Allar færslur Allir flokkar Sos Um félagið Úrskráning Lógó Spjallid@Vantru Póstfang Vantru@Facebook Vantru@Youtube Vantru@Twitter

Nú er illt í efni

Mynd af peningum

Nú er illt í efni. Ríkisrekna trúfélagið okkar fær líklega ekki nema tæpa fimm milljarða af opinberu fé árið 2014. Það er, eins og allir sjá, alltof lág fjárhæð af peningum úr ríkissjóði til þess að reka félag um að trúa á eitthvað. Fréttablaðið hefur sem betur fer staðið sig vel í að vekja athygli á þessum vanda og nú lesum við um sóknir sem skulda fleirihundruð milljónir vegna stökkbreyttra lána sem tekin voru til að reisa hógvær safnaðarheimili, lekar kirkjur og kóra sem þurft hefur að leggja niður. Þessar fréttir birtast samhliða fréttum um álag á starfsfólki heilbrigðiskerfisins, óánægju lækna með starfsaðstöðu og sífelldar bilanir á nauðsynlegum tækjum spítalana, sem eru auðvitað álíka mikilvægar stofnanir og ríkiskirkjan.

Það er hræðilegt að hugsa til þess að tekjur vegna sóknargjalda hafi dregist saman undanfarin ár. Getur verið að fólk sé hreinlega svo eigingjarnt að skrá sig úr ríkiskirkjunni nú á þeim tíma þegar hún þarf sem mest á félagsgjöldum þess sem ríkið úthlutar svo sanngjarnt úr ríkissjóði að halda? Að fólk láti þessi félagsgjöld sín frekar renna í ríkissjóð þar sem þau geta nýst í rekstur heilbrigðis- og menntakerfis í stað þess að halda úti kórum í kirkjum landsins og greiða niður lán sókna?

Auðvitað þarf að laga þetta og tryggja kirkjunni öruggar sóknargjaldatekjur úr ríkissjóði og það er hughreystandi að sjá að nú ætlar hið opinbera að verða við óskum ríkiskirkjunnar og færa sóknargjaldakerfið í traustari farveg. Einfalda kerfið og gera það skilvirkara. Einhverjir hafa bent á að einfaldasta kerfið væri að trú- og lífsskoðunarfélög innheimtu sjálf sín rekstrargjöld af meðlimum en það er augljóst að það gengi aldrei upp. Það er vesen að innheimta félagsgjöld og til hvers er ríkið ef ekki til þess að standa í svoleiðis basli fyrir þá sem vilja rekar félag um að trúa á eitthvað? Kannski væri bara hægt að gera einhvern samning bara. Það hefur gefist vel með samningin um laun presta, sem ríkið tók að sér að greiða gegn því að fá til eignar jarðirnar sem það hafði hvort sem er séð um í 90 ár áður skrifað var undir. Þetta voru líka dýrustu jarðir landsins hvort sem er, allavega eitthvað af þeim sem við vitum að fylgdu með í samningnum. Hinar, sem engin veit hverjar eða hversu margar voru, eru sennilega líka blómlegustu ræktarlönd sem finnast, með miklum hlunnindum.

Einhverjir, sennilega sömu barlómsgemsarnir og baula um eigin innheimtu trúfélaga, vilja svo meina að sóknargjaldakerfið sé ósanngjarnt. Að það sé verið að leggja sérstakan skatt á þá sem standa utan trúfélaga ef það er satt að sóknargjöld séu sérstaklega innheimt. Vísa í eitthvað álit Mannréttindadómstóls Evrópu (MDE) frá Svíþjóð um að tryggja verði að þeir sem standi utan trúfélaga greiði því sem nemur lægra í ríkissjóð. Hvað vita einhverjar skammstafanir frá Evrópu og hinir ríkiskirkjulausu Svíar svosem um okkur? Þetta er bara píp.

Nei, eins og áður sagði: Nú er illt í efni. Niðurskurður blasir við. Mennta- og heilbrigðiskerfin eru í slæmum málum. Fagfólk í heilbrigðisgeiranum varar við hættuástandi. Þá ríður á að tryggja sóknum landsins nægar tekjur. Fólk verður að geta treyst því að geta setið í ólekum kirkjum og hlusta á ómfagra kóra á sunnudögum. Einhvern veginn verður að hugreysta fólk á meðan spítölum landsins blæðir út.

Egill Óskarsson 22.10.2013
Flokkað undir: ( Stjórnmál og trú )

Viðbrögð

Lokað hefur verið fyrir athugasemdir við þessa færslu. Við bendum á spjallið ef þið viljið halda umræðum áfram.