1001 sjúkdómseinkenni

Algeng brella hjá sölumönnum gervilausna er að telja viðskiptavinum sínum trú um að þeir séu haldnir ýmsum kvillum og verði helst að breyta um lífsstíl (og kaupa söluvöruna um leið) til að fá bót meina sinna.

Til þess að láta kvillana hljóma sannfærandi og að sjúkdómseinkenni þeirra eigi við sem stærstan viðskiptahóp notast sölumennirnir oft við algeng og óljós einkenni sem nær allir finna fyrir einhvern tímann á ævinni. Dæmi um þessa aðferð má sjá í bókinni Candida sveppasýking – einkenni og lyfjalaus meðferð eftir Hallgrím Þ. Magnússon og Guðrúnu Bergmann.

Hvað er candida?

Candida er ættkvísl sveppa sem lifir í mönnum. Þeir finnast í nær öllu fólki og lifa meðal annars á húðinni, en best líður þeim í þörmunum. Þessi sveppur er oftast meinlaus og býr í sátt og samlyndi við mannslíkamann. Ein tegund sveppsins, candida albicans, getur þó valdið sýkingum, eins og til dæmis sveppasýkingu í kynfærum eða þrusku í munni.

Hjá fólki með bælt ónæmiskerfi, eins og alnæmis- eða krabbameinssjúklingum getur sveppasýking af völdum candidasveppsins verið banvæn. Hjá heilbrigðu fólki er sýking af þessu tagi einfaldlega meðhöndluð með lyfjum sem koma sveppaflórunni aftur í jafnvægi.

Náttúrulækningar og candida

Candida sveppurinn er raunverulegur sveppur og getur valdið raunverulegum sýkingum í fólki. Í bókinni Candida sveppasýking er sveppurinn hins vegar sagður vera valdur að ógrynni einkenna. Bara á bókarkápunni má sjá nokkur af þeim einkennum sem gefið er í skyn að geti verið af völdum candida sýkingar:

Áhugaleysi – sífelldar áhyggjur – stöðugar efasemdir – sýking í ennis- og kinnholum – talvandamál –höfuðverkir – sviði við þvaglát – magabólgur – magasár – útbrot á húð – ofsakláði – köfnunartilfinning – hósti – sýking í hálsi – liðamótaverkir – exem eða þroti í húð – flasa – mikil svitamyndun – hnerri – blóðnasir – kláði í augum – eyrnaverkur – hálsbólga – kláði – brjóstverkir við innöndun – dökkir baugar undir augum – vökvasöfnun – þyngdaraukning – reiðiköst – pirringur

Athugið að þessi listi er ekki tæmandi. Eins og sjá má er þetta heil hrúga af einkennum, allt frá áhugaleysi til eyrnaverks. Engin af þessum einkennum eru skýr sjúkdómseinkenni, heldur geta þau átt við fjölmarga sjúkdóma.

Að auki eru mörg þeirra ekki endilega sjúkdómseinkenni heldur algengir og meinlausir kvillar. Hver hefur t.d. ekki verið pirraður? Hver hefur aldrei fengið blóðnasir, hósta eða höfuðverk, eða haft áhyggjur í einhvern tíma? Hér er candida sýking gerð að mögulegum sökudólgi fyrir þeim öllum, og boðið upp á svokallaða lækningu.

Ekki er vísað í neinar ritrýndar rannsóknir sem gætu fært sönnur á að candida sveppurinn sé jafn mikill skaðvaldur og haldið er fram. Né heldur er útskýrt hvernig vitað er að candida geti valdið t.d. reiðiköstum eða talvandamálum.

Sjúkdómavæðing

Stuðningsmenn náttúrulegra lækninga kvarta oft undan því að almenn læknavísindi eigi það til að sjúkdómavæða allt, bara til þess að geta grætt á aukinni lyfjasölu. Þessari kvörtun má auðveldlega vísa aftur til föðurhúsanna því fjöldamargar náttúrulegar lækningar ganga einmitt út á sjúkdómavæðingu.

Viðskiptavinum er talin trú um að þeir séu veikir, að líkami þeirra þarfnist nauðsynlega hreinsunar og að hann sé ófær um að verja sig sjálfur gegn sýkingum. Síðan er boðið upp á náttúrulega töfralausn. Þetta má kalla skólabókardæmi um að framleiða eftirspurn til að geta selt óþarfa vöru.