Sá stórmagnaði atburður átti sér stað í dag að þrautþjálfaður og margvottaður heilunarmiðill spáði hörmungum á Íslandi. Einn virtasti fréttamiðill landsins, Pressan.is, birti frásögn af málinu.
En það er ekki eina undrið. Því efahyggjumaður segist hafa fengið sýnir um að að Pressan, Vísir.is, mbl.is og fleiri miðlar muni í sumar birta allskyns rugl um meinta yfirnáttúrulega krafta frá ýmist svikahröppum eða trúgjörnum einfeldningum. Hann hvetur menn til að huga að viðbragðsáætlunum sem taka mið af væntanlegri flóðbylgju af hindurvitnaumfjöllunum.
Tónlistar- og efahyggjumaðurinn, og fyrrverandi formaður Vantrúar, Birgir Baldursson sagði að hann hafi séð það myndrænt hvernig mikil hindurvitnaumfjöllun muni skekja höfuðborgina og leika landann grátt. Rétt sé að fólk hugi að viðbragðsáætlunum sem hægt sé að taka mið þessu.
"Þetta er eins og að horfa á myndræmur í kvikmyndahúsi og þetta birtist mér í vöku", sagði Birgir í samtali við Vantrú.
Í einni sýn sem hann fékk segist hann hafa horft upp á ótrúlegt kjaftæði sem átti upptök sín á "lífsstílssíðum" Fréttablaðsins.
"Það var mynd af konu í hvítum sloppi, hún hélt á glasi með hreinu vatni. Umfjöllunin var full af fullyrðingum um skammtafræði og tíðnir.", sagði Birgir. En hann segir nauðsynlegt að huga að því hvernig hægt sé að bregðast við; s.s. útbúa einhvers konar viðbragðsáætlun svo fólk sé ekki eins líklegt til að kokgleypa við ruglinu "ekki ef, heldur þegar hindurvitnin fara að birtast" varar Birgir við.
"Það er auglýsing á hinni síðunni á opnunni, um að lúpínuseyði geti læknað krabbamein. Það er rétt að menn hugi að því hvernig skuli bregðast við", sagði Birgir.
Hann segir fjölda deila þessum myndrænu boðum með sér enda hafi þeir margir hverjir lýst nákvæmlega sömu sýn, í smáatriðum.
Lokað hefur verið fyrir athugasemdir við þessa færslu. Við bendum á spjallið ef þið viljið halda umræðum áfram.