldrei farið illa með nokkurn mann að trúa á Guð. Mér finnst alveg sjálfsagt að krakkar fái kennslu um kristna trú hvort sem þau trúa eða ekki... Það er líka verið að kenna hvað er rétt og rangt ekki bara út frá trúnni heldur almennt. Prestar geta hjálpað bara rétt ens og læknar og sálfræðingar. Þeir eru til staðar og hvort sem þú ert hlutlaus eða trúir á eitthvað annað þá er ekkert rangt við það að vilja hjálpa náunganum. Oft skammast börn sín fyrir að leita til skólasálfræðings. Prestar/djáknar eru bara þarna til að ræða málin og það getur svo sannarlega hjálpað börnum/unglingum í vandræðum og/eða sálarkrísu. Þeir eru ekki þarna til að troða inn einhverjum ranghugmyndum eða neyða börn/unglinga til að trúa.. Það trúir enginn nema hann vilji það!! Fyrir minn part þá finnst mér bara að kennarar eigi að hækka í launum og fá allavega sambærileg laun og skólaprestarnir og djáknar....


Davíð - 02/10/06 16:58 #

Ég fór og tékkaði á því hvaða mann er verið að tala um og þá tel ég að þetta sé Guðni Már Harðarson og er hann ekki starfandi sem prestur hjá þjóðkirkjunni og starfar í raun ekki beint innan skólanna. Hann er starfsmaður KSH (Kristinleg skólahreyfing) sem eru félagasamtök sem öllum unglingum og háskólanemum (hreyfingin skiptist í kristinleg skólasamtök og kristinleg stúdentasamtök). Þannig hann er ekki starfandi innan skólana heldur er hann starfandi fyrir skólafólk og geta allir leitað til hans. Hann er í 50% starfi þar og í 50% starfi fyrir KFUM&K allavega síðast þegar ég vissi. Um djálknann veit ég minna og ætla því ekki að tjá mig.


Matti (meðlimur í Vantrú) - 02/10/06 17:04 #

Ég fór og tékkaði á því hvaða mann er verið að tala um og þá tel ég að þetta sé Guðni Már Harðarson

Þetta er ekki rétt. Maðurinn heitir Hans Guðberg Alfreðsson og starfar nú sem skólaprestur í Garðabæ. Jóhanna Guðrún Ólafsdóttur starfar nú sem skóladjákni í Garðabæ.


Jón Magnús (meðlimur í Vantrú) - 02/10/06 17:09 #

Það hefur nú aldrei farið illa með nokkurn mann að trúa á Guð.

Jú - mörg dæmi um það!

Mér finnst alveg sjálfsagt að krakkar fái kennslu um kristna trú hvort sem þau trúa eða ekki...

Svo að trúfrelsi þeirra sem vilja ekki kristna trú skiptir engu máli? Þú veist að trúfrelsinsákvæði stjórnarskrárinnar á að vernda fólk líka frá trú?

Prestar geta hjálpað bara rétt ens og læknar og sálfræðingar.

Að bera það saman að prestur geti hjálpað eins og læknir finnst mér alveg út í hött. Bænir virka ekki!

Prestar/djáknar eru bara þarna til að ræða málin og það getur svo sannarlega hjálpað börnum/unglingum í vandræðum og/eða sálarkrísu.

Kristum já, öðrum nei og þetta mun aldrei teljast til hlutlausra fræðslu. Að hafa fulltrúa einhverja tiltekinnar lífsskoðunar "hjálpa" börn/unglingum er alltaf rangt. Af hverju auglýsum við ekki starf Skólaklerks í þessum skólum? Þér myndi finnast það fáránlegt en það er alveg eins og okkur líður þegar ráðinn er skólaprestur.

Reyndu að setja þig í spor fólks sem hefur ekki sömu skoðanir og þú og þá loksins ferðu að sjá "ljósið".


Hjalti Rúnar Ómarsson (meðlimur í Vantrú) - 02/10/06 17:16 #

Mér finnst alveg sjálfsagt að krakkar fái kennslu um kristna trú hvort sem þau trúa eða ekki...

Það er ekki verið að mótmæla því að krakkar læri um kristna trú. Það er verið að mótmæla því að starfsmenn trúfélags séu að vinna í skólum við að kristna krakka.

Prestar/djáknar eru bara þarna til að ræða málin og það getur svo sannarlega hjálpað börnum/unglingum í vandræðum og/eða sálarkrísu. Þeir eru ekki þarna til að troða inn einhverjum ranghugmyndum eða neyða börn/unglinga til að trúa.. Það trúir enginn nema hann vilji það!!

Þetta er rangt. Eins og fram kemur í þessari grein þá er Vinaleið trúboð.


Arnold Björnsson (meðlimur í Vantrú) - 02/10/06 17:18 #

"Þeir eru ekki þarna til að troða inn einhverjum ranghugmyndum eða neyða börn/unglinga til að trúa.. Það trúir enginn nema hann vilji það!"

Þetta er bara ekki rétt hjá þér. Afhverju heldur þú að þeim sé svo mikið í mun að komast inn á leikskólana. Það er af því að börnin eru svo mótækileg. Þetta viðurkenna þeir sjálfir. Börn geta ekki tekið upplýsta ákvörðun um þessi mál. Þau trúa því sem fyrir þeim er haft.

Ég á 5 ára son sem farið var með úr leikskóla niður í kirkju þar sem honum var kennt að spenna greipar og biðja til Guðs. Við foreldrarnir vorum ekki spurð eða látin vita. Við höfum svo verið að reyna að leiðrétta þessa innrætingu en okkur til skelfingar þá er það ekki svo sjálfsagt. Hann kýs að trúa prestinum. Svo allt tal um að ekkert trúboð fari fram í leikskólum og skólum landsinns er KJAFTÆÐI.


Steindór J. Erlingsson - 02/10/06 17:57 #

Skólapresturinn og skóladjáknin starfa í skólum í Garðabæ (gardabaer.is):

Vinaleið - sálgæsla fyrir nemendur grunnskóla Vinaleið er ný þjónusta á vegum Garðasóknar við nemendur í Flataskóla, Hofsstaðaskóla og Sjálandsskóla. Vinaleið er sálgæsla og forvarnastarf sem fer fram með stuðningsviðtölum við nemendur um ýmislegt sem þeim liggur á hjarta. Nemendum mætt með trausti og vináttu Tveir starfsmenn kirkjunnar hafa fengið aðstöðu í skólunum og bjóða nemendum stuðningsviðtöl einn dag í viku í hverjum skóla. Leitast er við að mæta nemandanum með trausti og vináttu og leita þannig leiða til að komast yfir vanlíðan eða kvíða. Hvert barn getur fengið jafn mörg viðtöl og þörf er á. Þannig er t.d. hægt að veita nemendum stuðning sem hafa orðið fyrir áfalli eða sorg eins lengi og þeir þurfa á að halda. Góð samvinna er á milli starfsmanna Vinaleiðar og fagfólks í skólunum, svo sem kennara, sálfræðinga, námsráðgjafa o.fl. Nemandi, kennari eða foreldri geta sótt um viðtal Starfsmennirnir eru Hans Guðberg Alfreðsson prestur og Jóhanna Ólafsdóttir djákni. Nemendur geta sjálfir óskað eftir viðtali við þau, umsjónarkennari getur sótt um viðtal fyrir nemanda sinn og eins geta foreldrar beðið um viðtal fyrir barnið. Foreldrar geta einnig fengið stuðning vegna mála sem varða barnið, fjölskylduna, heimilið eða skólann. Tilraun í einn vetur Vinaleið var upphaflega þróuð í samvinnu við kirkju og skóla í Mosfellsbæ. Hún verður starfrækt sem tilraunaverkefni í Garðabæ þennan vetur. Garðasókn sér um verkefnið en hlutverk skólanna er að útvega starfsmönnum Vinaleiðar aðstöðu og kynna verkefnið fyrir nemendum og foreldrum.

Jana - 02/10/06 18:01 #

Ég tek undir með Arnold. Dætur mínar eru á leikskóla þar sem er mikið um börn með hin ýmsu trúarbrögð sem og menningu. Það er samt sem áður lítið tekið tillit til þeirra í starfi skólans. Það er farið með ÖLL börnin í kirkju um jólin. ÖLL börnin læra að syngja kristilega söngva í leikskólanum. Það koma auglýsinga pésar í hólfin hjá ÖLLUM börnum frá kirkju hverfisins. Í haust þegar sunnudagaskólinn var að byrja kom enn einn pésinn í hólfið hjá dætrum mínum. Síðan á leiðinni heim sungur þær enn einn kristilega sönginn og ég spurði hvenær/hvar þær hefðu lært þetta? Þá hafði komið manneskja frá kirkjunni og verið með pjúra trúboð í leikskólanum! Börnin voru hóuð saman inn í sal og þar sat þessi manneskja, kenndi þeim kristilega söngva, fræddi þau um Guð og Jesú og hvatti þau svo til að fá mömmu og pabba til að koma með þeim í sunnudagaskólann næsta sunnudag!

Í þessum sal sátu börn sem bæði voru kristin og af annarri trú þrátt fyrir að foreldrar tækju fram að þeir vildu ekki að börn þeirra yrðu látin vera með í svona trúboðun.

Fólk frá ÖLLUM trúfélögum eiga EKKERT erindi inn á leikskólana né skólana.


Arnold Björnsson (meðlimur í Vantrú) - 02/10/06 19:33 #

Rétt Jana, Í deild sonar míns er alla vega eitt barn múhameðstrúar. Ég hef velt því fyrir mér hvort tekið sé tillit til þess.

Það er merkilegt að sjá og heyra fulltrúa Þjóðkirkjuna halda því fram opinberlega að það sé ekkert trúboð í skólakerfinu á þeirra vegum. Verða svo vitni að því að það sem þeir segja er ósatt. Lygar af ásettningi. Þeim er greinilega ekki annt um trúverðugleika sinn.


Bull og kjaftæði - 03/10/06 00:38 #

Það hefur nú aldrei farið illa með nokkurn mann að trúa á Guð.

Hvaða rugl er þetta, spáið í því hvað hafa margir dáið útaf sjúkdómum síðastliðin 2000 ár, já ábyggilega nokkuð margir en samt er talið að ennþá fleiri hafa dáið útaf trúardeilum.


Lárus Viðar (meðlimur í Vantrú) - 03/10/06 14:03 #

Þetta hefur biskup Íslands að segja um málið:

Ég vil lýsa sérstakri ánægju minni yfir því áræði og djörfung sem ráðning skóladjákna og prests í Garðaprestakalli lýsir, og stuðningi skólayfirvalda og einkaaðila við að gefa kost á sálgæslu, forvarna og kærleiksþjónustu fyrir nemendur grunnskólanna samkvæmt hinni svokölluðu “vinaleið”. Öllum sem aðild eiga hér að óska ég hjartanlega til hamingju með það. Við munum fylgjast grannt með því hvernig til tekst, og bera ykkur á bænaörmum okkar. #


Jóhann Friðriksson - 04/10/06 02:59 #

Ég vil ekki lasta prestana sjálfa eða neitt af þessu fólki. Þetta er fólk að vinna vinnuna sína (þó það sé hinsvegar allt annað mál hvort maður styðji það sem þetta fólk vinnur við eða þær skoðanir sem það hefur, eða tilvist "þjóðkirkjunar" yfirhöfuð).

Það sem ég sé hér á ferð er að stjórnendur bæjarfélaga, leikskóla, grunnskóla og jafnvel landsins alls eru ekki að standa sig. Mér finnst raunar mjög "eðlilegt" að prestastéttin sé að reyna að komast inn í leikskólana, grunnskólana o.s.fr. til að koma sér á framfæri (þó það sé reyndar nokkuð sjúkt, en þetta fólk er á annari skoðun en ég og fleiri hérna og sér ekkert rangt við það sem það gerir). Það eru stjórnendur leik- og grunnskólanna sem eiga að hafa lög og reglur á hreinu. Þarna tel ég að sé verið að brjóta lög, en sennilega hafa þessir stjórnendur ekki gert sér grein fyrir því vegna þess einfaldlega að þeir eru sennilega fylgjandi kirkjunni sjálfir.

Ég vona að þetta fólk sem er í þessum fyrrnefndu stjórnunarstöðum sjái að sér og leiðrétti þessi mistök (varðandi ráðningu þessa trúlærðu einstaklinga) sem og að stjórnendur leik- og grunnskólana fái að vita og geri sér grein fyrir að þeir megi ekki hleypa trúboðum inn í sínar stofnanir.

Persónulega er ég ekki reiður yfir nákvæmlega þessum tilfellum. Vissulega leiðinlegt að þetta skuli hafa átt sér stað og að málið sé komið þetta langt. Aðilar kirjunar eru auðvitað blindir á sína trú og þeim þykir hún auðvitað mjög falleg og "rétt" og vilja þessvegna að sem flestir fái að "njóta" hennar. Þetta sama er bara hægt að segja um svo marga hluti. Einstaklingur sem hefur einhverja ákveðna trú eða skoðum finnst hún auðvitað vera öðru fremra og einsetur sér kannski að upplýsa sem flesta, en stjórnendurnir verða að vita hvað á rétt á sér innan sinna stofnana og hvað ekki.

Eða eigum við að taka þessu sem fordæmi og ganga í leikskólana sem andtrúboðar? Einhvernvegin held ég að stjórnendurnir yrðu þá fljótir að loka dyrunum á nefið á okkur, sem er auðvitað það sem þeir eiga að gera, jafnt á okkur sem útsendara trúfélaga.

Varðandi launamuninn, þá finnst mér svívirðilegt að hann sé svona mikill og raunar að hann skuli vera einhver yfir höfuð! Kennaralærður einstaklingur (s.s. grunnskólakennari) hefur lokið 90 einingum til B.Ed. prófs. Guðfræðingur hefur lokið 90 einingum til B.A. prófs. Hinsvegar bætast við tvö ár ef einstaklingur hefur lokið embættisprófi, eða 60 einingar.

Gefum okkur að grunnskólakennari hafi lokið B.Ed. prófi, yngri en 30 ára sé umsjónarkennari yfir 20 eða fleiri nemendum (sem er reyndar bekkur í stærri kantinum), þá hefur hann í grunnlaun 206.205 kr,- á mánuði (miða hér við að hann sé í launaflokki 233 skv. kjarasamningi Launanefndar sveitafélaga og Kennarasambands Íslands fyrir tímabilið 1. ágúst 2005 til 31. desember 2007). Ef grunnskólakennari hefur lokið tvöfaldri bakkalár gráðu eða tekið master skal hann hækka um tvo launaflokka. Ef við tökum aftur sama einstakling en klínum á hann mastersgráðu (sem eru auka 60 einingar, eins og embættispróf guðfræðinga) hefur hann í grunnlaun 218.763 kr,- á mánuði (launaflokkur 235). Ég hef ekki kynnt mér launamál presta, en ef ég gef mér að þær tölur sem voru nefndar hér áður í umræðunni séu réttar kemur glögglega í ljós að þessir skólaprestar eru á næstum tvöfalt hærri launum en þessi aumingjans grunnskólakennari sem ég tek í þessu dæmi, þrátt fyrir að hafa klárað sama einingafjölda í háskóla, jafnvel þó svo að embættispróf sé ekki mastersgráða (ég tel að mastersgráða vegi þyngra en embættisgráða, þar sem guðfræðingur getur einnig tekið mastersgráðu ofan á sína menntun, hvort sem hann hefur aðeins B.A. gráðu eða embættisprófið líka).

Ég gæti haldið áfram í alla nótt, en ég ætla að segja þetta gott í bili. Takk fyrir mig.


Andrés - 05/10/06 00:53 #

Hvernig er það vitað hvað þeir eru að fá þrefalt meiri laun?

Og það er ekki eins og þeir eru að þvinka trú sína á einhverja í skólanum, þeir verða bara þarna til staðar ef fólk vill tala við þá.


Þórður Ingvarsson (meðlimur í Vantrú) - 05/10/06 01:34 #

Eru semsagt ekki annað starfsfólk í skólum sem nemendur geta talað við?


LíkamiHugurSál - 08/10/06 15:40 #

Bara svona í sambandi við þessa launaumræðu, sem að er dálítið skrýtin að mínu mati, þá eru reiknaðir tímar og fleira mjög ólíkt hjá þessum hópum. Eins vinnutími. Prestar vinna t.d. mikið um helgar og á þeim tímum sem að kennarar eru í fríi með fjölskyldum sínum. Ekki misskilja mig - mér finnst kennarar á allt of lágum launum. Finnst þetta bara skrýtinn samanburður. Eins furðulegt að taka allt í einu "virði" starfsstéttarinnar sem að er allt of huglægt mat. Allavega ættu þá umönnunnarstéttirnar að vera hærra launaðir en bankastarfsmenn að mínu mati....

Svo langar mig bara svona að benda ykkur á að starf skólaprestsins í Garðabæ telst 50% starf og hann skiptir sér á milli tveggja skóla.

Ég er ekki viss um að sálfræðingur (ég er sálfræðimenntuð) sé betur hæfur til að takast á við krísur um lífið og tilveruna (sbr. að missa einhvern nákominn). Sérstaklega ekki hérna á Íslandi þar sem að stærsti hluti sálfræðinga (og námsið í HÍ) eru heilaþvegnir af hugrænni atferlismótun ;)


Arnold Björnsson - 08/10/06 15:59 #

Ég er ekki viss um að sálfræðingur (ég er sálfræðimenntuð) sé betur hæfur til að takast á við krísur um lífið og tilveruna (sbr. að missa einhvern nákominn). Sérstaklega ekki hérna á Íslandi þar sem að stærsti hluti sálfræðinga (og námsið í HÍ) eru heilaþvegnir af hugrænni atferlismótun ;)

Er það vegna skorts á mentun sálfræðinga í biblíufræðum? Þetta er merkilegt að heyra frá sálfræðimenntuðum einstaklingi. Gaman væri að heyra skoðun annara sálfæðinga á þessari fullyrðingu.


LíkamiHugurSál - 08/10/06 21:25 #

Nei ekki biblíufræðum, en kannski tilvistarsálfræði??? Veit líka að það er frekar erfitt að komast að hjá sálfræðingum á Íslandi og það er biðlisti. Ekki viss um að neinn í þeirra röðum væri tilbúinn í þessi vinnuskilyrði heldur.

Annars orðaði ég þetta "ekki viss um". Held að það flokkist seint undir fullyrðingu ;)


Birgir Baldursson (meðlimur í Vantrú) - 08/10/06 21:30 #

Hmm, sálfræðimenntuð... Og kallar þig LíkamiHugurSál. Held varla að það geti staðist, því sálfræðingar gera almennt ekki ráð fyrir að fólk hafi sál. Það að þú aðhyllist svona þrískiptingu (og þar með tvíhyggju) bendir til þess að þú hafir einhverjar aðrar hugmyndir en venjulegir sálfræðingar.

Getur verið að þessi sálfræðimenntun þín sé á sviði nýaldar? Ertu kannski sálfræðistjörnuspekingur?


Matti (meðlimur í Vantrú) - 08/10/06 21:41 #

[Vinsamlegast ekki nota mörg mismunandi notendanöfn þegar þið sendið inn athugasemdir. Það er afar villandi þegar sami einstaklingur notar mörg ólík gervinöfn.]


sálfræðingur - 09/10/06 09:29 #

Ég er sálfræðingur. Við lát ástvinar finna vissulega margir huggun í því að vinurinn sé kominn til himnaríkis - hitti þá sem á undan hafa "farið" og bíði eftir lifendum. En slíka huggun geta börn fengið hjá fjölskyldu sinni. Það á ekki að halda henni að barninu í skóla á vegum eins trúfélags. Því miður hangir allnokkru meira á spýtu trúarbragðanna en þessi notalega tilhugsun og margt af því hefur reynst mörgum afar skaðlegt. Sálfræðingur kemur með hlutlausa nálgun á málið - kennir barninu hugsanlega slökun, áhrif jákvæðrar hugsunar, bendir á hvaða hegðun er líkleg til að létta sorgina o.s.frv. Við áfall eins og lát ástvinar getur komið upp áfallastreituröskun, þunglyndi, kvíði og ýmislegt fleira sem ég tel engum vafa undirorpið að sálfræðingur er mun færari í að takast á við en guðfræðingur. Mér finnst leitt að heyra sálfræðimenntaða konu tala svona en sé að óánægja með áherslu á atferlisstefnu í menntun sálfræðinga er um að kenna. En ég get huggað viðkomandi með því að sálfræðingar eru líka manneskjur (ekki sálarlausar samkvæmt almennum skilningi) og taka auðvitað á málum sem slíkar. Hugræn atferlismeðferð (ekki atferlismótun) byggist einmitt á því að hjálpa manni að koma auga á hugsanir sem rífa viðkomandi niður og finna aðrar í staðin. Atferlisþátturinn snýr að því að fá viðkomandi til að gera það sem hefur reynst öðrum vel. Lokamarkmiðið er vellíðan - einmitt það sem gagnrýnendur atferlisstefnu halda að stefnan kæri sig kollótta um.


skeptisti - 12/10/06 15:00 #

Áhugavert.. Enn það vantar eiginlega einhver viðhengi/"tilvísanir"/staðreyndir í þessa grein.

Hvar er hægt að fá gögn um þetta? annars lítur þetta bara út eins og áróður.

Annars ætla ég ekkert að setja út á þessi laun.. nema það kanski að mér fynnst laun kennarana ætti að vera hærri. ;)

Enn endilega koma með tilvísanir í þessar tölur fyrir skeptiskar sálir eins og mig. =)


Matti (meðlimur í Vantrú) - 12/10/06 15:33 #

Hvað er það nákvæmlega sem þér finnst vanta, gögn um hvað? Laun presta?

Kjör presta eru rædd í þessum spjallþræði og þar eru vísanir á heimildir.


Þórður Sveinsson - 02/11/06 17:35 #

„Prestar/djáknar eru bara þarna til að ræða málin og það getur svo sannarlega hjálpað börnum/unglingum í vandræðum og/eða sálarkrísu.“

Þetta segir Sól hér að ofan. Út af fyrir sig eru orð hennar alveg skiljanleg því að hvernig getur eitthvað verið að því að vilja hjálpa börnum – og mega trúaðir ekki gera það eins og hverjir aðrir? En Sól gleymir einu. Eins og Jón Magnús nefnir hér að ofan er aðstoð skólapresta og skóladjákna aðeins fyrir þau börn sem játa kristna trú – ólíkt þeirri aðstoð sem sálfræðingar veita. Hin börnin eru því skilin út undan, bæði þau sem játa aðra trú en kristni og þau sem játa enga trú. Hvers eiga hin börnin að gjalda?

Ekki þar fyrir að þau geta svo sem alveg farið til prestsins eða djáknans líka. En hvað felur það í sér? Jú, að til þess að fá sömu aðstoð og önnur börn í skólanum verða þau líka að sætta sig við ítroðslu á kristnum trúarhugmyndum. Hvernig getur það samrýmst þeirri grundvallarreglu að á Íslandi ríkir trúfrelsi?

Það er óþolandi að enn þann dag í dag skuli þurfa að standa í stappi um þessi mál. Og það er óþolandi að Þjóðkirkjan skuli neita að skilja að hún á ekkert með að vera að troða sér inn í grunnskólana. Þetta eru opinberar menntastofnanir sem eiga ekki að innræta börnum tilteknar trúar- eða stjórnmálaskoðanir. Punktur.

Lokað hefur verið fyrir athugasemdir við þessa færslu. Við bendum á spjallið ef þið viljið halda umræðum áfram.