Opið bréf til Gídeonfélagsins

Eins og flestir vita voru settar reglur í Reykjavíkurborg um samskipti leik- og grunnskóla við trúfélög. Í reglunum fól meðal annars í sér bann við dreifingu Gídeonfélagsins á Nýja testamentinu í grunnskólum. Undan þessu banni hafa gídeonmenn svo kvartað, en samt virðast þeir enn reyna að komast í skólana. Þess vegna ákváðum við að senda þeim bréf og athuga hvort að það sé stefna þeirra að brjóta þessar reglur. Við munum láta lessendur okkar vita ef þeir svara bréfinu, sem við birtum hér fyrir neðan.

Stjórn Gídeonfélagsins á Íslandi

Meðlimur Vantrúar lenti í þeirri leiðinlegu uppákomu um daginn að félagsmenn ykkar komu í skóla barns hans og gáfu barninu Nýja testamentið að honum forspurðum.

Það er klúður hjá skólanum að láta foreldra ekki vita og ekki hægt að kenna ykkur um það.

Hins vegar átti þetta sér stað í skóla í Reykjavík, en eins og þið vitið þá er búið að banna þessa trúboðsstarfsemi ykkar í Reykjavík. Aftur ber skólinn ábyrgð á því að hafa leyft félagsmönnum ykkar að reyna að “ávinna menn og konur fyrir Drottinn Jesú Krist" (svo maður vitni í ykkar eigin lýsingu á starfinu ykkar). En hér er ábyrgðin líka ykkar.

Þið vitið vel að dreifing ykkar á trúarritum hefur verið bönnuð í skólum í Reykjavík, nóg hafið þið kvartað undan þeim reglum sem borgin hefur sett sér í þeim efnum.

Er það opinber stefna ykkar að brjóta þær reglur? Finnst ykkur þið vera hafnir yfir þær reglugerðir sem opinber yfirvöld setja?

fyrir hönd Vantrúar,
Hjalti Rúnar Ómarsson