TRÚFÉLAGSLEIÐRÉTTING

Á forsíðu Allt í Fréttablaðinu 6. júlí sl. var viðtal við Lindu Líf Margrétardóttur undir fyrirsögninni „Augun eru kort líkamans“. Viðtalið var tekið af því tilefni að fyrsti árgangur nemenda útskrifaðist úr Heilsumeistaraskólanum, sem var stofnaður 2007 af Lilju Oddsdóttur „lithimnufræðingi“ og Anne Birgitte Larsen „þerapista og lífsþjálfara“. Í skólanum telur Linda Líf sig hafa lært „ýmislegt sem viðkemur náttúrulækningum, svo sem um blómadropa, kjarnaolíur, alþýðugrasalækningar, sjálfsrækt og augnfræði“.

Við höfum öll heyrt fólk nota orðið gervivísindi (pseudoscience) í niðrandi merkingu um ákveðin fræði eða kenningar sem viðkomandi telur ekki eiga við rök að styðjast. En hvað eru gervivísindi og hvernig eru þau frábrugðin því sem kalla má „alvöru” vísindi? Sumir nota orðið gervivísindi (eða samheitið hjáfræði) um fræðigreinar á borð við sálfræði, félagsfræði og jafnvel heimspeki, í þeirri trú að aðeins „hörð” vísindi eins og eðlis- og efnafræði geti talist til vísinda. Rétt merking orðsins á þó við hugmyndakerfi sem eru sett fram á vísindalegan hátt án þess að vísindastarf liggi þeim til grundvallar.