Ágústínusarverðlaun Vantrúar 2010 : Úrslit

Þá er komið að því að tilkynna úrslit kosninga Ágústínusarverðlauna Vantrúar 2010. Það er auðvitað til mikils að vinna, en sigurvegarinn fær páskaegg og sérstakt viðurkenningaskjal fyrir afrek sín í guðfræðilegum vísindum sem afhent verður á hinu árlega bingói Vantrúar þann 22. apríl nk. Við vonum bara að sigurvegarinn láti sjá sig til að taka við þessum veglegum verðlaunum.

Við óskum verðlaunahöfum 2010 innilega til hamingju, og megi þeir tjá sig sem mest þetta árið.

Fyrsta sæti

Mannréttindafrömuðurinn Örn Bárður Jónsson rústaði þessu í þetta skiptið með því að ofbjóða réttlætiskennd lesenda og skíta hressilega yfir minnihlutahópa með mannskemmandi viðhorfi sem er varla siðmenntuðu fólki sæmandi. Örn Bárður verður að gera sér grein fyrir því að hann tilheyrir lítilli stétt manna sem hrapar niður virðingarstigan í þjóðfélaginu sökum þess að boðskapurinn er fyrir lifandis löngu úr sér genginn og á mjög lítinn samhljóm í samfélaginu. Þessi boðskapur hefur enda - sama hvernig hann hefur verið matreiddur - alið á sundrungu, hatri og úlfúð alla þá tíð sem honum hefur verið haldið á lofti. Það að skýla sér bakvið eitthvað "æðra" og "betra" siðferði til að útskýra þessi orð á einhvern "æðri" og "betri" hátt er ekki sannfærandi.

Það hefur alltaf haft kostnað í för með sér að tilheyra minnihlutahópi. Þessi nálgun, „vesalings ég og börnin mín", virkar ekki sannfærandi. Þú verður bara að kyngja því að börnin þín uppgötvi að þau tilheyri minnihlutahópi ef þú hefur valið sjálfum þér og þeim lífsskoðanir minnihlutans. Kristnir menn um allan heim verða að þola hið sama. #

Annað sæti

Það var með ólíkindum að fylgjast með viðbrögðum sumra presta við tillögum Mannréttindaráðs Reykjavíkur um að banna trúboð í leik- og grunnskólum. Fyrrverandi sóknarpresturinn Ólafur Þ. Hallgrímsson - sem rétt naumlega náði öðru sæti - lét ekki sitt eftir liggja í tilraunum ríkiskirkjunnar að endurskilgreina trúfrelsi þannig það henti ríkiskirkjunni betur og undirstrika mikilvægi kristninnar umfram allt annað. Orðræða þessara kristnu kóna var síst til þess fallin að skapa skynsama og réttláta umræðu.

Á Íslandi ríkir trúfrelsi. En varla þýðir það að í kristnu landi eigum við að leggja af alla kristilega tilbeiðslu í leik- og grunnskólum, vegna þess að þar séu einstaklingar, sem fæddir eru inn í annað trúarsamfélag. Jesús gerði engan mun á fólki, hann spurði ekki hvaða trú það játaði. Hann sagði: Leyfið börnunum að koma til mín og varnið þeim eigi… Þar var ekkert barn undanskilið. Geta ung börn, sama hvaða trúfélagi þau tilheyra, haft eitthvað slæmt af því að syngja og biðja til Jesú, barnavinarins mesta?#

Það sem einkenndi orðræðuna var frekja, hroki, yfirlæti og í raun yfirgengileg helvítis leiðindi. Þessi tilteknu, ríkisstyrktu hindurvitni og goðsagnir fá of mikið pláss í leik- og grunnskólum. Því ber að breyta. Frekar á að kenna krökkunum eitthvað gagnlegt; einsog heimspeki og gagnrýna hugsun. Þangað til það gerist verður þjóðfélagið að gæta jafnræðis í opinberum leik- og grunnskólum. Þarft og gott skref í þá átt er að banna alfarið trúboð í þessum stofnunum. Vert er að geta þess að það er nóg pláss fyrir "barnavininn mesta" í Sunnudagaskólunum, en sú starfsemi er starfrækt útum allt land með tilheyrandi fjárútláti.

Þriðja sæti

Þórey Guðmundsdóttir vermir svo þriðja sætið með þessari merkilegu staðhæfingu að heill haugur af norskum börnum munu heita Múhameð og Múslímagrýlan er að éta helming allra barna þarna í Noregi. Hún lætur stærðfræðina ekki vefjast fyrir sér.

Núna þegar ég kem aftur til Noregs, þá er ein fyrsta fréttin sem ég heyri í norska ríkissjónvarpinu að fjórða hvert sveinbarn í Osló fái nafnið Múhameð. Sem þýðir hvað? Eru ekki sirka álíka margar telpur sem að fæðast eins og drengir? Er þá um það bil fimmtíu prósent af ungu kynslóðinni í Osló að verða múslímar?#

• Ágústínusarverðlaunin 2005
• Ágústínusarverðlaunin 2006
• Ágústínusarverðlaunin 2007
• Ágústínusarverðlaunin 2008
• Ágústínusarverðlaunin 2009