Allar færslur Allir flokkar Sos Um félagið Úrskráning Lógó Spjallid@Vantru Póstfang Vantru@Facebook Vantru@Youtube Vantru@Twitter

Í hvað er Fréttablaðið að breytast?

Maður flettir varla lengur Fréttablaðinu öðruvísi en það sé allt útbíað í prestum og ljúgandi fermingarbörnum.

Já, ég sagði ljúgandi fermingarbörnum. Fermingin er eitthvert mesta hræsnissukk sem fyrirfinnst. Það er í raun umhugsunarvert að þjóðkirkjan skuli stuðla að öllum þessum óheiðarleika í röðum ómótaðra skólakrakka. Og það er ábyrgðarhluti að með þessu athæfi sínu sé þessi sama kirkja að kalla óheyrileg fjárútlát yfir heimilin í landinu.

Þetta er mikið samfélagsmein.

Fréttablaðið á föstudag: Ung stúlka segist hafa ákveðið að verða kristin, eftir að hafa lært Biblíusögur í skólanum. "Ég ákvað bara sjálf í haust að verða kristin manneskja og fylgja bekkjarsystkinum mínum til spurninga í vetur," segir hún. Af hverju akkúrat í vetur? Getur verið að veisla, gjafir og hópþrýstingur skipti þarna einhverju? Eða var það kannski gegndarlaus áróður kirkjunnar í skólakerfinu sem plantaði þessum vírus í hausinn á henni?

Tvíburasystur fermast saman. "Flest fermingarbörn vilja fá peninga og það viljum við líka." Reyni svo einhver að halda því fram að þær séu ekki að láta kaupa sig til þessara hluta. Hvílíkt hórerí!

Einn pilturinn valdi Flórídaferð frekar en veislu. Sniðugt hjá honum. En myndi hann fermast ef honum stæði hvorugt til boða?

Ólafur Benediktsson hjá Dúni og fiðri segir fermingarbörn kröfuhörð á alvöru sængur. Ætlar einhver að segja mér að það sé ekki græðgi sem stjórnar börnunum? Þannig var því að minnsta kosti háttað með sjálfan mig og flesta jafnaldra mína. Ég ætti því nokkurn veginn að vita hvað ég er að tala um.

Græðgin er auðvitað eðlilegur partur af sálarlífi fjórtán ára unglinga í allsnægtalandi. Viðbjóðurinn felst í því að etja þessum bólugröfnu aurapúkum út í að játa á sig Krosslaf og himnadraugana fyrir veislu og peninga. Og sökin er ekki síst hjá þeim sem presentera þetta með stöðugu og yfirþyrmandi áreiti á landslýð eins og þetta sé eðlilegasti hlutur í heimi.

Hvað fær Fréttablaðið til að leggja gagnrýnislaust þessa ofuráherslu á guða- og Jesútal presta og fermingarbarna? Hafa einhver viðtöl birst við aðstandendur og fermingarbörn borgaralegrar fermingar, eða er Gunnar Smári kominn í samkeppni við Moggann um að vera sérleg málpípa Þjóðkirkjunnar?

Hvar er nú hin gagnrýna hugsun blaðamannsins?

Birgir Baldursson 28.03.2004
Flokkað undir: ( Hugvekja )

Viðbrögð


Aiwaz (meðlimur í Vantrú) - 28/03/04 11:19 #

Hvað fær Fréttablaðið til að leggja gagnrýnislaust þessa ofuráherslu á guða- og Jesútal presta og fermingarbarna?

Tja, t.d. 10 milljóna króna auglýsingatekjur af fermingarhandbókinni? :o) Bottomlænið er að fermingar snúast um pening, frá A - Ö.

93


Úlfurinn - 29/03/04 08:48 #

"Money,money,money, sweet as honey, its a rich man´s world"


Daníel - 29/03/04 12:33 #

Getur verið að viðhorf fólks til kirkjunnar á fullorðinsárum mótist talsvert af þessari reynslu. Þ.e.a.s. að það hafi verið blekkt til að láta ferma sig, mútað í rauninni, sem óhörðnuðum unglingum og finnist það svikið? Hvað á fólk að halda þegar að í fyrsta sinn sem kirkjan sýnir þeim áhuga þá er það með þessum hætti?


Guðjón Ólafur Eiríksson Öfjörð - 29/03/04 18:45 #

Ég hef tekið eftir þessu í Fréttablaðinu og mörgum öðrum fjölmiðlum. Nánast allir fjölmiðlar landsins hafa gagnrýnislaust fjallað um fermingar (á mjög jákvæðann pro-ferminga hátt) og nánast hvatt til þeirra. Fjölmiðlar ættu að vekja fólk til umhugsunar en ekki hvetja það til að fylgja öðrum eins og sauðir.


Malla - 30/03/04 09:25 #

Heyr heyr! Það er ósvífið af blöðunum að blanda sér í slíkan saurlifnað. Þegar ég las þetta blað þá fékk ég snert af viðbjóði. Fyrir utan það að ég skil ekkert í því hvaða þörf fermingarbörn hafa skyndilega fyrir dúnsængur... Réttast væri að stingga þeim öllum í gamla svefnpoka fyrir athæfið!


Árni Árnason - 30/03/04 14:27 #

Þessi svokölluðu fermingarblöð dagblaðanna eru gefin út með eitt, og aðeins eitt markmið. Að selja auglýsingar.

Þau, eins og allt apparatið, leggjast gersamlega marflöt, til að þjóna peningagræðginni.

Ef einhver þeirra sýndi þó ekki væri nema snefil af gagnrýninni hugsun á þessa múgsefjun er hætta á að heiladrmyndin hryndi, og þessvegna er betra að spila bara með.

Með því að halda þeirri klisju við að allir eigi að fermast, er ekkert eðlilegra en að fermingartölvur og fermingarstereogræjur fylli auglýsingasíðurnar. Það er alveg sama hvert litið er allt þjónar þetta peningahagsmunum. Prestar sem sjálfir taka peninga fyrir ferminguna og græða vel, eiga ekki hægt um vik að gagnrýna peningaflóðið í kring um fermingarnar, og fjölmiðlar launa þeim með því að fjalla um ferminguna með þessum hætti.

Enginn þorir að opna munninn yfir þessari þvælu þar sem allir óttast að tapa spón úr aski sínum.

Sukkið og bruðlið heitir að gera sér glaðan dag, og gera fermingardaginn eftirminnilegan, og þar má enginn liggja á liði sínu.

Maður gæti gubbað yfir þessari hræsni og yfirdrepskap.


Satan - 30/03/04 21:17 #

Ég er innilega sammála öllum ofangreindum. Kyrkjan er að kaupa ungt fólk. Ef aungvar væru gjafirnar þá myndu krakkarnir ekki ferma sig.


jogus (meðlimur í Vantrú) - 30/03/04 22:02 #

Ég held reyndar að það myndu alltaf einhverjir krakkar láta ferma sig. En það væri þá líka af "réttum" forsendum.

Auðvitað væri langeðlilegast að flytja "fermingaraldurinn" upp, td í 18 ár og breyta forminu að einhverju leyti (td að þú þyrftir að sækja um að fermast líkt og að gifta þig, og að þú gætir fermst hvenær sem er ársins). Engin athöfn, ekkert prjál, engar gjafir, engin veisla. Þá myndu hinir sanntrúuðu sauðir mæta fljótlega eftir afmæli og fermast, en afgangurinn, hinn stóri meirihluti árgangsins, sitja heima. En kirkjan er víst að græða á þessu, og meðan svo er verður þessu varla breytt.


Ormurinn - 04/04/04 17:26 #

Hvaða æsingur er þetta? Auðvitað vilja blöðin selja auglýsingar og kaupmenn selja vörur.

Ég efast ekki um að fermingarbörn fermist til að falla inn í normið og til að fá gjafir og peninga. En einnig verða menn að gera sér grein fyrir því að meirihluti Íslendinga trúir að þeir séu trúaðir og því eðlilegt að þeir láti fermingu yfir sig ganga. En annars dettur engum heilvita manni í huga að gjafageðveikin sem heltekur langflesta fyrir jól hafi eitthvað með kristið hugarfar fólks að gera.

Hinsvegar væri það mikið áfall fyrir kaupmannastétt (og þjóðfélagið í heild) ef þessi efnahagsinnspíting sem fermingar (og jól) eru myndu falla niður.

Annars kom Davíð Þór með góðan punkt í útvarpsþætti sínum Smúlnum hérna um árið. Þar vabeindi hann smúlnum að prestum sem skýra börn á ferminaraldri til þess eins að þau geti látið ferma sig viku seinna og staðfest það sem þau voru að staðfesta viku áður. Það er hræsni og peningaplokk!


Birgir Baldursson (meðlimur í Vantrú) - 04/04/04 20:12 #

Hvaða æsingur er þetta? Auðvitað vilja blöðin selja auglýsingar og kaupmenn selja vörur.

Segðu Davíð Þór það, hann kallar kaupmennina "vonda kapítalista" í DV í gær.

Ég efast ekki um að fermingarbörn fermist til að falla inn í normið og til að fá gjafir og peninga.

Ég er einmitt að gagnrýna kirkjuna fyrir að hvetja til slíkrar hræsni. Og Fréttablaðið fyrir að ganga til liðs við hana.


Birgir Baldursson (meðlimur í Vantrú) - 05/04/04 15:06 #

En annars dettur engum heilvita manni í huga að gjafageðveikin sem heltekur langflesta fyrir jól hafi eitthvað með kristið hugarfar fólks að gera.

Það er einmitt annað mikið samfélagsmein. Við fáum að hverju ári fregnir af fólki sem ekki getur slegið upp jafnmikillí dýrð og næsti maður. Börnin, sem endalaust eru í gjafametingi, líða sum hver fyrir þetta og mæðurnar standa í biðröðum hjá mæðrastyrksnefnd eða þurfa að leita til heilbrigðisþjónustunnar með ofþreytu sína.

Bæði jól og fermingar eru skefjalaus standpínukeppni heimilanna. Ömurlegt er til þess að vita að þjóðkirkjan skuli etja fólki út í þetta í stórum stíl.

Lokað hefur verið fyrir athugasemdir við þessa færslu. Við bendum á spjallið ef þið viljið halda umræðum áfram.