Séra Hallgrímur eða Bobby Fischer

Það hefur verið athyglisvert að fylgjast með hvernig menn hér á landi hafa rætt yfirgengilegt tal Fischer gegn Gyðingum. Allir fordæma ummæli hans eða jafnvel tala um að maðurinn verði að fá ákæru fyrir bullið.

Fyrir stuttu lauk lestri Passíusálma séra Hallgríms Péturssonar í útvarpi. Í þeim sálmabálki eru Gyðingar útataðir með öllum hugsanlegum meðulum enda telur Hallgrímur þá hafa drepið son guðs, sjálfan Jesú Krist. Þessi endalausi áróður kirkjunnar manna í Evrópu kostuðu á endanum milljónir Gyðinga lífið. Allt frá tímum rannsóknarétta og krossferða til þriðjaríkis Hitler. Ekki má gleyma hlut Lúters, læriföður Þjóðkirkjunnar og séra Hallgríms, sem skrifaði sérstaka bók til höfuðs Gyðingum.

Þegar ég gagnrýndi hatursáróður séra Hallgríms í sálmunum þá stökk fjöldi manna upp á nef sér og afsakaði Saurbæjarklerkinn með því að segja að hann ætti við valdhafa Gyðinga en ekki alla Gyðinga. Þessi afsökun var ekki sannfærandi enda þekkti víðförull Hallgrímur vel til Gyðinga bæði í Kaupmannahöfn og Þýskalandi auk þess sem konan hans var hin víðförula Tyrkja-Gudda. Svo undarlega vill til að sama fólk (fjöldi guðfræðinga) og afsakaði séra Hallgrím hefur ekki haft sig í frammi fyrir gyðinginn Bobby Fischer. Það er ekki sama hvort að áróðurinn komi frá Jóni eða séra Jóni.