Ágústínusarverðlaun Vantrúar 2006

Eins og landsmenn vita þá eru Ágústínusarverðlaun Vantrúar án efa eftirsóttustu guðvísindaverðlaun Íslands. Síðastliðið ár var síður verra en allar þær stórfenglegu uppgötvanir sem voru gerðar árið 2005. Tuttugasta öldin var ef til vill öld raunvísindanna, en allt stefnir í að nú sé upp runninn öld guðvísindanna.

Dómnefnd Vantrúar hefur staðið í ströngu í allan janúarmánuð við að velja úr öllum þeim fjölmörgu tilnefningum sem bárust um merkustu afrek guðfræðinga landsins.

Topp tíu guðvísindamenn ársins 2006

10. Stjórn Félags guðfræðinga

Fyrir nýjungar í hagnýtum guðvísindum. Á stjórnarfundi Félags guðfræðinga var gerð sú stórkostlega uppgötvun að prestar væru tilvalnir stjórnendur fyrirtækja:

6 Fyrirtækjaprestar.

Elína er að vinna að því að búa til starfslýsingu fyrir fyrirtækjaprest. Hún hefur hug á að ná sambandi við Íslending í Noregi Elisabeth Yrwing Guthus sem er hagfræðingur og prestur og vinnur sem fyrirtækjaprestur.

Kristinn sagði frá fundi sem haldinn var í Skálholti með samtökum atvinnulífsins. Hann viðraði þar hugmynd um ráðningu fyrirtækjapresta sem tilraunaverkefni hjá fyrirtæki. Hugmyndin fékk góðar viðtökur og spunnust góðar umræður í framhaldinu. Skoðanir komu fram frá fulltrúum atvinnulífsins að hugsanlega væri betra að hér væri um guðfræðing að ræða en ekki prest. Vígslan gæti jafnvel verið hindrun þar sem fólk er með ákveðnar væntingar til presta. Hins vegar gátu þessir sömu aðilar séð fyrir sér að guðfræðingur gæti verið mjög góður að ræða t.d. við fjárfesta, taka þátt í stefnumótun fyrirtækis, koma að starfsmannhaldinu o.s.frv. #

9. Síra Sigurður Árni Þórðarson

Fyrir afrek í trúvarnarfræðum. Síra Sigurður hefur rökstutt allar helstu grundvallarkenningar kristinnar trúar með því að benda á að gagnrýnendur kristninnar séu vondir leiðindapúkar:

Efahyggjan er skárri en trúarofstæki því hún hvetur ekki til herferða, manndrápa og kúgunar með sama hætti. En hrokafull efahyggja er systir hrokafullrar trúar, að því leyti að hún smættir tilveruna, er í grunninn bókstafshyggja, sem ekki umber aðrar skoðanir, getur ekki unnt öðrum, að skilgreina litríki veraldar með öðrum hætti en skv. sinni forskrift. Kynnið ykkur boðskap þeirra, sem eru herskáir guðleysingjar. Þar finnið þið ekki þroskaða vitmenn, heldur hrokagikki, sem hæða og níða. Herskáir guðleysingjar eru bókstafstrúarmenn. Hjá slíkum er jafnan stutt í ofbeldið. #

8. Síra Örn Bárður Jónsson

Fyrir uppgötvun á sviði samþættingar hins áreiðanlega Gamla testamentis og skeikulla ágiskana nútíma vísindamanna:

Margar tilgátur hafa verið settar fram um tilurð heimsins. Ljóðið í upphafslínum Gamla testamentisins er ein þeirra (þið tókuð vonandi eftir því að ég kallaði það ljóð), þróunarkenning Darwins er önnur tilgáta. Nýverið birtu vísindamenn þá tilgátu að alheimurinn hafi líklega orðið til þegar efnismassi á stærð við væna appelsínu sprakk á tíma sem er einn trilljónasti hluti úr sekúndu. Og við vitum auðvitað öll hvað það er langur tími, eða þannig! Hugsið ykkur! Allur alheimurinn varð til á tíma sem er svo stuttur að hann mælist varla! En hugsið ykkur það undur að höfundur 1. Mósebókar skuli hafa getað gert sér þetta allt í hugarlund fyrir þrjú þúsund árum án þess að hafa nokkru sinni heyrt um Hubble-sjónaukann, um stjarnfræði, eðlisfræði, geimferðir eða nokkur hugtök nútíma vísinda! Þessi höfundur var skáld og hafði innsæi og sagði bara á sinn ljóðræna og skáldlega hátt, í barnslegri einlægni:

Guð sagði: Verði ljós! Og það varð ljós.

Hugsið ykkur undrið að hann hafi vitað þetta á sinn hátt fyrir þrjú þúsund árum. Vísindamenn samtímans vita ekkert betur en hann! En á hinn bóginn hafa þeir annað málfar, önnur hugtök, aðrar aðferðir til að komast að sömu niðurstöðu, að sama sannleika og þessi óþekkti snillingur komst að með innsæi sínu og trú! #

7. Herra Karl Sigurbjörnsson, Biskup Íslands

Fyrir uppgötvun í trúfræðum. Það hefur lengi verið vitað að krossfestingin og upprisan séu hlægileg, en Herra Karl Sigurbjörnsson uppgötvaði að það var einmitt planið hjá Guði:

Það er hið hlægilegasta af öllu hlægilegu, ótrúlegasta af öllu ótrúlegu, gleðilegast allra gleðiefna. Að vissu leyti eru páskarnir því alltaf og ævinlega brandari Guðs sem hlær ...#

6. Síra Jakob Hjálmarsson

Fyrir uppgötvun á sviði trúvarna. Kom með þau sterku rök að ekkert væri að marka Dawkins, þar sem hann er eins og bæði Aldous Huxley og Nietzche, en þeir eru báðir dánir. Þannig að það er ekkert að marka Dawkins!

Nei, það er óþarfi að láta svona menn ónáða sig sérstaklega þeir hafa verið á ferðinni frá öndverðu. Er þessi Dawkins ekki af sama sauðahúsi og Aldous Huxley, eða Nietzche ef út í það er farið? Þeir eru báðir dánir en ekki Guð. Annars ætti umræðan ekki að snúast um Guð heldur um þig vinur minn. Allt er þetta vegna þín sauðurinn þinn, gersemið þitt. #

5. Síra Sigurður Ægisson

Fyrir uppgötvanir í kirkjusögu, svo virðist sem eina útskýringin á úlínum líkklæðis frá 14. öld sé að líkami hafi farið í gegnum það 1300 árum áður en það var til!

Kraftar tengdir upprisunni mótuðu því útlínurnar [á Tórínó-líkklæðinu], sem hér um ræðir. Það er eina mögulega skýringin. #

Fyrir uppgötvanir í Nýjatestamentisfræðum. Vitringurinn kom með frábæran mælikvarða á áreiðanleika guðspjalla, að búa til lifandi fugla úr leir er augljóst bull, en karl sem labbar á vatni og flýgur upp í himininn er augljóslega satt.

Í einu þeirra [augljósu lyga-guðspjallanna] er Jesús sagður hafa verið grænmetisæta. Í öðru er hann að dunda við að búa til leirfugla, gefur þeim anda og sleppir þeim á flug. Yfirleitt er innihaldið í þessum eða svipuðum dúr. Ekki þarf neitt vitring til að sjá, hvers kyns er. #

4. Jón Rafn Jóhannsson

Fyrir uppgötvanir í guðfræðilegri stærðfræði:

Upphafið er þetta. Fyrstur kom Pétur postuli:

Þú ert Pétur, kletturinn, og á þessum kletti mun ég byggja kirkju mína, og máttur heljar mun ekki á henni sigrast. Ég mun fá þér lykla himnaríkis, og hvað sem þú bindur á jörðu, mun bundið á himnum, og hvað sem þú leysir á jörðu, mun leyst á himnum." (Mt 20. 18-20).

Því næst kom: Heil. Linus (um 66-78 ).
Þar næst kom: Heil. Anacletus (um 79-91).
Næst Heil. Klement (um 91-109).

Síðan komu 260 aðrir og sá síðasti Benedikt páfi XVI. Hann er sá 264 sem skipar sæti Péturs. Þversumma tölunnar 264 er 12 og margfeldið með tölunni 5 sama og 72. Engu er líkara en að Andinn segi okkur með þessu að hann sé réttur maður á réttum stað og tíma. #

Fyrir uppgötvanir í kirkjusögu, svo virðist sem að kaþólskir prestar sem uppvísir hafa orðið að barnaníð séu í raun sovéskir útsendara:

Tilgangurinn miðaðist við að eyðileggja kaþólsku kirkjuna innan frá. Á enskri tungu er slík hernaðartækni nefnd „infiltration.“ Þeim var falið að bera út trúvillukenningar og útbreiða samkynhneigð meðal presta og barnaníðingshátt (pedófílíu). Þessir útsendarar Sovétvaldsins einbeittu sér sértaklega að tveimur löndum: Írlandi og Bandaríkjunum. Árangurinn lét ekki á sér standa. Upp úr 1960 reið yfir bylgja kynferðismisnotkunar á börnum og samkynhneigðar meðal presta. þróun sem vafalaust eru stuðningsmönnum hömlulauss kynlífs fagnaðarefni. Um 1980 náði þessi bylgja hámarki þar sem margir þessara manna voru orðnir biskupar og beittu áhrifum sínum miskunnarlaust til að auka á siðspillinguna innan kirkjunnar. Nú eru flestir þeirra gegnir á vit feðra sinna og flett hefur verið ofan af launráðum þeirra. #

3. Síra Auður Eir Vilhjálmsdóttir

Fyrir uppgötvanir í kvennaguðfræði. Svo virðist sem Marteinn Lúther, maðurinn sem benti á að stórar mjaðmir kvenna bentu til þess að þær ættu að halda sig heima hjá sér, hafi verið femínisti:

„Jesú stofnaði hana [kvenfrelsishreyfinguna] og Lúther efldi hana,“ sagði Auður Eir og vísaði til þess að lútherskar konur báru út fagnaðarerindið á sínum tíma. #

2. Síra Hildur Eir Bolladóttir

Fyrir uppgötvun á sviði guðfræði/siðfræði. Ljóst er að siðfræði er ekkert nema guðfræði. Búist er við því að öll siðfræðikennsla verði lög niður í Hugvísindadeild Háskóla Íslands og flutt yfir í Guðvísindadeildina:

“siðfræði er guðfræði” #

1. Síra María Ágústsdóttir

Fyrir uppgötvanir í trúfræði. Síra María hefur undir höndunum fáar vísindalegar sannanir fyrir tilvist Guðs. María á án efa eftir að vekja heimsathygli þegar hún birtir þessar sannanir.

Við höfum næsta litla haldbæra vissu um tilvist Guðs, fáar vísindalegar sannanir. #

Aukaverðlaun

Heiðursverðlaun Ágústínusar í guðfræðilegri stærðfræði fær síðan Einar Sigurbjörnsson, prófessor í guðfræði fyrir svar sitt á Vísindavefnum frá 2003 þar sem hann kemur með magnaða útskýringu á þrenningunni::

Það er erfitt að gera grein fyrir sambandi föður og sonar og heilags anda rökfræðilega þar eð 1+1+1 eru 3 (nema við beitum margföldum, en þá fáum við út að 1x1x1 eru 1!).#

Einnig viljum við verðlauna mesta grænsápuþvott 2006. “Biblían á 100 mínútum” í þýðingu Jakobs F. Ásgeirssonar fær þess heiðurs aðnjótandi. Þarna er farið í nýjar hæðir að draga fram góða texta Biblíunnar en sleppa þeim vondu. Þessi útgáfa af Biblíunni segir kannski meira en mörg orð hve mikið af rusli er í henni og hve miklu er hægt að sleppa. Það væri kannski skref í rétta átt að gera þessa útgáfu að opinberu útgáfunni og henda afganginum því það er pínlegt að horfa á trúmenn leita að góða textanum þegar hægt er að koma honum í eina litla bók sem auðvelt er að leita í.