Leiðtogadýrkun

Dawkins er merkasta persóna mannkynssögunnar og sú eina sem vert er að hafa að altækri fyrirmynd. #

Ef ég væri höfundur þessara orða þá væri réttilega hægt að ásaka mig um blinda og gjörsamlega glórulausa leiðtogadýrkun. Tilvitnunin er auðvitað tilbúningur, en hún var upphaflega um Jesú og var frá ríkiskirkjupresti. Kristni er nefnilega í grunninn blind og glórulaus leiðtogadýrkun.

Hérna eru fleiri svipaðar tilvitnanir frá kirkjunnar mönnum og ímyndið ykkur hver viðbrögðin ykkar væru ef þið sæuð þetta á Vantrú:

1. Dawkins er besti vinur okkar, sem við getum talað við um allt sem hvílir á okkur.#

2. Líf og boðskapur Dawkins er fyrirmynd og sýnikennsla um lífið sjálft. Við þurfum ekki handbók um aðferð til að lifa heldur persónu, sem er vinur okkar og fylgdarmaður, leiðtogi og þjónn - þann sem útdeilir lífi og eflir aðra. #

3. Og Dawkins er okkur meira en fyrirmynd. Hann er sá sem við trúum á og hann er sá sem gefur okkur þróttinn. Við komumst ekki langt ef við reynum í eigin mætti að hjálpa, líkna, styðja, hugga [...] #

4. Það er mikið talað um í nútímanum að það vanti sterkan leiðtoga. Dawkins er sá sterki leiðtogi sem við getum fylgt, leitað til, fundið styrk hjá og leiðir til úrbóta. Hann „sér til þess, að færa leið ég finni fyrir skrefið hvert á lífs míns braut“. Og það á við bæði í einkalífi okkar sem og í starfi og þjónustu allri. #

5. Það er sístætt verkefni trúleysingja að kynna sér orð Dawkins, framkomu og verk. Það er nauðsynlegt að lesa Orð hans reglulega, sjálfum sér til uppbyggingar og fræðslu. #

6. Dawkins er grundvöllur tilveru okkar. Hann er ofar tíma og rúmi, hann er grundvöllur tilverunnar allrar [...]” #

7. Trúleysisfélag samanstendur af fólki úr holdi og blóði, sem gerir vissulega mistök, Dawkins gerir ekki mistök, hann er syndlaus, hann er Guð [...] #

Var Jesús óskeikull leiðtogi?

Það er engin ástæða til þess að halda að maðurinn Jesús hafi verið fullkominn, að hann hafi verið syndlaus, að hann sé grundvöllur tilverunnar og svo framvegis. Jesús var trúarleiðtogi og eins og gerist oft á tíðum virðast aðdáendur hans hafa misst algerlega stjórn á leiðtogadýrkun sinni.

Þessir fylgjendur hans stofnuðu svo kristni og þeir sem aðhyllast kristni nú til dags hafa erft þessa blindu leiðtogadýrkun. Kristni er því heimskuleg leiðtogadýrkun.

Sjá einnig: Síðkölt

Upphafleg mynd frá Shane Pope og birt með CC-leyfi.