Aðeins um „sögu bólusetninga“

Í Bókatíðindum 2015 er að finna bók sem kallast “Saga bólusetninga”. Við fyrstu sýn virðist bókin einfaldlega fjalla um sögu bólusetninga frá upphafi þeirra. Minnst er á að aðalhöfundur bókarinnar sé læknir, sem ætti að vera traustvekjandi titill hjá höfundi bókar um jafn viðamikið málefni. Við nánari skoðun kemur hins vegar í ljós að höfundurinn, Dr. Suzanne Humphries, er þekktur andstæðingur bólusetninga.

Titill bókarinnar er einnig misvísandi og allsendis ólíkur upphaflega enska titlinum, sem er „Dissolving Illusions“. Meðhöfundurinn Roman Bystrianyk er líka ötull við að gagnrýna bólusetningar. Þetta er því síður en svo hlutlaus bók um „sögu” bólusetninga, heldur virðist hún frekar halla í átt að gervivísindum, þar sem bólusetningum er fundið allt til foráttu og í stað þeirra er mælt með „náttúrulegum leiðum“ til að verjast sjúkdómum á borð við mislinga og kíghósta.

Höfundurinn Dr. Suzanne Humphries.

Suzanne Humphries er starfandi nýrnalæknir í Bandaríkjunum. Hins vegar hefur hún líka stundað nám í smáskammtalækningum og er virkur þátttakandi í samtökunum „The International Medical Council on Vaccination“, sem eru samtök sem berjast gegn bólusetningum. Hún hikar ekki við að breiða út falskar upplýsingar um bólusetningar. Árið 2013 reynd húni að vara Ísraela við að gefa börnum sínum bóluefni gegn lömunarveiki. Einnig notar hún markvissan hræðsluáróður eins og með því að kalla bóluefni „ónáttúruleg“ og „sjúkdómsefni“ (disease matter).

Læknar eru ekki óskeikulir

Það er algeng aðferð hjá andstæðingum bólusetninga að nýta sér fólk með fína titla til að færa rök fyrir málstað sínum. Þessi rökvilla kallast „vísun í yfirvald“ þar sem menntun eða staða á að teljast næg sönnun fyrir því að hægt sé að treysta þeim sem vitnað er í. Langt nám gerir fólk hins vegar ekki ónæmt fyrir vitleysu. Suzanne Humphries er gott dæmi um vel menntaða manneskju sem hefur kolrangt fyrir sér hvað bólusetningar varðar. Hún telur kíghósta vera „ekkert til að óttast“ og að hann megi meðhöndla með stórum skömmtum af C-vítamíni eða smáskammtalækningum. Hún efast um að mislingar séu svo hættulegir vegna þess að dánartíðni af völdum þeirra er svo lág. Báðir þessir sjúkdómar eru nú á uppleið í mörgum löndum, með tilheyrandi óþarfa þjáningum fyrir fjölmörg börn, einmitt vegna boðskaps af þessi tagi frá læknum sem eru á villigötum hvað bólusetningar varðar.

Dr. Humphries heldur fyrirlestur í sal HÍ.

Suzanne Humphries er á leið til landsins og mun halda hér fyrirlestur í þessari viku, í tilefni útgáfu bókar sinnar á Íslandi. Það er vonandi að hún eigi sér fáa stuðningsmenn hér á landi, enda eru bólusetningar ein mesta heilsubót fyrir mannkynið frá upphafi lækninga. Skaðinn af boðskap bólusetningaandstæðinga á borð við Dr. Humphries er þegar orðinn mikill, með lækkandi hlutfalli bólusettra barna og aukinni tíðni mislinga og kíghósta í fjölmörgum löndum beggja vegna Atlantshafsins. Hér á landi eru bólusetningahlutfallið enn viðunandi, en það er nauðsynlegt að vera á varðbergi gegn þeim sem vilja breyta því.