Hræsni biskups

Páskar eru sagðir mesta hátíð kristinnar kirkju því þá drápu menn guð sem var forsenda þess að guð gæti fyrirgefið mönnum að fyrsta parið sem hann skapaði borðaði ávöxt. Guðinn reis upp frá dauðum ásamt fjölda annarra og skaust skömmu síðar upp til himna (með skít og öllu saman - eins og Helgi Hóseasson orðar það) til fundar við sjálfan sig.

Á hverju ári flytja fjölmiðlar fréttir af brjálæðingum á Filippseyjum sem leiðist ekki að láta krossfesta sig og svo sést myndskot úr hálftómri Dómkirkjunni þar sem æðstistrumpur... biskup prédikar yfir sauðum sínum.

Í ár var biskupi mikið niðri fyrir og hann fordæmdi markaðinn hræðilega sem dró lýðinn niður í svaðið, frá heilagri almennri kirkju og boðskap hennar. Karl Sigurbjörnsson er hræsnari því kirkjan var ófeimin við að taka við illa fengnu fé fjárglæframannanna sem hún kallar nú þá auðugu og valdamiklu og ófyrirleitnu þessa heims.

Við munum þegar smekklausir foreldrar fengu smekklega gjöf frá VÍS við skírn barna sinna í Grafarvogskirkju.

Hvítur smekkur með rauðri rönd og á honum stendur: "Þakkið Drottni því að hann er góður" og undir mynd af Grafarvogskirkju stendur "Með kveðju frá Grafarvogskirkju" Með smekknum fylgir svo auglýsingabæklingur um bílstóla frá VÍS. Í staðinn fyrir auglýsinguna fær kirkjan styrk frá VÍS.

Baugur, VÍS og LÍ gáfu orgel fyrir milljónatugi (hvað eru það margir brunnar?)

Af forsíðu DV 1. des 2005

Auðmenn gefa orgel fyrir 40 milljónir
Þrír helstu auðmenn þjóðarinnar hafa sammælst um að gefa Grafarvogskirkju nýtt orgel fyrir 40 milljónir króna. Var það ákveðið eftir að séra Vigfús Þór Árnason sóknarprestur fékk þremenningana í heimsókn þar sem farið var yfir málið. Þörfin var brýn og þeir félagar, Björgólfur Guðmundsson í Landsbankanum, Finnur Ingólfsson í VÍS og Jóhannes í Bónus, voru ekki lengi að ákveða sig: Orgelið skyldi keypt.
DV, fimmtudagur 1. desember 2005

Sund ehf kostaði Vinaleið í Garðabæ.

Samherji styrkir barnatrúboð á Akureyri.

Eflaust eru ótal dæmi um annað, við hvetjum ríkiskirkjuna til að setja allt á borðið og segja frá öllum styrkjum frá auðmönnum Íslands, til kirkjunnar eða sókna.

Vantrú hefur aldrei þegið styrki frá stórfyrirtækjum og aldrei boðist slíkir. Vantrú hefur heldur ekki hlotið styrki frá ríki eða bæ.

Kirkjan sýgur ekki bara spena auðmanna heldur líka bæjarfélaga og ekki má gleyma fimm þúsund milljónum árlega frá ríkinu.