Allar færslur Allir flokkar Sos Um félagið Úrskráning Lógó Spjallid@Vantru Póstfang Vantru@Facebook Vantru@Youtube Vantru@Twitter

Í klóm ríkisrekins Krists

a_hallgrimsk.gif

Þau sem hafa lesið biblíuna með gagnrýnni hugsun verða þess fljótt áskynja að bókin er illa ígrunduð og siðlaus. Ríkiskirkjan hefur því gríðarlega hagsmuni af því að gera biblíuna að sannleik því annars væri kirkjan sjálfdauð. Í þau fáu skipti sem ég neyðist til að mæta í kirkjuathöfn þarf ég að vara mig á að springa ekki úr hlátri þegar prestar reyna með klókindum að laumast fram hjá skelfilegum texta Biblíunnar, eða upphefja heimskulega vitleysu í hæstu hæðir sem djúpvitra lífsspeki. Sannarlega reynir kirkjan allt til að halda haus í nútíma samfélagi.

Segja má að niðurrif eðlilegrar siðferðiskenndar og rökhugsunar hefjist með barnastarfi ríkiskirkjunnar, þar sem trúgirni barna er nýtt út í óendanleikann. Á einhvern ótrúlegan hátt þykir kristnu trúfólki eðlilegt að kenna börnum að hryðjuverk gegn frumburðum Egypta hafi verið réttlætanleg til að frelsa þjóð Móse. Að guð hafi með Nóaflóðinu réttilega drepið börn vegna þess að foreldrarnir hafi lifað í synd. Að guð var svo góður að krossfesta son sinn til að við öll verðum ódrepandi. Svona má endalaust telja upp siðleysi og grimmd sem ríkiskirkjan treður upp á börn sem eðlilega hegðun algóðs og alviturs guðs eingöngu til að viðhalda tilveru sinni.

Þegar börn komast til vits og ára uppfull af skemmdri siðfræði og yfirnáttúrudýrkun eru þau látin þamba blóð og éta hold guðsins til að komast í söfnuð hinna fullorðnu. Þegar svo er komið er fokið í flest skjól og fátt til bjargar, því á þeirri stundu hafa fermingarbörnin fengið á sig asnaeyru kirkjunnar. Þau eru svo föst að biskupinn getur ekki afskírt og tekið þau af fórnarlömbunum. Með fermingarathöfninni eru unglingar á mótunarskeiði þannig látnar kvitta undir vitleysuna, fjárausturinn og ruglið sem fylgir kirkjuveldinu á Íslandi. Þegar svo er komið þá er ekki aftur snúið því viðhafnarhýsillinn hefur þannig fjárfest í vitsmunum, virðingu og veraldlega í lífi og starfi hvers Íslendings.

Ef biskupinn réttilega lýsti því opinberlega yfir að öll yfirnáttúra og kristni sé lygi myndi veröldin hrynja yfir hundruði starfsmanna kirkjunnar. Landsmenn myndu sjá að þeir hafi verið hafðir að fíflum. Augljóst væri að hrikalegar fjárhæðir sem mældust í hundruðum milljarða hafi verið hent á glæ í formi bygginga og viðhafnarlifnaðar útvaldra. Með því að hafa tilvistarhagsmuni sína svo mikla hefur ríkiskirkjan gert allar breytingar í réttlætisátt nánast útilokaðar eða mjög erfiðar í framkvæmd. Ríkiskirkjan hefur þannig byggt upp starf sitt á slíkum ógnarkletti að hana skiptir engu þótt henda þurfi siðferði og réttlæti fyrir björg.

Frelsarinn 05.10.2003
Flokkað undir: ( Siðferði og trú )

Viðbrögð


nopoint - 06/10/03 20:11 #

Ekki má heldur gleyma því að með ríkistrú er ákveðin stétt manna áskrifendur að fé almennings. Vissulega geta menn skráð sig úr þjóðkirkjunni og fengið að borga til guðfræðideildar háskólans í staðinn en það virðist ekki vera gert ráð fyrir því að menn geti verið trúlausir.

Það er mögnuð tímaskekkja að skylda menn til að borga einhverjum trúarsöfnuði fé. Meira að segja RÚV sér þó sóma sinn í að innheimta ekki afnotagjöld vilji maður ekki eiga sjónvarp. Hví eru gjöld fyrir trú innheimt vilji menn ekkert með slíkt hafa að gera ?

Þar fyrir utan mætti alveg breyta kristinfræðinni í sögukennslu þar sem menn hafa í dag betri heimildir en menn höfðu hér áður fyrr með tilkomu dauðahafshandrita. Ef menn gerðu það, gerði fólk sér kannski betur grein fyrir því að ríkistrúin er það sem hún er vegna auglýsinga og vegna þess að hún nýtir sér lesti manna sem eru í formi græðgi og ótta. Til að mynda vita allir sem vilja vita, að jólin eru að uppruna heiðin hátíð og mikið hef ég gaman af því að fara í musteri Mammóns, Kringluna, um jólin og horfa á þrjátíukallinn í söfnunarbauknum í anddyrinu á meðan fólkið gengur út hlaðið pökkum því það er að fagna fæðingardegi manns sem boðaði að menn ættu að gefa til fátækra og hugsa lítt um veraldleg gæði.

Það er bara staðreynd að hér á landi ríkir fjölgyðistrú undir hatti ríkistrúnnar. Hver trúir á sinn guð sem þóknast þeim er trúir. Svo blekkir fólk sig með því að kalla sinn guð sama nafni og hinir.

Biskupinn henti siðferði ríkistrúnnar fyrir björg hér um árið er hann sá sig knúinn til að leggja blessun sína yfir samband Dorritar og Ólafs sem á biblíumáli kallast hórdómur og er dauðasök. Það tók bara enginn eftir þessu bulli því hann talaði bara með fagurgala, eins og það sem hann var að segja væri eitthvað rosalega merkilegt, svona svipað og prestarnir virðast hafa gert í þínum messuferðum.

Eini maðurinn sem tengist ríkistrúnni og er með einhverju viti er verndari hennar en álit mitt á honum jókst til muna verð ég að segja er hann gaf hinn fullkomna skít í allt þetta rugl og gifti sig bara hjá sýslumanni.

Lokað hefur verið fyrir athugasemdir við þessa færslu. Við bendum á spjallið ef þið viljið halda umræðum áfram.