http://www.ruv.is/frett/thverrandi-tru-bandarikjamanna
Þverrandi trú Bandaríkjamanna
03.11.2015 - 19:36
Trú Bandaríkjamanna á Guði almáttugan fer minnkandi þótt mikill meirihluti þeirra sé enn trúaður. Þetta kemur fram í nýlegri úttekt Pew rannsóknarmiðstöðvarinnar.
Færri „algjörlega vissir“
Hlutfall þeirra Bandaríkjamanna sem segjast algerlega vissir um tilvist Guðs fór minnkandi á tímabilinu 2007 til 2014. Árið 2007 voru 71 prósent Bandaríkjamanna „algerlega vissir“ um tilvist Guðs, en færri en 60% eru jafn vissir nú. Hlutfall þeirra sem trúa á Guð, óháð mælanlegri sannfæringu, lækkaði einnig á sama tímabili, eða úr 92 prósetnum í 89.
Yngri síður trúaðri
Mikill meirihluti fullorðinna Bandaríkjamanna, eða 77 prósent, eru á einn eða annan hátt tengd trúfélögum. Það færist þó í aukana að einstaklingar vilji síður tengja sig við trúfélög. Bandaríkjamenn í yngri kantinum eru einnig minna trúaðir en þeir sem eldri eru. Fjórir af hverjum tíu „aldamótabörnum“ segjast biðja á hverjum degi, en sex af hverjum tíu af 69-kynslóðinni svokölluðu, biðja daglega.
Meira umburðarlyndi gangvart samkynhneigðum
Í könnun Pew kemur einnig fram að meira umburðarlyndi gagnvart samkynhneigðum ríkir í nærri öllum stærri trúfélögum og trúarhópum í Bandaríkjunum en á undanförnum árum. Harðlínumenn á þessum vettvangi, evangelistar og mormónar, eru meðal þeirra. Ungt fólk er talið skýra þessa viðhorfsbreytingu.
Hallast heldur að demókrötum
Rannsóknin sýnir einnig að þeir sem eru ekki skráðir í neitt trúfélag en skilgreina sig samt trúaða, eru líklegri til að hallast að væng demókrata í bandarískum stjórnmálum heldur en repíblikana. Alls náði rannsóknin til rúmlega 35 þúsund Bandaríkjamanna og var hún framkvæmd á síðasta ári.