Á dögunum bárust fréttir af því að í fleiri en einu tilfelli hefði Biskupsstofa tekið presta „á teppið“ vegna mögulegra skattalagabrota. Þetta staðfesti séra Kristján Björnsson, formaður Prestafélags Íslands. Hér er um að ræða ríkisstarfsmenn með mánaðarleg meðallaun upp á 750 þúsund krónur, sem nota samt aðstöðu sína til þess að taka við seðlum undir borðið, gefa ekki út reikninga og svíkja undan skatti. Greiðslufyrirkomulagið er gamaldags og opið fyrir skattsvik, sem hægt væri að hindra ef opinberar athafnir væru einfaldlega greiddar með gíróseðli i heimabanka.
Því miður berast stöku sinnum fregnir af því að aðrir starfsmenn hjá hinu opinbera verði uppvísir að sambærilegum brotum sem varða meðferð fjármuna í starfi, en ekki verður annað séð en að þeim brotum sé undantekingarlaust vísað til lögreglu.
Prestar sem stinga undan peningum fá „tiltal“ hjá Biskupsstofu en læknar sem svindla á reikningum eða lögreglumenn sem stinga sektum í eigin vasa eru ákærðir. Það er ekki sama Jón og „séra“ Jón. Enn einu sinni sannast það að kirkjunnar lið fær sérmeðferð í formi tiltals á meðan aðrir ríkisstarfsmenn sem framkvæma nákvæmlega sömu afbrot eru saksóttir.
Hvers vegna vísar Biskupsstofa mögulegum skattalagabrotum presta ekki til lögreglu, en fer þá leið að leysa úr þeim „innanhúss“? Hver ber ábyrgð á því að lögum sé framfylgt við rekstur stofnunarinnar?
Lokað hefur verið fyrir athugasemdir við þessa færslu. Við bendum á spjallið ef þið viljið halda umræðum áfram.
Valgarður Guðjónsson (meðlimur í Vantrú) - 23/08/15 13:18 #
Biskupsstofa viðurkennir opinberlega að hylma yfir lögbrot.. Ótrúlegt, en samt ekki.
Annars ætti ekki að vera erfitt fyrir skattrannsóknarstjóra að vinna þetta. Telja fjölda athafna og fjölda fermingarbarna og bera saman við skattframtalið.