Mótmæli við Hallgrímskirkju

Laugardaginn 5. júní klukkan tvö ætlar hópur manna að safnast saman við Hallgrímskirkju til að krefjast aðskilnaðar ríkis og kirkju. Vantrú fagnar þessu framtaki en á engan þátt í því, svo heiðvirðir borgarar geta óhræddir tekið þátt.

Á Facebook-síðu hópsins segir.

ÞJÓÐKIRKJAN SITUR VIÐ FEITT BORÐ MEÐAN AÐRAR DEILDIR RÍKISINS SVELTA:

Prestar og ráðamenn Þjóðkirkjunnar hafa síhækkandi ofurlaun meðan skorið er herfilega niður hjá skólum, lögreglu og spítölum. Við höfum ákveðið að nú er komið nóg!

Nú verður að mótmæla!!

Kröfur okkar eru eftirfarandi:

1 Að hinir fjölmörgu Íslendingar sem fara aldrei í kirkju eða hof (kristnir, trúlausir, sem og fólk af öðrum trúarbrögðum og lífsskoðunum) þurfi ekki að borga "sóknargjöldin"... sem eru í raun aukaskattur til trúarstofnana, sem allir þurfa að borga hvort sem þeir sækja skipulagðar trúarathafnir eða ekki.

2 Að raunverulegur aðskilnaður ríkis og kirkju fari fram - að Þjóðkirkjan sjái um eigin fjáröflun, eins og allar aðrar kirkjur á Íslandi og næstum allar aðrar kirkjur í heiminum!

3 Að engin lagaleg mismunun eigi sér stað milli trúfélaga og hópa fólks sem fjalla um annað en trúarbrögð.

4 Að tengls milli Þjóðkirkju og ríkissjóðs verði rofin. Þjóðkirkjan fær nú marga milljarða á ári úr ríkissjóð UMFRAM sóknargjöldin (sem nema líka milljörðum króna á ári).

Samskonar mótmæli verða við Akureyrarkirkju á sama tíma og ath:

Boðið verður í öllum mótmælum upp á skráningu úr Þjóðkirkjunni fyrir þá sem vilja.