Allar færslur Allir flokkar Sos Um félagið Úrskráning Lógó Spjallid@Vantru Póstfang Vantru@Facebook Vantru@Youtube Vantru@Twitter

Ágústínusarverðlaun Vantrúar 2005

Af einhverjum óskiljanlegum ástæðum er ekki hefð fyrir því að verðlauna guðvísindamenn fyrir uppgötvanir á sviði guðvísinda. Nóbelsverðlaunin eru einungis veitt fyrir óæðri fræðagreinar eins og efna-, eðlis- og læknisfræði. Er guðfræðin ekki drottning vísindanna?

Vantrú finnst þetta ástand óþolandi og hefur því ákveðið að stofna til Ágústínusarverðlaunanna, í höfuðið á heilögum Ágústínusi sem uppgötvaði guðvísindalegt gildi tölunnar 40, eins og Níels Dungal segir frá í bók sinni Blekkingu og Þekkingu:

Fjörutíu er, segir hann, fjórum sinnum tíu. En fjórir er, segir hann, einmitt talan sem táknar tíma, því að dögum og árum er skipt í fjóra hluta. En tíu er samansett af þremur og sjö. Það þýðir þekkingu á skaparanum og skepnunni: þrír á við þrenninguna, en sjö við hjarta, hug og sál og þegar höfðuskepnunum fjórum er bætt við, eldi, lofti, vatni og jörð, fæst talan sjö, og þá er skepnan fullmynduð. Þess vegna þýðir talan tíu þekkingu, margfölduð með fjórum, sem táknar tíma, minnir það oss á að lifa í tímanum samkvæmt þekkingu - það er að fasta í fjörutíu daga. [bls 261]


Topp tíu guðvísindamenn ársins 2005


10. séra Geir Waage

Fyrir nýjungar í “guðfræðilegum rannsóknum”.

Í stað þess að lesa Biblíuna, trúarjátningar kirkjunnar og að tala við guð ber að leysa guðfræðilegt álitamál með “kaldri rökhyggu”. Það hlýtur að teljast bylting innan trúar á þrí-einan algóðan guð sem drap sjálfan sig sem manneskju svo hann þyrfti ekki að kvelja okkur að eilífu að beita “kaldri rökhyggju”. Þessi nýjung á sviði guðfræðinnar hlýtur að valda byltingu innan Þjóðkirkjunnar og guðfræðideildar Háskóla Íslands.


9. Hulda Guðmundsdóttir.

Fyrir nýjar skilgreiningar á hugtökum til þess að auðvelda trúmálaumræðuna.

Gagnrýnar greinar í blöðum og á vefritum skulu skilgreind sem ofsóknir á kirkju og kristni, rangfærslur eru skilgreindar sem eitthvað sem hún er ósammála.


8. Bjarni Randver, stundakennari við guðfræðideild HÍ

Fyrir nýjungar í lögfræði.

Kom með það lögfræðilega álit að Siðmennt brjóti gegn “góðu siðferði og allsherjarreglu” vegna þess að félagið vill afnema guðlastslögin.


7. séra Sigurður Pálsson.

Fyrir að halda upp aldagamalli hefð kristinna manna, trúarofsóknaræði.

Í svarprédikun sinni við grein Steindórs J. Erlingssonar vísindasagnfræðings:

Hann [Jóhannes skírari] spurði einskis frekar þar til hann missti höfuðið. Hlutskipti margra þeirra sem leitast hafa við að greiða Drottni veg. Í vestrænum samfélögum er slíkt ekki viðhaft. Nú er beitt lymskulegri aðferðum í því skyni að taka votta Krists af lífi í óeiginlegri merkingu og þagga niður óþægilegan boðskap sem gerður hefur verið hlægilegur.

Þó er rétt að benda á að séra Sigurður Pálsson hefur lengi haldið þessari hefð uppi eins og sést á þessari prédikun frá árinu 2004:

Heródesar samtímans, þótt þeir séu ekki með blóðugar hendur, færast í aukana, koma úr felum og reyna að hindra þann framgang. Það hefur örlað á slíkri andspyrnu í einstaka blaðagrein, m.a. þegar sagt var frá starfsáætlun kirkjunnar nú í haust.

Og á vefnum, sem mikið er notaður af ungu fólki, er haldið úti vefsíðum, þar sem kirkju og kristni er úthúðað með óvönduðum meðulum. Að vera Jesús Kristur kostaði ofsóknir og átök. Að fylgja Jesú Kristi kostar hið sama. Við lifum þó þrátt fyrir allt óáreitt að mestu. Líklega verðum við ekki píslarvottar.


6. séra Sigurður Árni Þórðarson

Fyrir nýjungar á sviði trúvarna, nánar tiltekið frumlegt svar gegn bölsvandanum í kjölfar flóðbylgjunnnar miklu á Indlandshafi:

Í fyrsta lagi benti hann á að þetta væri eiginlega stjórnvöldum að kenna fyrir að leyfa fólki að byggja á svona hættulegum stað.

Í öðru lagi benti hann á að það væri eiginlega “einhæfni í guðstúlkun” að halda að guð sé raunverulega almáttugur, hver trúir því eiginlega?

Í þriðja lagi benti hann á að náttúran sé einhvern veginn eiginlega með frjálsan vilja svo að varla getur guð farið að stjórna náttúrunni.


5. séra Örn Bárður Jónsson

Fyrir nýjungar í Gamlatestamentisfræðum og lögfræði.

Eftir miklar guðfræðilegar rannsóknir (líklega gömlu gerðina, ekki “köldu rökhyggju” séra Geirs Waage) komst hann að því að villimannslegur lagabálkur Móses legði mikla áherslu á mannréttindi og að það væri afskaplega fátt í Mannréttindasáttmála Sameinuðu Þjóðanna sem var ekki þegar í Mósebókunum, sem leyfir þrælahald og lítur á konur sem eign.

Löngu fyrir daga fyrr nefndra spekinga öðluðust Gyðingar lögmál sem tjáir réttindi og skyldur þeirra. Ég minnist þess þegar ég var við nám í guðfræði hvað það kom mér og öðrum nemendum á óvart hversu mikil áhersla er lögð á mannréttindi í Gamla testamentinu. [-Boðorð, tveir bræður og bítill]
Kollegi minn hlustaði nýlega á erlendan fræðimann og prófessor í Vínarborg halda fyrirlestur þar sem hann las saman annarsvegar lögmál Gyðinga í Gamla testamentinu og hins vegar Mannréttindasáttmála SÞ og kom þá í ljós að harla fátt var nýtt í hinum merka mannréttindasáttmála 20. aldar. Á því sannast að margar fegurstu hugsjónir samtímans eiga sér rætur í gyðing-kristnum trúararfi. [-Dæmdir dómarar]

Fyrir nýjungar í trúfræði.

Í lok ársins tilkynnti séra Örn Bárður mikla guðfræðilega uppgötvun: það sem er merkilegt við kristna trú er að hún er full af mótsögnum.


4. séra Þórhallur Heimisson

Fyrir guðvísindalegar uppgötvanir varðandi trúleysi sem hann birti í bók sinni Hin mörgu andlit trúarbragðanna

Uppgötvaði “trúarjátningu hins trúlausa manns”:

En trúin leynist víða og getur tekið á sig margar myndir. Hvenær er til dæmis trúleysi orðið að átrúnaði? Ber fullyrðingin „ég trúi því að engin trú sé til“ vott um trú eða trúleysi þess sem hefur yfir þessa trúarjátningu hins trúlausa manns? Því er ekki auðsvarað. Ef til vill er þetta spurning um að skilgreina muninn á því að trúa einhverju og trúa á eitthvað. [bls 11]

Uppgötvaði að það sé átrúnaður að trúa ekki á neitt:
Það að hafna guðlegri forsjá í einhverri mynd er einnig átrúnaður í sjálfu sér. Þá kjósa menn að láta eigin vilja, skynsemi, hugmyndafræði eða mannlega þekkingu skipa sæti guðanna. Þannig gera menn trúleysi að trú og guðleysi að guði og skapa samfélaginu reglur og siði eftir því. [bls 15]


3. dr. dr. Pétur Pétursson prófessor í kennimannlegri guðfræði og almennum trúarbragðafræðum

Fyrir nýjar rannsóknaraðferðir á sviði trúarlífskannana og nýstárlegar túlkanir á niðurstöðum trúarlífskannana.

-benti á að 75% Íslendinga játuðu kristna trú og vísaði því til stuðnings á spurningu sem sýndi að 75% trúaðra Íslendinga játuðu kristna trú. (sjá PowerPoint-glærur)

- taldi að yfir 90% Íslendinga játi kristna trú af því að mamma þeirra var skráð í Þjóðkirkjuna.


2. Séra Kristján Valur verkefnisstjóri á Biskupsstofu og lektor við guðfræðideild

Fyrir nýjar aðferðir í heimildanotkun í rannsóknum á Jesú.

Vísaði á augljóslega falsað bréf frá miðöldum. Bréf sem sagði að Jesús hefði verið bláeygður. Ætli Kristján sé bláeygður?


1. Karl Sigurbjörnsson, æðsti biskup Þjóðkirkjunnar

Fyrir Nýjatestamentisfræði.

Þrátt fyrir að jólaguðspjallið sé tvær ósamrýmanlegar helgisagnir sem eru að mestu leyti búnar til úr gömlum helgisögum, fjalli um syngjandi englakór og fleira sem gerist bara í heimi ævintýranna, áréttaði Karl að jólaguðspjallið sé “heilagur sannleikur” og “ekki ævintýri, ekki helgisögn, þó það minni um margt á goðsögur og ævintýri.” (-Siguraflið)

Hjalti Rúnar Ómarsson 19.01.2006
Flokkað undir: ( Ágústínusarverðlaunin )

Viðbrögð


Svanur Sigurbjörnsson - 19/01/06 12:48 #

Hreint frábært Hjalti Rúnar, hreint frábært!


frelsarinn (meðlimur í Vantrú) - 19/01/06 13:29 #

Þetta er bara snilld! Biskupinn er búinn að negla sig inn hátt á þennan lista fyrir þetta ár með nýárspredikun sinni. Allavega í top 5 fyrir árið 2006 :)


urta (meðlimur í Vantrú) - 19/01/06 13:36 #

TÆR SNILLD!


Kári Svan Rafnsson (meðlimur í Vantrú) - 19/01/06 15:29 #

MAGNAÐ !!! Ég ligg á gófinu og get ekki andað !

Þetta;

Það hlýtur að teljast bylting innan trúar á þrí-einan algóðan guð sem drap sjálfan sig sem manneskju svo hann þyrfti ekki að kvelja okkur að eilífu að beita “kaldri rökhyggju”.

... bjútifúl.


Valtýr Kári - 23/01/06 19:01 #

Iss, þessi listi er bara bull.

Og ef einhver vill gera lista yfir mestu hálfvitana sem setja orðið "séra" framan við nafnið sitt þá toppar enginn, ekki einusinni Biskupinn séra "jólasveinninn er ekki til" flóka!

Eham, ég verð samt að viðurkenna að þetta er vissulega vel skrifað og bráðfyndið ;)

Lokað hefur verið fyrir athugasemdir við þessa færslu. Við bendum á spjallið ef þið viljið halda umræðum áfram.