Hverjir ganga úr þjóðkirkjunni?

Í síðustu viku birti Þjóðskrá upplýsingar um aldur þeirra sem skrá sig í og úr trú- og lífsskoðunarfélögum. Upplýsingarnar voru ekki tæmandi að því leyti að félögin voru ekki flokkuð nákvæmlega en þó kom fram hve margir skráðu sig í og úr þjóðkirkjunni. Þegar upplýsingarnar eru skoðaðar út frá aldurshópum kemur í ljós að ungt fólk á aldrinum 18-38 ára er duglegast að skrá sig úr kirkjunni.

Fólk í þessum aldurshópi hefur ekki verið spurt sérstaklega um ástæður þess hvers vegna það skráði sig úr kirkjunni en það má ímynda sér að launahækkun biskups og hneykslismál innan kirkjunnar hafi haft sitt að segja. Einnig verður að hafa í huga að þótt kirkjan sé lítið í fréttum þá hafa úrskráningar árum saman verið fleiri mun en skráningar í kirkjuna. Það sem okkur þykir sérstaklega áhugavert og ánægjulegt er að þeir aldurshópar sem eru duglegastir að skrá sig úr kirkjunni eru einmitt fólkið sem er á barneignaraldri. Þetta grefur undan því stórundarlega fyrirkomulagi að ungabörn séu sjálfkrafa skráð í trú- eða lífsskoðunarfélag ef báðir foreldrar eru í félaginu við fæðingu.

Þegar litið er til skráninga í þjóðkirkjuna á þessu tímabili eru tveir hópar áberandi: Börn sem er verið að skíra og unglingar sem eru að fermast. Að öðru leyti eru fáir sem skrá sig í kirkjuna, án þess að við höfum nein svör frá hinum hópunum þá má ímynda sér út frá aldri að einhverjar skráningar tengist kirkjubrúðkaupum.

Upprunaleg mynd frá Álfheiði Magnúsdóttur og birt með cc-leyfi