Höfuðpaurar haturs

Nýlega voru nokkrir einstaklingar kærðir fyrir brot á hatursáróðursákvæði hegningarlaga. Samkvæmt Stundinni var Jón Hagbarður, fyrrverandi ríkiskirkjuprestur, kærður fyrir eftirfarandi ummæli:

Hlutlausa kynfræðslu á veita í skólum en ALDREI réttlæta ónáttúrulega kynhegðan fyrir saklausum börnum og kalla það sem er óeðlileg eðlilegt!!!

Ef þetta er ólöglegur hatursáróður viljum við benda lögreglunni á grófari ummæli.

Kaþólska trúfræðsluritið

Jón Hagbarður er víst kaþólskur núna og þær skoðanir sem hann tjáir og er kærður fyrir eru yfirlýst trú Kaþólsku kirkjunnar á Íslandi. Lítum á kaflann um samkynhneigð í trúfræðsluriti kirkjunnar:

Hreinlífi og samkynhneigð

2357. Samkynhneigð vísar til sambands milli karla og milli kvenna sem með algjörum eða ráðandi hætti laðast kynferðislega að persónum af sama kyni. Það hefur tekið á sig ýmsar myndir í aldanna rás og á hinum mismunandi menningarsvæðum. Sálræn tilurð þess hefur að mestu leyti verið óútskýrð. Með því að styðjast við heilaga Ritningu, er lýsir samkynhneigðum athöfnum sem alvarlegri siðspillingu, [141] hefur erfikenningin ávallt lýst því yfir að "samkynhneigð athöfn feli í sér eðlislæga röskun." [142] Hún stríðir gegn náttúrulögmálinu. Hún útilokar að kynlífið kveiki nýtt líf. Hún sprettur ekki af sannri gagnkvæmri fyllingu, tilfinningalegri og kynferðislegri. Hana má ekki undir nokkrum kringumstæðum viðurkenna.

2358. Þeir karlar og konur sem hafa djúpstæða samkynhneigð er ekki lítill hópur. Þessi tilhneiging, sem á hlutlægan hátt er röskun, er fyrir flest þeirra erfið raun. Þau ber að umgangast af virðingu, samúð og nærgætni. Sérhverja tilhneigingu til óréttmætrar mismununar gagnvart þeim ber að forðast. Þau eru kölluð til að uppfylla vilja Guðs í lífi sínu og, ef þau eru kristin, að sameina þá erfiðleika, sem skapast vegna ástands þeirra, fórn Drottins á krossinum.

2359. Samkynhneigðar persónur eru kallaðar til hreinlífis. Með dyggð sjálfsögunar, sem kennir þeim innra frelsi, og stundum með stuðningi ósérplæginnar vináttu, með bænum og sakramentislegri náð, geta þær og eiga þær að ná smám saman og af öllum hug tökum á kristinni fullkomnun.

Þarna er talað um samkynhneigð á mjög neikvæðum nótum, til dæmis sem alvarlegri siðspillingu og eðlislægri röskun sem stríðir gegn náttúrulögmálinu. Jón Hagbarður var einfaldlega að tjá þá trú sem trúfélagið hans boðar.

Hver er tilgangurinn með því að kæra meðlim trúfélags, fyrir að endurtaka það sem hann hefur lært hjá kirkjunni sinni, en láta trúfélagið í friði?

Biblían

Í trúfræðsluritinu er sagt að kaþólska kirkjan styðjist við biblíuna varðandi samkynhneigð.Því er ekki hægt að andmæla. Í biblíunni er nefnilega sagt að það eigi að drepa homma sem stunda kynlíf:

Og leggist maður með karlmanni sem kona væri, þá fremja þeir báðir viðurstyggð. Þeir skulu líflátnir verða, blóðsök hvílir á þeim. (3.Mós 20:13)

Ef það er hatursáróður að segja að samkynhneigð sé ónáttúruleg og óeðlileg, er þá ekki enn verri hatursáróður að segja að það eigi að taka homma af lífi?

Að ráðast bara gegn burðardýrum

Af hverju er verið að kæra áhrifalausan einstakling eins og Jón Hagbarð? Væri ekki nær að kæra Hið Íslenska Biblíufélag og kaþólsku kirkjuna. Jón Hagbarður er bara burðardýr, Kaþólska kirkjan og Hið íslenska biblíufélag eru höfuðpaurar.