Afhjúpun Arnar Bárðar

Hér á Vantrú birtist fyrir stuttu aðsend grein frá Halldóri Loga Sigurðarsyni þar sem hann tók saman ýmsar tilvitnanir í séra Örn Bárð Jónsson og sýndi fram á að presturinn virðist skipta full ört um skoðun og eins að hann á það til að lýsa viðhorfum sem endurspegla hvorki kærleikann eða umburðarlyndið sem stundum er sagt einkenna kristna trú.

Greinin var óvægin og virðist hafa farið fyrir brjóstið á Erni Bárði. Þegar Halldór Logi ætlaði sér svo að gera athugasemd við predikun Arnar sem birtist á netinu brá svo við að í stað þess að hleypa henni í gegn sendi presturinn Halldóri ansi einkennilegan tölvupóst.

Tölvupósturinn innihélt heimilisfang og símanúmer Bráðamóttöku Geðdeilar Landspítalans auk leiðarkorts.

Þessi taktík, að birta ekki athugasemdir opinberlega og rökræða þar heldur svara þeim annað hvort með tölvupóstum eða bara hreinlega hunsa þær, er ekki ný af nálinni hjá Erni Bárði. Hún er reyndar furðu algeng hjá prestum. Þegar umræðan verður erfið finnst þeim betra að færa hana frá hinu opinberlega og yfir til þess persónulega. Í svokallaðri afsökunarbeiðni Arnar Bárðar sem nánar verður vikið að hér á eftir kemur ennfremur fram að Örn Bárður óskaði eftir því að hitta Halldór Loga augliti til auglits. Þetta eru heldur engin nýmæli.

Miðað við hvað Örn Bárður leyfir sér í persónulegum samskiptum í gegnum netið, er þá einhver ástæða til þess að ætla að hann sé málefnalegri í eigin persónu? Værir þú ágæti lesandi áfjáður í að hitta mann, sem svarar réttmætri athugasemd þinni með því að vísa þér á geðdeild, augliti til auglits til þess að ræða málin?

„Afsökunarbeiðni“ Arnar Bárðar er svo einhver fróðlegasta lesning sem rekið hefur á fjörur landans lengi. Hún er fróðleg af því að hún er afhjúpandi. Í henni byrjar presturinn á því að gera trúleysingjum enn einu sinni upp öfgatrú og ofstæki sem á að útskýra af hverju hann hélt fyrst að athugasemd Halldórs um kvilla og sjúkdóma væri beint að sér. Þessi útskýring heldur ekki vatni einfaldlega af því að það var augljóst hvert samhengi athugasemdar Halldórs var.

Lokaorðin í yfirlýsingunni eru áhugaverðust og mest afhjúpandi:

Ég biðst að sjálfsögðu afsökunar og fyrirgefningar á að hafa ekki gengið úr skugga um að viðmælandi minn á vefnum væri lögráða og þar með myndugur viðmælandi.

Örn Bárður biðst ekki afsökunar á því að hafa vísað viðmælandi sínum á geðdeild. Hann biðst afsökunar á því að hafa ekki athugað hvort viðmælandinn væri lögráða. Halldór er svo afgreiddur sem ómyndugur viðmælandi vegna aldurs síns. Það er áhugavert. Það stríðir reyndar gegn t.a.m. Barnasáttmála SÞ að afgreiða skoðanir barna sem ómerkar vegna aldurs þeirra. En fyrst og fremst sýnir það auðvitað vanvirðingu Arnar Bárðar fyrir skoðunum þeirra sem ekki eru sammála honum.

ps. Ef „tæplega“ 16 ára einstaklingar eru ekki myndugir viðmælendur að mati séra Arnar Bárðar má þá búast við því að hann beiti sér fyrir því að ríkiskirkjan hætti að ferma 13 og 14 ára ómynduga einstaklinga?