Afsögn páfa

Í vikunni bárust þær fréttir að Benedikt XVI páfi ætlaði að segja af sér. Þetta kom talsvert á óvart enda þarf að fara ein sexhundruð ár aftur í tímann til þess að finna fordæmi fyrir afsögn páfa, dauðinn er yfirleitt það sem kallar á páfaskipti. Þessi óvæntu tíðindi kölluðu eðlilega á miklar vangaveltur um hver væri raunveruleg ástæða fyrir afsögninni því að margir virtust ekki taka orð Benedikts um heilsufarsástæður vegna aldurs alvarlega.

Hitt og þetta var týnt til; alvarleg veikindi, fjármálamisferli, valdabarátta innan Vatikansins og yfirvofandi upplýsingar um barnaníð. Það segir sitt um stöðu Vatikansins að allar þessar ástæður hljóma líklegar, ekki hvað síst sú síðasta enda hefur áður komið fram að þegar Benedikt hét bara Joseph Ratzinger þá hylmdi hann yfir með barnaníðingum.

Eins og við var að búast syrgir Vantrú ekki afsögn Benedikts og ummæli Christopher Hitchens þar sem hann greindi frá því að hann nyti alltaf tímans frá því að páfi færi frá og nýr kæmi í staðinn komu óneitanlega upp í hugann:

...there’s quite a long interval until the Conclave can meet and for the whole time – that whole interval, there’s a delicious, lucid interlude – there isn’t anyone on Earth who claims to be infallible.

Benedikt XIV var boðberi fornaldarlegra og ómanneskjulegra viðhorfa, eins og reyndar aðrir forverar hans á páfastóli. Hann barðist gegn rétti samkynhneigðra til hjónabands og sagði þá hreinlega brjóta gegn kjarna þess að vera mennskur með því að elska fólk af sama kyni. Hann sagði Helförina hafa átt sér stað vegna trúleysi nasisma. Og jafnvel þegar hann sýndi einhvern vott af raunveruleikaskyni með því að benda á að stundum gætu smokkar komið í veg fyrir kynsjúkdóma var Vatikanið, sem hann var í forsvari fyrir, fljótt að benda á að orð hans breyttu litlu um stefnu Vatikansins varðandi smokkanotkun, stefnu sem hefur gert þeim sem berjast gegn útbreiðslu alnæmis erfitt fyrir.

Það er líklega til lítils að vona að afsögn Benedikts XVI hafi þau áhrif á Vatikanið færist nær nútímanum í skoðunum. Næsti páfi verður nær örugglega eins og sá fráfarandi: Óskeikull boðberi Guðs og slæmra gilda sem hefur oftar rangt fyrir sér en rétt.