Er hatursrit í bókahillunni þinni?

Í gær féllu þrír dómar (1, 2, 3) í hatursáróðursmálum í Hæstarétti. Tveir einstaklingar voru sakfelldir fyrir hatursáróður en einn var sýknaður. Eitt af úrslitaatriðum í sakfellingunum var að orðið “kynvilla" var notað, en samkvæmt Hæstarétti felur það orð “í sér fordómafullan rógburð og smánun" í garð samkynhneigðra.

Við viljum vekja athygli á því að í biblíum og Nýja testamentum frá 1981 til 2007 var orðið “kynvillingur" notað í 1 Kór. 6:9-10:

Vitið þér ekki, að ranglátir munu ekki Guðs ríki erfa? Villist ekki! Hvorki munu saurlífismenn né skurðgoðadýrkendur, hórkarlar né kynvillingar, þjófar né ásælnir, drykkjumenn, lastmálir né ræningjar Guðs ríki erfa.

Gídeon félagið færði íslenskum grunnskólabörnum í marga áratugi rit sem inniheldur ólöglegan hatursáróður í garð samkynhneigðra. Ljóst má vera að þessi texti er til á flestum heimilum landins, í fjölmörgum bókasöfnum (þar með talið mörgum bókasöfnum grunnskóla) og vafalítið er hægt að finna eintök hjá öllum kristnum söfnuðum landsins (þó sumir feli bækurnar hugsanlega ofan í skúffu).

Hvað sem manni finnst um réttmæti þessa dóma er ljóst að á Íslandi hafa trúfélög lengi komist upp með að hampa hatursáróðri.

Ritstjórn 15.12.2017
Flokkað undir: ( Gídeon , Stjórnmál og trú )

Viðbrögð

Matti (meðlimur í Vantrú) - 15/12/17 10:31 #

Er ekki nokkuð öruggt að ríkið hafi styrkt útgáfu biblíunnar á árunum 1981-2006?

Svo kemur sama yfirvald nú og ákærir einhverjar bjána fyrir að vitna í sömu bók!

Hanna Lára Gunnarsdóttir - 15/12/17 20:19 #

Rétt er það, Matti; að einhverju eða öllu leyti hefur ríkissjóður borið kostnað af útgáfu biblíunnar; - þessa umdeilda rits, þar sem allt stendur í horn í horn: missagnir og mótsagnir, auk þess sem klerkastéttin nýtir sér bara það úr bókinni sem hentar hverju sinni.

Allir hugsandi menn eru orðnir vanir tvískinnungi þegar kemur að málefnum ríkiskirkjunnar og sambands hennar við þing og þjóð.

Mig langar samt að hverfa frá þessu máli í bili og minnast þess í stað Christophers Hitchens, en í dag (15.12.) eru liðin 6 ár frá láti hans. Merkilegur fræðimaður, baráttumaður gegn hindurvitnum, röksnillingur og stórsjarmör, eins og sjá má á mörgum myndböndum, t.d. á YouTube. Orð hans eru enn í góðu gildi og mega ekki gleymast. Bækur hans eru sömuleiðis verðug lesning fyrir þá sem enn velkjast í vafa og eru hin ágætasta æfing fyrir okkur hin sem viljum hafa snaggaraleg tilsvör á reiðum höndum þegar þeirra er þörf. Góðar stundir.

Sindri G (meðlimur í Vantrú) - 15/12/17 22:22 #

Góð athugasemd Hanna Lára.

Sýnið viðbrögð, en vinsamlegast sleppið öllum ærumeiðingum. Einnig krefjumst við þess að fólk noti gild tölvupóstföng, líka þegar notast er við dulnefni. Ef það sem þið ætlið að segja tengist ekki þessari grein beint þá bendum við á spjallborðið. Þeir sem ekki fylgja þessum reglum eiga á hættu að athugasemdir þeirra verði færðar á spjallborðið.

Hægt er að nota HTML kóða í ummælum. Tög sem virka eru: a href, b, i, u, br, p, strong, em, ul, li og blockquote. Einnig er hægt að notast við Markdown rithátt í athugasemdum. Notið skoða takkann til að fara yfir athugasemdina áður en þið sendið hana inn.