Lesið í ljósi Krists

Þegar trúmönnum er bent á eitthvað af þeim mörgu hræðilegu illvirkjum sem guðinn þeirra, hinn grimmi Jahveh, framdi í Gamla testamentinu, þá er svarið oftar en ekki það að þessi fjöldamorð og þjóðernishreinsanir verði að lesa í “ljósi Krists”.

Nú skil ég ekki alveg hvernig eitthvað sem guð gerir á þriðjudegi á að réttlæta fjöldamorð sem hann framkvæmdi á mánudegi, en kristnir menn halda því virkilega fram að allt ógeðið í Gamla testamentinu batni svakalega við það að skoða það með því að hafa boðskap, dauða og upprisu Jesú í huga við lestur Gamla testamentisins, svona svipað og að lesa um Helförina með það í huga að Hitler lagði grunninn að þýska hraðbrautakefinu. Reyndar á þetta ljós Krists að gera öll þessi illvirki það bærileg að kristið fólk tilbiður þennan guð og segir að hann sé algóður.

En hvað um það, prófum að lesa alræmdan kafla úr Gamla testamentinu með hliðsjón af því sem við fáum að vita um guð í Nýja testamentinu. Hérna segir frá því er guð kristinna manna myrðir alla frumburði Egyptalands:

Önnur Mósebók 12:29-30 Um miðnæturskeið laust Drottinn alla frumburði í Egyptalandi, frá frumgetnum syni Faraós, sem sat í hásæti sínu, allt til frumgetnings bandingjans, sem í myrkvastofu sat, og alla frumburði fénaðarins. Þá reis Faraó upp um nóttina, hann og allir þjónar hans, og allir Egyptar. Gjörðist þá mikið harmakvein í Egyptalandi, því að ekki var það hús, að eigi væri lík inni.

Þarna sést vel hve miskunnarlaus guð kristinna manna er, þrátt fyrir að Faraó einn hafi ákveðið að neita Ísraelsmönnum um brottfararleyfi, þá refsar guð öllum íbúum Egyptalands. Ekki nóg með það, heldur refsar hann líka skynlausum skepnum. Þar með er samt ekki öll sagan sögð, því áður en guð kristinna manna drap frumburðina þá kom hann sjálfur í veg fyrir að Faraó gæfi Ísralesmönnum leyfi til þess að fara með því að “herða hjarta Faraós”..

Önnur Mósebók 11:10 En Drottinn herti hjarta Faraós, og ekki leyfði hann Ísraelsmönnum að fara burt úr landi sínu.

Ég efast um að nokkur trúmaður trúi því virkilega að þetta hafi ekki verið illverki vegna þess að Jesús á að hafa læknað fólk eða lifnað við. Gerði guð virkilega ekkert rangt þegar hann framdi þessi fjömdamorð vegna þess að Jesús sagði að þú ættir að elska náungann eins og sjálfan þig?

En samt notar kristið fólk þessa ónothæfu afsökun? Hvers vegna ætli það sé?

Ef til vill gæti ástæðan verið sú að ef það þyrfti að koma með almennilega afsökun, þá hefði það enga afsökun fyrir guð. Hugsanlega væri hægt að segja að þetta hefði alls ekki verið guð, en því fylgir auðvitað sá ókostur að nánast Gamla testamentið, og hugsanlega eitthvað af því nýja, þarf að fara beint í ruslafötuna þar sem sköpunarsagan hvílir. Með því myndu auðvitað nánast allir hinir meintu spádómar um Jesús enda á ruslahaugunum og hugsanlega eitthvað af sögunum um Jesú líka. Þetta er óásættanlegt fyrir trúmenn og því er miklu þægilegra að segja þennan innantóma frasa “Þú verður að lesa þetta í ljósi Krists” í staðinn fyrir að horfast í augu við það að guðinn þeirra er illmenni.