Kristilegi Sjálfstæðisflokkurinn
Samkvæmt Morgunblaðinu var eftirfarandi ályktun samþykkt á landsfundi Sjálfstæðisflokksins í gær:
Sjálfstæðisflokkurinn telur að kristin gildi séu þjóðinni til góðs nú sem aldrei fyrr og að hlúa beri að kirkju og trúarlífi. Sjálfstæðisflokkurinn vill standa vörð um þjóðkirkju Íslands samkvæmt stjórnarskrá.
Landsfundur telur mikilvægt að ríkisvaldið standi full skil á félagsgjöldum (sóknargjöldum) þjóðkirkjunnar og annarra trúfélaga. Öll lagasetning skal ávallt taka mið af kristnum gildum og hefðum þegar það á við. #
Grín
Auðvitað hlæja flestir að þessu enda vissi fólk ekki hvort þetta væri bara grín þegar fyrstu fréttir bárust. Þetta er þó ekki fyndið, við erum að tala um stærsta stjórnmálaflokk landsins, flokk sem sennilega verður í valdastöðu eftir næstu kosningar.
Sjálfstæðisflokkurinn gengur of langt.
Ekki er lengur hægt að tala um Sjálfsstæðisflokkinn sem annað en kristilegan stjórnmálaflokk. Fólk sem skilgreinir sig hægra megin á stjórnmálarófinu og styður frelsi og jafnrétti í trúmálum hlýtur að velta því fyrir sér hvort það geti stutt flokk með svona stefnu.
Þessi ályktun kemur ekki eins og skrattinn úr sauðaleggnum. Síðustu ár hafa þingmenn Sjálfstæðisflokks verið í forsvari þeirra sem verja ríkiskirkjuna og kristni á Alþingi. Árni Johnsen mætti með Biblíuna í púltið þegar reyna átti að hafa leik- og grunnskólalög veraldleg, Þorgerður Katrín hefur verið iðin við að berjast gegn því að lífsskoðunarfélög fái sömu réttindi og trúfélög og Bjarni Benediktsson mætti fyrir nokkrum mánuðum í útvarpsþáttinn Harmageddon og varði hin kristilegu gildi. Ef stjórnmálaflokkur daðrar ítrekað við djöfulinn þarf varla að koma á óvart þegar fjandinn mætir á fund og hefur betur.
Í þessum málaflokki hefur Vantrú barist fyrir því að allir hafi frelsi til að trúa því sem þeir vlija svo lengi sem þeir skaða ekki aðra og að allir séu jafnir að lögum. Stefnan sem Sjálfstæðisflokkur er að marka sér í trúmálum stangast á við hvoru tveggja.
Grunngildi flokksins
Telja landsfundarmenn Sjálfstæðisflokksins virkilega að það sé í samræmi við grunnstefnu flokksins að ríkisvaldið sé að standa í rekstri trúfélaga og að eitt trúfélaganna skuli sett í forréttindastöðu?
Hefur flokkurinn hingað til ekki sagst styðja einstaklingsframtak og minni ríkisrekstur? Hvernig í ósköpunum geta þeir flokksmenn sem studdu þessa ályktun samræmt þetta tvennt? Er það virkilega hlutverk ríkisins að reka trúfélög og jafnvel að “innheimta félagsgjöld” (sem eru í raun ríkisstyrkir) fyrir félög út í bæ?
Hvaða kristnu gildi?
Þegar talað er um “kristin gildi” hljótum við að gera ráð fyrir að um sér að ræða gildi sem einkenna kristni en ekki aðrar lífsskoðanir. Það er merkingarlaust að tala um sammannleg gildi sem kristin, við segjum t.d. ekki að það sé kristilegt að borða mat - allir þurfa að borða mat. Þessi gildi sem vísað er til hljóta því að vera mjög merkileg og einungis aðgengileg kristnu fólki.
Hver eru þau eiginlega? Ekki kærleikurinn eins og sumir vilja meina því fólk getur sýnt kærleika án þess að trúa því að Jesús hafi verið eingetinn sonur Maríu og framkvæmt kraftaverk.
Gjarnan er vísað til þúsund ára sögu kristni á Íslandi en þá gleymist yfirleitt að þessi saga var ekki alltaf dans á rósum nema dansað hafi verið á þyrnunum. Trúfrelsi var ekki við lýði í 900 ár af þessum þúsund, hér var bannað að vera ókristinn. Vill Sjálfstæðisflokkurinn banna það aftur?
Hvernig er það, getur Sjálfstæðisflokkurinn hér eftir kennt höfuðstöðvar sínar við Valhöll? Er ekki tímabært að endurskíra húsið. Betlehem er ágætt nafn.
Það umburðarlyndi sem einkennir Ísland í dag er glænýtt, fyrir 20-30 árum flúðu samkynhneigðir land útaf ofsóknum. Fyrir 60 árum neituðu íslendingar að taka við þeldökkum bandarískum hermönnum.
Einhverjir telja að kristnivæðing sé besta vörnin gegn íslamistum, sharia lög voru nefnd á landsfundinum í gær. Þetta er skelfileg rökleysa. Við verjumst ekki ofsatrú með því að taka upp aðra ofsatrú. Við verjumst með því að hafa veraldlegt samfélag þar sem fólki er ekki mismunað á grundvelli trúarbragða og enginn fær afslátt af lögum vegna trúarbragða sinna, hvorki múslimar né kristnir. Við verjumst með fræðslu, berjumst fyrir mannréttinum óháð trúarskoðunum.
Að lokum
Vantrú er ekki flokkspólitískt félag. Í Vantrú eru fjölmargir sem skilgreina sig sem hægrimenn og í félaginu eru núverandi og fyrrverandi félagsmenn í Sjálfstæðisflokknum. Við gagnrýnum alla flokka sem ýta undir trúarbrögð og önnur hindurvitni.
Í frétt Morgunblaðsins um þessa ályktun kemur fram að hún hafi verið samþykkt naumlega og að ungir sjálfstæðismenn hafi barist gegn því að hún yrði samþykkt.
Við vonum innilega að unnendur trúfrelsis innan Sjálfstæðisflokksins muni ná yfirhöndinni í framtíðinni, en ljóst að er hér hefur orðið bakslag, flokkurinn er kristilegri í dag en hann hefur verið síðustu áratugi. Ef ekkert verður að gert hljóta frjálslyndir hægrimenn að fara að leita sér að öðrum flokki.
Hugsanlegt er að ályktunin verði tekin til baka á landsfundi í dag þó fundarsköp leyfi það reyndar ekki. Það breytir því ekki að Sjálfstæðisflokkurinn er mættur til leiks sem kristilegur íhaldsflokkur. Framsókn er ekki lengur jafn einmana.
Flokkað undir: ( Stjórnmál og trú )
Matti (meðlimur í Vantrú) - 24/02/13 13:10 #
Nokkuð margir hafa tjáð sig um málið. Hér eru fáeinir.
Óli Jón spyr: Hvenær eiga kristin gildi ekki við?
Davíð Þór Jónsson bloggaði:
Baldur Kristjánsson lagði einnig orð í belg:
Kristin stjórnmálasamtök (JV) eru ánægð:
Ásdís Halla Bragadóttir gerði athugasemd við þetta á Facebook, a.m.k. tveir kristilegir sjálfstæðismenn verja þetta í athugasemdum:
Agnar Kristján Þorsteinsson: Hin kristilegu gildi stjórnmálanna