Gísli Jónasson prófastur í Reykjavíkurprófastdæmi eystra skrifaði grein í Morgunblaðið þar sem hann vakti athygli á að ein kirkja er farin að leka vatni í rigningum. Þetta er svo orðið dæmi um að viðhaldi kirkna sé ábótavant og að það þurfi að hækka sóknagjöldin hið fyrsta.
Nú er gott að horfa á þetta í samhengi því kirkjur landsins eru 322 (2004) og vert að spyrja hvort almenningur eigi að standa í því að viðhalda öllum þessum kirkjum sem fáir nota. Það er vitað að kirkjur landsins standa auðar meira eða minna allt árið með fáum undantekningum og alveg hægt að fullyrða að stór hluti af þessum 322 kirkjum er í lítilli sem engri notkun.
Við í Vantrú viljum hvetja ríkiskirkjuna að leggja af fleiri guðshús og eyða peningunum í þær fáu kirkjur sem eru þó heimsóttar. Það er ekki alltaf hægt að ætlast til að almenningur hlaupi undir bagga með kirkjunni í hvert skipti sem byrjar að leka. Nóg er þörfin annarsstaðar fyrir almannafé en að eyða þeim í viðhald á kirkjum.
Einnig er vert að benda ríkiskirkjunni á að í mörgum löndum í kringum okkur hafa kirkjur verið seldar undir aðra starfsemi með góðum árangri. Þar hafa menn áttað sig á þörfinni á að minnka yfirbygginguna og eyða peningunum þar sem þeirra er þörf.
Þetta er óskiljanlegt "vandamál". Ef kirkjan vill meiri pening frá sóknarbörnunum þá er henni að sjálfsögðu frjálst að innheimta hærri gjöld. Allir bankar og sparisjóðir bjóða upp á að senda út greiðsluseðla fyrir félagasamtök gegn hóflegu gjaldi.
Lokað hefur verið fyrir athugasemdir við þessa færslu. Við bendum á spjallið ef þið viljið halda umræðum áfram.
Arnar - 09/10/12 09:29 #
Jaa.. fyrst prestar vilja meina að trúarhiti íslendinga sé svona mikill og kirkjusókn sé alveg svakaleg, þá ætti nú ekki að vera mikið mál að smala saman nokkrum sóknarbörnum með verkkunnáttu og einlægan vilja til að halda kirkjunni sinni í góðu standi og laga þetta fyrir lítinn pening.