Allar færslur Allir flokkar Sos Um félagið Úrskráning Lógó Spjallid@Vantru Póstfang Vantru@Facebook Vantru@Youtube Vantru@Twitter

Spánn: Kaþólska kirkjan gegn mannréttindum

Á sunnudaginn voru þingkosningar á Spáni, þar sem Sósíalistaflokkur Zapateros forsætisráðherra vann sigur. Eftir að hann komst til valda hefur hann hrundið í framkvæmd margvíslegum þjóðþrifamálum, þar á meðal auðveldað hjónaskilnaði og losað um mjög ströng lög um fóstureyðingar. Auk þess hóf stjórnin rannsókn á glæpum falangistahreyfingarinnar í spánska borgarastríðinu og í stjórnartíð Francos, en kaþólska kirkjan lagði blessun sína yfir þá í meira en 40 ár, þar á meðal morð, og hvatti jafnvel til þeirra. Versti glæpur hinna guðlausu sósíalista var þó, að mati Antonio Maria Rouco Varela, kardínála í Madríd, að heimila staðfesta sambúð samkynhneigðra – hann kallaði það „stærsta áfall í 2000 ár“.

Það kemur ekki á óvart að kirkjan hefur verið við sama heygarðshornið og hún er vön, og verið mjög ósátt við þessar framfarir. Það hefur ekki farið hátt í umræðunni í fjölmiðlunum, en kirkjan lagði sitt lóð á vogarskálarnar í kosningabaráttunni.

Það var Varela kardínáli sem reið á vaðið. Hann er sérlegur aðdáandi arfleifðar Francos hershöfðingja, og kveður þar við nokkuð nýjan tón hjá kirkjunni, sem annars hefur verið frekar þögul um þennan tíma sinn. Á biskupastefnu í janúar hvorki meira né minna en bannfærði hann hina guðlausu sósíalista, og á útifundi ekki alls fyrir löngu tilkynnti hann að bannfæringin næði einnig til allra þeirra sem greiddu þeim atkvæði sitt í kosningunum. Miðað við að sósíalistar fengu um 45% atkvæða í kosningunum má þá reikna með að tæpar 20 milljónir Spánverja séu á leið til helvítis, samkvæmt skilgreiningu, og verði þar örugglega og eilíflega.

Þetta var ekkert frumhlaup af hálfu Varela kardínála: Sjálfur Benedikt páfi hrósaði honum fyrir þetta. Páfi er að reyna að styrkja pólitíska stöðu sína innan Evrópusambandsins. Ef öfgakaþólikkar hefðu unnið stórsigur á Spáni hefði það verið vatn á myllu hans, en þarna mistókst þeim og sitja eftir niðurlægðir og með sárt ennið. Eindreginn stuðningur kaþólsku kirkjunnar við ný-fasistaflokkinn PP dugði þeim ekki til sigurs, en hefur hins vegar haft áhrif í þá átt að spíssa andstæðurnar í spænskum stjórnmálum í hér um bil 40% hægri-kaþólskan minnihluta og um 60% vinstri/miðju-frjálslyndan meirihluta.

Á Spáni er löng hefð fyrir „gagnsiðbót“, allt frá því að Ignatius Loyola stofnaði Jesúítahreyfinguna til höfuðs mótmælendum til þess er Franco hershöfðingi og íhalds-þjóðernis-kaþólsk falangistahreyfing hans hófu beint borgarastríð gegn lýðræðislega kjörinni mið-vinstristjórn árið 1936. Á valdatíma hans naut kirkjan umfangsmikilla forréttinda, og einokaði m.a. menntakerfi landsins, og hefur löngum talið sig hafa rétt á öllum völdum í landinu. Um þessar mundir er Rouco kardínáli í baráttu gegn stjórnarskrá landsins frá 1978, sem skilgreinir Spán sem trú-hlutlaust ríki. Það kallast óneitanlega á við baráttu klerkamafíunnar Opus Dei gegn „óréttlátum lögum“ – sem þeir skilgreina sem lög sem brjóta gegn lögum guðs.

Nú þegar kaþólska kirkjan hefur verið rassskellt svona á Spáni beinast sjónir næst til Ítalíu, þar sem svipað eru uppi á teningnum. Mun miðju-vinstristjórnin þar halda velli gegn Berlusconi, sem nýtur stuðnings kaþólsku kirkjunnar og ný-fasista þar? Maður þarf hvorki að vera guðlaus né sósíalisti til þess að það setji að manni ugg við þessar væringar kirkjunnar.


Birtist upphaflega á Egginni þann 11. mars.

Vésteinn Valgarðsson 12.03.2008
Flokkað undir: ( Kaþólskan , Stjórnmál og trú )

Viðbrögð


Ísleifur Egill - 12/03/08 09:05 #

Frábærar fréttir að sunnan, vona svo sannarlega að kaþólska kirkjan átti sig á því að guðhræðsla og fordómar virki ekki á vel menntað og upplýst fólk.


Anna Benkovic Mikaelsdóttir (meðlimur í Vantrú) - 12/03/08 11:23 #

Gott að fólk er farið að nota eigin hugsun og skynsemi!


Jóhann - 12/03/08 11:35 #

Ég á svoldið erfitt með að átta mig á hver afstaða kaþólsku kirkjunnar er hvað varðar samband veraldlegs og andlegs valds. Í ljósi ummæla Varela virðast þeir vilja gamla miðaldafyrirkomulagið og vera á móti trúfrelsi og þá væntanlega helstu mannréttindasáttmálum. Er opinberri afstöðu þeirra til þessara hluta lýst einhversstaðar? Hefur páfi einhverntíma tekið afstöðu til t.d. mannréttindasáttmála Evrópu?


Óskar P. Einarsson - 12/03/08 15:28 #

Ég var að lesa alveg stórkostlegt kvót frá Spænska leikaranum Javier Bardem (sem leikur eitt eftirminnilegasta illmenni síðustu ára, ef ekki áratuga, Anton Chigurh í kvikmyndinni "No Country for Old Men"):

...[if he were gay, he would] "get married tomorrow, just to piss the church off".

Fleiri nagla í líkkistu kaþólska kyrku-skriflisins, takk!


Lárus Viðar (meðlimur í Vantrú) - 12/03/08 18:55 #

Afsakið orðbragðið en djöfull eru prelátar spænsku kirkjunnar ógeðslega heimskir. Bannfæra þá sjálfkrafa sem kjósa sósíalista? Hvað halda þeir að þeir séu?


Valtýr - 12/03/08 21:47 #

Lárus, þeir halda líklega að þeir séu útvaldir af guði til að fara með völdin í landinu.


Anna Benkovic Mikaelsdóttir (meðlimur í Vantrú) - 13/03/08 00:21 #

á þessari vefslóð reynir JVJ virkilega í anda miðaldarkirkjunnar að útskýra úrslitin... http://jonvalurjensson.blog.is/blog/jonvalurjensson/entry/469776/ mér finnst ´Sgústínus kirkjufaðir virðingarverður í sínu umhverfi sem er gjörsamlega umvafið kaþólsku valdi...en núna í dag , með öllum okkar upplýsingum og menntun bið ég fólk vikrilega að íhuga ummæli JVJ?...held virkilega ekki að hann fatti á hvaða öld hann sé fæddur?


Arnaldur - 13/03/08 00:31 #

Það er ótrúlegt að sama hvert er litið í hinum stóra heimi má finna eitthvað um níðingsverk kaþólikka. Einn óþokki að fá þungan dóm fyrir aðild sína í fjöldamorðunum í Rwanda. Slátraði hundruðum manna sem leituðu hælis í kirkju hans.

http://news.bbc.co.uk/2/hi/africa/7292081.stm


Gunnar Friðrik - 14/03/08 16:07 #

Þetta er eins og ein "snillingurinn,, á moggablogginu að nafni Magnús sagði að kaþólska kirkjan væri gjöf til manna frá guði. Voðalega er fólk tammt á að gefa sér hlutina


Hjalti Rúnar Ómarsson (meðlimur í Vantrú) - 14/03/08 17:08 #

Þetta er líklega sami Magnús og skrifar oft undir nafninu jeremia og sagði eitt sinn hérna á Vantrú:

kaþólska kirkjan hefur sem sagt að mínu mati aldrei í sögunni framið syndasamlegt athæfi.


Haukur Ísleifsson (meðlimur í Vantrú) - 14/03/08 20:08 #

Afneitun?


Gunnar Friðrik - 16/03/08 17:48 #

kaþólska kirkjan hefur sem sagt að mínu mati aldrei í sögunni framið syndasamlegt athæfi.

Jú þetta las ég einhvers staðar líka hjá kaþólska "snillingnum".

Þessir menn þeir lifa í afneitun og blekkingu.

Lokað hefur verið fyrir athugasemdir við þessa færslu. Við bendum á spjallið ef þið viljið halda umræðum áfram.