Þetta mátti lesa í Fréttablaðinu í dag: Séra Þórhallur Heimisson: Varar fólk við að trúa öllu
Séra Þórhallur Heimisson, prestur í Hafnarfjarðarkirkju, segir að margt sé gott við óhefðbundnar lækningar en þó sé rétt að fara varlega og trúa ekki öllu. "Góð bæn er betri en margt annað en stundum er reynt að plata mann. Þeir sem eru langt leiddir af sjúkdómum eru kannski viðkvæmir fyrir og leita leiða sem kosta mikið. Það er mínus."
Núna er hart barist á markaðnum á milli bænalækninga guðfræðinga og nýaldargúrúanna. En bænir eru bara ein birtingarmynd skottulækninga af sama toga og dna heilun.
Þrátt fyrir að ég hafi mínar efasemdir um hómópatíu þá verð ég að viðurkenna að ég hef meiri trú á því að drekka jurtaseiði, nota jurtasmyrsl og svo framvegis en að biðja bænir. Það er engin leið að afneita því að í mörgum jurtum eru virk efni sem auka mótstöðu gegn hinum og þessum sjúkdómum, slá á ýmsa kvilla, stilla verki, hafa róandi áhrif og svo framvegis.
Í sumum tilfellum væri sennilega gott læknisráð að drekka seiði af blóðbergi, maula gingsen eða reykja hass, en ég hef bara heyrt mjög trúað fólk halda því fram að bænir séu vænleg leið til árangurs í baráttu við sýkla og veirur.
Bænin kostar ekkert. Þú þarft ekki að hrópa hana á torgum úti. Enginn þarf að vita af henni nema þú og Guð.
Það kostar heldur örugglega ekki neitt að tala við stofnfrumuna þína og/eða alheimsvitundina.
En það kostar að halda uppi sérfræðingi í samskiptum við ímyndaðar verur, hvort sem það er Jehóva eða alheimsvitund.
Sem betur fer þurfum við ekki á sérfræðing að halda til að geta beðið til Guðs og til að eiga samskipti við Guð. Guð getur talað til okkar á mismunandi hátt en besta leiðin til að skilja vilja Guðs er að lesa biblíuna og rækja samfélag við aðra trúaða. Biblíuna má t.d. nálgast á netinu: biblian.is.
Mun maður ekki verða ásakaðir um hentisemi þegar kemur að því að vitna í biblíuna ýmislegt sem stangast svívirðilega á við hinn svokallaða kærleiksboðskap sem á að fyrirfinnast í þessu ritgerðasafni?
Enginn mun ásakaður sem iðrast synda sinna og biður Guð um fyrirgefningu. "Því að af náð eruð þér hólpnir orðnir fyrir trú. Þetta er ekki yður að þakka. Það er Guðs gjöf." Hvar finnst meiri kærleikur en einmitt í þessum orðum. Okkur hórkörlum, morðingjum, lygurum og öðrum syndaselum er gefin upp sökin bara fyrir það að trúa og iðrast. Hvílík náð! Hvílíkur léttir!
Sem betur fer þurfum við ekki á sérfræðing að halda til að geta beðið til Guðs og til að eiga samskipti við Guð.Ég er viss um að heilarinn segir það sama um stofnfrumuna.
En þetta sérfræðingatal er frekar fyndið í ljósi þess að það er til sérfræðingastétt sem segist eiga miklu betri samskipti við guð.
Síðan finnst mér það ekki mjög kærleiksríkt að kvelja fólk eilíflega. Manstu ekki eftir þeim ritningastöðum?
Ég hef ekki heyrt um þessa sérfræðingastétt sem þú minnist á. Ef þú ert að tala um presta þá er ég viss um að þú ert að misskilja eitthvað í þeirra boðskap. Enginn getur stært sig af því að eiga betri samskipti við Guð en einhver annar.
Ég man eftir þeim ritningastöðum sem þú minnist á. Við getum öll valið um það hvort við viljum þekkja Guð eða ekki. Ef við veljum að þekkja hann ekki og snúum okkur frá honum. Af hverju ætti hann þá að vilja þekkja okkur á hinsta degi. Það er ekki mikið sem hann fer fram á til að forða okkur frá eilífum kvölum, ein bæn er nóg.
Það er ekki mikið sem hann fer fram á til að forða okkur frá eilífum kvölum, ein bæn er nóg.
Hverskonar siðleysingi fer fram á eitthvað til að forða fólki frá eílífum kvölum? "Neinei, ef þú ferð ekki á hnén fyrir framan mig skaltu bara kveljast það sem eftir er"! Á þessi gæji ekki að vera góður?
Þetta er einmitt eitt af því (fyrir utan rökstuðningsþáttinn) sem fælir mig mest frá kristinni trú: hví ætti ég að tilbiðja hégómagjarnan Guð?
Lokað hefur verið fyrir athugasemdir við þessa færslu. Við bendum á spjallið ef þið viljið halda umræðum áfram.
Hnakkus - 12/11/05 15:36 #
Séra Þórhallur er ekki bara nauðlíkur Jóni Gnarr...hann er líka jafn fyndinn.