Ríkiskirkjan staðfestir mismunun

Gærdagurinn var áhugaverður fyrir áhugafólk um trúmál á Íslandi.

Hæstiréttur staðfesti í úrskurði sínum að hin evangelíska Lútherska Þjóðkirkja er réttnefnd Ríkiskirkja. Við í Vantrú höfum notað þetta heiti í mörg ár og það er því ágætt að fá staðfestingu frá Hæstarétti um að þessi nafngift er rétt. Í dómi hæstaréttar í máli Ásatrúarfélagsins gegn ríkinu segir m.a. að prestar þjóðkirkjunnar séu opinberir starfsmenn með réttindi og skyldur sem slíkir gagnvart öllum almenningi.

Við mælum með því að fólk temji sér að nota þetta heiti þar til ástandið hefur breyst til batnaðar hér á landi og ríki og kirkja verða sannarlega aðskilin.

Ríkiskirkjan fjallaði í gær um hjónabönd samkynhneigðra á kirkjuþingi. Niðurstaðan var sú að íhaldssamur armur biskups vann fullnaðarsigur. Kirkjan neitar að tala um giftinu samkynhneigðra sem hjónaband og áskilur prestum rétt til að mismuna samkynhneigðum ef þeir kjósa þrátt fyrir að hæstiréttur tali um skyldur þeirra gagnvart öllum almenningi.

Karl biskup hefur lagt mikla áherslu á að þetta mál byggist á því að ná sátt innan kirkjunnar og sagði orðrétt í umræðum; "sátt byggist á því að aðilar sem takast á mætist á miðri leið". Þessi orð biskups eru afskaplega áhugaverð því þarna upplýsir hann alþjóð óvart um skoðun sína. Sáttin er nefnilega mitt á milli þess að viðurkenna hjónabönd samkynhneigðra og þess að útiloka þá alveg. Sáttin er á miðri leið. Það er alveg ljóst að meðal þeirra sem standa hinum megin á vellinum og toga sáttina frá fullum mannréttindum er biskup Íslands og svartstakkar hans. Verum ekki með neitt hálfkák, biskupinn lítur niður á homma og lesbíur. Sáttin var ekki meiri en svo að gera þurfti hlé á umræðum til að hægt væri að plotta bak við tjöldin og talsmaður þeirra sem vildi hætta að mismuna samkynhneigðum brast í grát, eflaust eftir að hún uppgötvaði að sáttin var ekki fyrir hana heldur fordómapúkana. Sumir frjálslyndir prestar benda á að það sé aldrei hægt að tala um sátt um óréttlæti.

Það var áhugavert að fylgjast með því hvernig spunnið var úr þessum fréttum í fjölmiðlum í gær. Sumir fjölmiðlar, sérstaklega Ríkissjónvarpið og Morgunblaðið virtust reyna að matreiða fréttir af þessu á sem jákvæðastan hátt fyrir Ríkiskirkjuna. Sumir fulltrúar kirkjunnar reyna jafnvel að halda því fram að með þessu hafi kirkjan náð forskoti í þessum málum.

Staðreyndin er að í gær gerðist ekkert fyrir utan að Ríkiskirkjan staðfesti að hún ætlar sér ekki að líta á hjónaband samkynhneigðra með sömu augum og hjónaband gagnkynhneigðra. Þessi ríkisstofnun ætlar að halda áfram að mismuna þegnum landsins út frá kynhneigð. Einhverjir fulltrúar kirkjunnar reyna að halda því fram að nú sé boltinn hjá ríkinu. Staðreyndin er sú að ef ekki væri fyrir mótmæli Ríkiskirkjunnar hefði breytingartillaga Guðrúnar Ögmundsdóttur við frumvarp um staðfesta samvist komist í gegn og trúfélög hefðu fengið réttindi til að gefa saman samkynhneigð pör. Biskup Íslands var meðal þeirra sem mættu fyrir alþingisnefnd og mótmæltu því harðlega að trúfélög fengju þessi réttindi.

Ungir sjálfstæðismenn í Heimdalli sendu frá sér ályktun í vikunni þar sem þeir hvetja stjórnvöld til að "aðskilja ríki og kirkju að fullu þannig að kirkjan starfi jafnréttisgrundvelli líkt og önnur trúfélög". Við fögnum þessari ályktun og tökum undir með Heimdalli.

Að lokum vil ég hvetja þá sem eru ósammála Ríkiskirkjunni í þessu máli að segja sig úr henni ef þeir hafa ekki þegar látið verða af því. Með því að vera skráður meðlimur í þessa kirkju eruð þið í raun að lýsa yfir velþóknun ykkar með þessa ákvörðun og annað sem hún stendur fyrir. Sækið eyðublað á heimasíðu Þjóðskrár, fyllið það og út sendið með faxi (s. 569 2949) eða skutlist með það í Borgartún 24. Með lítilli fyrirhöfn getið þið sent sterk skilaboð.