Ert þú skráður á tru.is?

Það er alveg ljóst að algjör meirihluti kennara við guðfræðideild Háskóla Íslands eru aðdáendur ríkiskirkjunnar. Það er ekkert óeðlilegt. Heldur sjálfsögð réttindi að starfsmenn guðfræðideildar iðki sína trú og hafi sínar pólitísku skoðanir. Aftur á móti má deila um akademískt frelsi kennara sem eru í launuðu starfi fyrir ríkiskirkjunna samhliða kennslunni.

Hið akademíska frelsi

Það eru eflaust minni líkur að slíkur starfsmaður njóti akademísks frelsis. Ekki ósvipað og að starfa í greiningardeild banka á sama tíma og kenna viðskiptafræði. Slíkt launað starf hlýtur að reyna á siðferði starfsmannsins. Ætli að deildin hafi sett sér siðareglur í því sambandi? Eða er það möguleiki að siðareglur víki ávallt þegar Jesú á í hlut?

Það má reyndar velta fyrir sér blaðaskrifum einstaka starfsmanna deildarinnar sem eru rituð í nafni embættis þeirra í Háskólanum. Einum prófessornum þótti umsókn til öryggisráðs Sameinuðu þjóðanna vera sterk vegna ríkiskirkjufyrirkomulagsins á Íslandi. Sami prófessor vildi innlima Lútersku fríkirkjurnar í ríkiskirkjuna.

Reyndar voru skrifin svo óheppilega öfgafull að prófessorinn baðst síðar afsökunar á þeim. Sumir kennarar skrifa blaðagreinar með starfsmönnum ríkiskirkjunnar. Eflaust er það gert til að auka vægi greinanna þegar háskólakennari og prestur rita saman grein um kirkjuna sína. Ekki ósvipað og þegar bankastjóri og prófessor hagfræðideildar skrifa saman greinar um bankann sinn.

Æsandi þrýstihópar

Svona fyrirkomulag vekur vissulega upp spurningar og vangaveltur um hver stýrir í raun guðfræðideild Háskólans. Háskólinn eða ríkiskirkjan? Allavega eru ástir sumra kennara á ríkiskirkjunni ansi frjálslegar og eldveggir á milli hagsmuna með því lægsta sem gerist í háskólasamfélaginu

Svo heppilega vill til að nýjar bænir, predikanir og blaðaskrif starfsmanna ríkiskirkjunnar eru flestar á trú punktur is. Vefsíðan er hluti af neti ríkiskirkjunnar og verður því seint tengd við efahyggju. Ekki er ástæða til að gera athugasemdir við að starfsmaður guðfræðideildar trúi á sama ríkisguð og starfsmenn ríkiskirkjunnar. Það er líka í góðu lagi að þeir skrifi sem einstaklingar greinar á tru.is.

Það er samt frekar pínlegt að hafa alla starfsmenn guðfræðideildar skráða sem höfunda á tru.is hvort sem þeir hafa skrifað þar greinar eður ei. Þar má sjá starfsmann guðfræðideildar með hlekk á nafnið sitt, en þó ekki með neinar greinar, predikanir eða bænir. Þannig virðast hann hafa verið sjálfkrafa skráður á ríkiskirkjusíðuna án þess að senda inn grein. Ekki ósvipað og hvítvoðungar eru skráðir í ríkiskirkjuna við fæðingu.

Megi gvuð blessa hið akademíska frelsi.

Mynd af aðalbyggingu frá Étienne Ljóni Poisson