Þeirra eigin orð

Það versta sem við í Vantrú höfum gert ríkiskirkjunni er ekki að vera dónaleg þó því sé haldið á lofti þegar umræðan verður óþægileg fyrir kirkjuna. Þegar Vantrú bendir á skandala kirkjunnar bendir kirkjan á puttann. Það versta sem Vantrú gerir er að hlusta á og lesa það sem kirkjufólk hefur sagt og skrifað - og bendir svo öðrum á það „besta“.

Beittasta vopn Vantrúar gegn ríkiskirkjunni hefur frá upphafi verið málflutningur ríkiskirkjunnar sjálfrar, orð og gjörðir fulltrúa hennar. Leið ríkiskirkjunnar úr þeim vanda er ekki sú að benda sífellt á Vantrú heldur að talsmenn hennar fari í sjálfsskoðun og velti fyrir sér hvort það sé hugsanlegt að þau séu vandamálið, ekki Vantrú. Hvort hroki þeirra, stærilæti og forréttindablinda séu hugsanlega það sem í raun kemur þeim í klípu.

Einn hvatinn að stofnun Vantrúar voru glórulaus orð Karls Sigurbjörnssonar þáverandi biskups um trúleysingja og trúleysi og í kjölfarið fylgdu ummæli fjölmargra annarra ríkiskirkjupresta og stuðningsmanna kirkjunnar.

Vantrú hefur tekið saman „bestu“ ummæli kirkjufólks á hverju ári síðan 2005 og leyft lesendum að kjósa það allra besta, síðan 2008. Það kalla fræðimenn á vegum kirkjunnar „háðungarverðlaun“ þrátt fyrir að það eina sem við gerum sé að draga fram þeirra eigin orð. Ef háðung er fólgin í þeim er hún einungis þeirra sjálfra, ekki Vantrúar.

Við hvetjum ykkur til að kjósa um bestu ummæli síðasta árs ef þið hafið ekki gert það. Kosningu lýkur á miðnætti á morgun.