Ágústínusarverðlaun - hratið

Kosning um Ágústínusarverðlaun Vantrúar fyrir árið 2008 stendur yfir. Eftir mikla yfirlegu valdi dómnefnd tíu tilvitnanir sem komust í úrslit. Við hvetjum alla til að kjósa.

Hér eru nokkur ummæli sem ekki hlutu náð fyrir augum dómnefndar.

Uppáhalds kaþólklikkinn okkar allra, Jón Valur Jensson, fer iðulega á kostum og er alltaf alveg á leiðinni að svara stóru spurningunum. Verst hvað maðurinn er upptekinn. Mannúðin og frelsisástin lekur af Jón Val.

Svo vara ég þig við frekara guðlasti en því, sem sjá hefur mátt á síðum þínum, því að ella máttu eiga von á því að lenda í réttarsalnum vegna brota á landsins lögum og stjórnarskrá. - Jón Valur Jensson #

Þó prestar keppist í dag við að afneitað góðærinu og hengja það á fráhvarf frá kristni tóku sumir þátt í því enda prestar á ágætis launum.

Ég er undir sömu sök seldur. Ég keypti mér dýran Landcruiser jeppa í haust. Ég hefði alveg getað ekið áfram á gamla bílnum mínum en ég ákvað að kaupa jeppann. Mitt var valið. - Sighvatur Karlsson, ríkiskirkjuprestur #

María Ágústsdóttir kemst oftar á blað en nokkur annar, þankagangur hennar virðist stundum á skjön við almenna skynsemi.

Vantrúarmenn, sem oft virðast meiri bókstafstrúarmenn en við hin, hafa dregið fram eitt og annað sem þeirra rannsókn á ritningum kristinna manna virðist benda til að sé á skjön við almenna skynsemi. - María Ágústsdóttir, ríkiskirkjuprestur #

Það er stundum pínlegt þegar prestar reyna að tengja ritninguna við raunveruleikann og vísindin. Hér glímir séra Skúli við erfðafræðina og endar í góflinu.

Þetta eru upplýsingar sem hægt er að umorða með bókstöfunum D, N og A og það hvernig þeir para sig saman ræður því hvernig lífveran lítur út! - Skúli Sigurður Ólafsson, ríkiskirkjuprestur #

Karl Sigurbjörnsson fær milljón á mánuði í laun frá ríkinu fyrir að vera biskup Íslands. Þetta er það sem við borgum fyrir.

Bænin er hámark málþroskans, og trúin hin æðsta viska. - Karl Sigurbjörnsson, æðsti biskup ríkiskirkjunnar #

Endum þetta á Maríu Ágústsdóttur enn og aftur.

Ég heyrði í vikunni sem leið athyglisverða kenningu um að nafnið á landinu okkar, að það sé ekki kennt við kulda eða frost heldur Jesú. Jesúland – Jísland – Ísland. Þessi ágæta kenning sem Garðar Cortes setti fram í smásöguformi á útskrift Söngskólans í Reykjavík sl. fimmtudag tengir aftur til papana sem hér bjuggu á undan víkingunum og írska múnkinn Brendan.
Jesúland. Hvað finnst ykkur um það? Mér finnst það flott. Ýmsir spádómar hafa gefið Íslandi sérstaka stöðu meðal þjóðanna, jafnvel í þá veru að þessi norðlæga eyja muni skipta sköpum um framtíð heims. Ég er nú enginn sérfræðingur í því en mér þótti strax vænt um þessa hugmynd sem hann Garðar eldri bar fram. Jesúland. Landið hans Jesú. Góð hugmynd. - María Ágústsdóttir #