Allar færslur Allir flokkar Sos Um félagið Úrskráning Lógó Spjallid@Vantru Póstfang Vantru@Facebook Vantru@Youtube Vantru@Twitter

Trúboð í skólum er ekkert skaðlegt

Mynd af skólastofu

Hvernig getur það skaðað börn þótt prestar heimsæki skólann, tali um kærleika og miskunnsemi og kenni börnunum að spenna greipar? Hafa þau eitthvað illt af því að læra að syngja Jesús er besti vinur barnanna? Ef þetta flokkast sem trúboð, hvernig stendur þá á því að mörg þessara barna verða samt trúleysingjar?

Svarið er: Börn hafa ekkert illt af því að fá prest í heimsókn eða fara í kirkju og ef þau eiga meðvitaða foreldra og alast upp í gagnrýnu samfélagi að öðru leyti, þá eru litlar líkur á að samstarf kirkju og skóla hafi þau áhrif að börnin vaxi upp sem trúarnöttarar.

Nú? Og er þá ekki allt í lagi að halda trúboðinu áfram? Nei, það er ekki í lagi.

Börn hafa ekkert illt af því að heyra fallegar sögur af Jesússi og læra umbuðarlyndi og kærleika. Þau hefðu heldur ekkert illt af því að heyra skoðanir Vantrúarmanna á Jesússi eða heyra boðskap anarkista um yfirvaldslaust samfélag. Sennilega hefðu þau gott af því.

Þar með hlýtur að vera alveg sjálfsagt að Vantrúarmenn gangi í skólana og útskýri fyrir börnunum hvernig heimurinn yrði betri og kærleiksríkari ef fólk hætti mylja undir stofnanir sem berjast gegn mannréttindum minnihlutahópa. Þeir gætu líka gefið þeim bók Richard’s Dawkins Ranghugmyndin um Guð. Enda myndi það ekki skaða neinn.

Þar með væri líka bara gott mál að anarkistakórinn heimsæki alla leikskóla á landinu nú fyrir jólin, kenndi börnunum slagorð á borð við yfirvald er ofbeldi! og syngi með þeim kók er kúkur kapítalsins og fleiri pólitíska jólasöngva. Börnin hefðu bara gaman af því og ekki trúi ég að nokkrum foreldrum þætti verra ef börnin færu að líta kókdrykkju gagnrýnum augum.

Nú viljið þið ekki fá okkur í skólana? Í alvöru? Haldið þið að börnin ykkar verði þá anarkistar? Eða að þau hætti í skóla til að útbreiða boðskap Vantrúarmanna?

Nei ég hélt ekki. Það eru allt aðrar ástæður fyrir því að þið viljið ekki hleypa stjórnmálaöflum og grasrótarhreyfingum inn í skólana. Af sömu ástæðum kærum við hin okkur ekki um að kirkjan komi að skólastarfi. Ekki heldur fyrir jólin.

Nú skilst mér að mörgum finnist hið erfiðasta mál að greina á milli fræða og trúboðs. Er það t.d. trúboð ef skólakórinn syngur jólasálm á litlu jólunum?

Í flestum tilvikum er einfalt að meta þetta, með því að setja pólitík í stað trúar. Ef skólinn ætlaði að halda hátíðadagskrá þann 1. maí, hvernig yrði staðið að því? Væri hann að boða kommúnisma ef skólakórinn syngi Maístjörnuna? Varla held ég að margir tækju undir það. Hinsvegar er ég nokkuð viss um að ef Steingrímur J. Sigfússon yrði fenginn til að heimsækja skólana og útskýra valda kafla úr Rauða kverinu, yrði mörgum heitt í hamsi.

Það er ekkert svo erfitt að greina á milli fræðslu og trúboðs. Þarf bara að hugsa pínulítið. Og halda í heiðri meginregluna; ef þú ert ekki viss um að þú megir það, láttu það þá bara eiga sig. Það er allavega ágæt leið til að forðast vesen.


Birtist upphaflega á norn.is

Mynd fengin hjá kemorgan65

Eva Hauksdóttir 04.03.2014
Flokkað undir: ( Skólinn )

Viðbrögð


Vésteinn Valgarðsson - 04/03/14 14:11 #

Ég ræki nú upp stór augu ef Steingrímur tæki upp á því á gamals aldri að lesa Rauða kverið.


Birgir Baldursson (meðlimur í Vantrú) - 05/03/14 02:35 #

Ég man eftir því þegar einhvern tíma forðum einhver notaði sömu rök (kannski Eva sjálf), nema þá snerist það um að Steingrímur mætti í leikskólana með Rauða kverið. Það setti að manni hlátur við þann lestur og svo var um fleiri en mig.

Í raun ætti tilhugsunin um presta í leikskólum að vekja sömu viðbrögð, svo absúrd er það.


Svanur Sigurbjörnsson - 06/03/14 11:46 #

Takk fyrir frábæra grein Eva. Sannarlega uppvekjandi skrif og skemmtileg þar að auki. :-)


Inga Ósk Hafsteinsdóttir - 06/03/14 12:58 #

Frábær grein, vel skrifuð og vel orðuð......... Fyrir mér eru trúabrögð versta mein mannsins þess vegna held ég mig utan þeirra - mitt val.

Lokað hefur verið fyrir athugasemdir við þessa færslu. Við bendum á spjallið ef þið viljið halda umræðum áfram.