Halldór, skopmyndateiknari Fréttablaðsins, birti um daginn frábæra teiknimynd sem bendir á hversu mikið frjálslyndir trúmenn endurrita guð biblíunnar. Samkvæmt þeim er guð bara algert krútt, vingjarnlegur félagsráðgjafi sem gerir ekki flugu mein. Ríkiskirkjupresturinn Sigurvin Lárus Jónsson fjallaði um þessa teiknimynd í predikun og staðfesti í raun teiknimynd Halldórs.
Í predikuninni fjallaði Sigurvin um eina af dæmisögum Jesú. Hún fjallar um þrælaeiganda sem er ekki heima hjá sér sem mun svo refsa þrælum sínum ef þeir hegða sér illa í fjarveru hans. Suma þræla sína mun hann "höggva og láta fá hlut með ótrúum", aðra mun hann "berja mörgum höggum" og enn aðrir verða "barnir fáum höggum".
Af samhengi textans er augljóst að endurkoma þrælaeigandans vísar til endurkomu Jesú og þessar ýmsu refsingar vísa til hvernig guð og Jesú munu refsa fólki við heimsendi. Ekki beinlínis falleg dæmisaga um heimsendi og helvíti.
Einhvern veginn getur Sigurvin samt lesið úr þessari sögu að hún fjalli um "kærleika Guðs".
Guð dæmisögunnar er ofbeldisfullur guð sem refsar fólki grimmilega við heimsendi. Guð Sigurvins er það ekki. Mér þætti heiðarlegra hjá honum að afneita einfaldlega dæmisögunni og fordæma hana sem rugl.
Þess í stað reynir hann að "éta kökuna og halda henni" og rembist við að lesa krúttlega félagsráðgjafann inn í þessa dæmisögu.
Þetta er hluti af stærra vandamáli frjálslyndra presta. Guð Jesú og Nýja testamentisins er einfaldlega ekki krúttguð. Það er fullt af textum í Nýja testamentinu um heimsendi, helvíti og guð sem refsar fólki og beitir ofbeldi.
Viðbrögð prestanna eru svo þau að þegja um þessa texta eða beita ævintýralegum túlkunarfimleikum til þess að reyna einhvern veginn að samræma þessa texta við krúttguðinn sinn.
Sýnið viðbrögð, en vinsamlegast sleppið öllum ærumeiðingum. Einnig krefjumst við þess að fólk noti gild tölvupóstföng, líka þegar notast er við dulnefni. Ef það sem þið ætlið að segja tengist ekki þessari grein beint þá bendum við á spjallborðið. Þeir sem ekki fylgja þessum reglum eiga á hættu að athugasemdir þeirra verði færðar á spjallborðið.
Hægt er að nota HTML kóða í ummælum. Tög sem virka eru: a href, b, i, u, br, p, strong, em, ul, li og blockquote. Einnig er hægt að notast við Markdown rithátt í athugasemdum. Notið skoða takkann til að fara yfir athugasemdina áður en þið sendið hana inn.