Lítið kver um kristna trú lesið: Gef oss í dag vort daglegt brauð

Síðast þegar við kíktum í litla kver Karls æðsta biskups Þjóðkirkjunnar litum við á hvað hann hafði að segja um kristna trú. Af svörunum að dæma virtist sú trú ekki vera mjög gáfuleg og í þetta skiptið munum við sjá birtingarform skaðans sem svona vitlaus trú getur haft á heilbrigða skynsemi. Þessi kafli ber heitið Gef oss í dag vort daglegt brauð:

Daglegt brauð, það er allt sem við þörfnumst til að lifa. Ekki aðeins matur og drykkur og aðrar nauðsynjar, heldur einnig heimili, ástvinir, samferðafólk, heilsa og kraftar til líkama og sálar, friður og réttlæti í þjóðfélaginu, hagstæð tíð til lands og sjávar.

Guð gefur okkur öllum allt sem við þörfnumst, jafnvel þótt við biðjum ekki. Það gefur hann jafnvel þeim sem ekki þekkja hann og jafnvel þeim sem hafna honum. En við biðjum þess að við gleymum ekki að þakka honum og þiggja allt úr örlátri föðurhendi hans.

Samkvæmt Karli gefur guð okkur öllum allt sem við þörfnumst og samkvæmt honum þörfnumst við matar, vatns, heimilis, ástvina, heilsu, friðar svo eitthvað sé nefnt. En auk þess eigum við að þakka guðinum hans fyrir að gefa okkur öllum allt þetta. En er þetta raunin? Hvað hefur Karl sagt annars staðar?

Meðan ég flyt þessi orð munu, samkvæmt varfærnasta mati alþjóðastofnana, tólf hundruð börn deyja af völdum fátæktar og skorts. - Karl Sigurbjörnsson

Hundrað og fimmtíu milljón börn eru vannærð. Þrjátíu þúsund börn deyja daglega af völdum sjúkdóma sem unnt væri að koma í veg fyrir. - Karl Sigurbjörnsson

Vonandi mundu þessi tólf milljón börn sem eru dáin af völdum sjúkdóma sem unnt er að koma í veg fyrir eftir því að þakka guðinum hans Karls fyrir að vera svona örlátur. Svo ekki sé minnst á þau börn sem þjást af sjúkdómum sem guð hefur í sköpunargleði sinni gert það illviðráðanlega að við getum enn ekki læknað þá. Guðinn hans Karls er meira að segja svon örlátur að hann gefur okkur nýja sjúkdóma jafnvel þó við biðjum ekki um þá!

Sumir segja ef til vill að ég sé að snúa út úr því sem Karl segir. Ef svo er þá er það ekki viljandi gert. En þessi skoðun er svo fjarstæðukennd að ég á bágt með að trúa því að þetta sé virkilega boðskapurinn. Reynum að fá eitthvað vit úr þessu. Þegar hann talar um “okkur” þá er hann kannski bara að tala um okkur sem höfum það gott á Vesturlöndum. En á Vesturlöndum deyja börn líka úr sjúkdómum, þannig að ekki er hann örlátur á heilsuna hérna.

Hvað þá? Ef til vill er hægt að reyna að túlka sögnina “gefa” á einhvern skrýtinn hátt þannig að guð “gefi” sveltandi börnum í raun mat, þrátt fyrir að hann gefi þeim í rauninni engan mat. En biskupinn hefur mælt. Vonandi munu sveltandi börnin í Afríku muna eftir því að þakka guðinum hans Karls fyrir matinn og vatnið sem hann “gefur” þeim úr “örlátri föðurhendi” sinni.