Örn Bárður sér ljósið

Á fréttavakt NFS fyrir hádegi 28. desember var viðtal við prest, nánar til tekið Örn Bárð. Margt áhugavert kom fram í viðtalinu, til dæmis var minnst á styrk sem hann fékk frá kristnihátíðarsjóði til þess að vinna að verkefni sem snýr að umræðum við unglinga um “grundvallarspuringar”.

Örn er einn fárra presta sem hafa séð sóma sinn í því að ræða eitthvað við okkur Vantrúarmenn. Í kjölfar umræðna við predikun sem var full af vitleysum, ákvað hann að birta grein sem bar heitið: „Vantrúarmönnum“ svarað. Við svöruðum að bragði [1, 2, 3, 4, 5], en síðan hefur ekkert heyrst í honum. Hin æpandi þögn virðist hafa gleypt hann líka.

En hvað um það, þessar rökræður við okkur virðast þó hafa gert eitthvað gagn, því miðað við eina setningu í viðtalinu virðist Örn hafa séð ljósið:

Það er það sem er svo merkilegt við kristna trú, full af mótsögnum.

Velkominn í hópinn Örn! Þetta höfum við verið að segja ykkur prestunum alveg frá opnun Vantrúarvefritsins. Það stendur ekki steinn yfir steini í kristinni trú. Ætli Örn Bárður hætti nú að segja fólki að kristin trú sé sannleikurinn? Mun hann segja fermingarbörnunum að kristin trú sé full af mótsögnum? Ég efast um það.

En í ljósi þessara frábæru uppljómunar Arnar Bárðar er kannski rétt að skoða hvað Örn lét frá sér áður fyrr:

“Ef einhver trú byggir á jafntraustum heimildum og rökum og kristin trú lýsi ég hér með eftir henni.” -Viðhorf byggð á hindurvitni?

Nú vita allir, þar á meðal Örn, að rökfræðin er ekkert sérlega hrifin af mótsögnum. Reyndar segir ein frumforsenda rökfræðinnar að eitthvað sem er mótsagnakennt geti ekki verið rétt. Trú sem er “full af mótsögnum” getur ekki verið vel rökstudd. Hún er auðvitað mótsagnakennd rökleysa. Örn hlýtur að vita það, enda er hann góðvinur skynseminnar:

“Notum skynsemina sem Guð hefur gefið okkur.” -Veðbókarvottorð að handan

Hann meira segja biður guðinn sinn um að tilkomi “heilbrigð skynsemi, heilbrigð trú og hindurvitnalaus” í almennri umræðu hér á landi, vonandi vill hann flokka trúmálaumræðu með því. En nú segir heilbrigð skynsemi að trú sem er full af mótsögnum geti ekki verið sönn. Örn Bárður segist styðja heilbrigða skynsemi og viðurkennir að kristin trú sé full af mótsögnum. Þar af leiðandi ætti hann að vita að kristin trú er ekki sönn. Ætli Örn sé sammála því?

Ef til vill gæti Örn bara sagt að hann viti vel af þessu, en þegar þú ert á annað borð sáttur við að hafa mótsagnir í heimsmynd þinni, þá geturðu alltaf bætt einni við. Ætli það verði ekki að koma í ljós. Mig langar að minnsta kosti að vita það hvort við eigum von á því að Örn verði fyrsti prestur Íslands sem opinberlega afneitar kristinni trú og hef því ákveðið að senda honum nokkrar línur:

Sæll Örn Bárður

Ég sá viðtalið við þig á fréttavakt NFS.
Til hamingju með að hafa fengið styrk frá kristnihátíðarsjóði fyrir verkefnið “klassískir unglingar”. Það sem vakti enn meiri athygli mína var samt þessi setning: “Það er það sem er svo merkilegt við kristna trú, full af mótsögnum.”

Ég verð að byrja á því að óska þér til hamingju með að hafa komist að þessari niðurstöðu. Ég hef skrifað grein um þetta á Vantrúarvefinn. Ef þú vilt einhvern tímann skrifa greinar um þessar fjöldamörgu mótsagnir, þá skaltu ekki hika við að senda þær til Vantrúar-vefritsins.

Annars hlýtur þessi afstaða þín að breyta miklu varðandi starfið þitt. Muntu til dæmis segja krökkunum í verkefninu “klassískir krakkar” frá öllum þessum mótsögnum? En hvað með fermingarbörnin?

En stóra spurningin hlýtur að vera hvaða áhrif þetta hefur á trú þína. Nú hefur þú hvatt fólk til þess að nota skynsemina og hugmyndakerfi sem er fullt af mótsögnum er augljóslega ekki satt, ef við notum skynsemina. Ertu þá ekki lengur kristinn?

Ef þú svarar þá mun ég líklega birta efnislegt innihald svarsins á Vantrúarvefnum, nema þú óskir sérstaklega eftir öðru.

bestu kveðjur,
Hjalti Rúnar