Fimmtudaginn 10. febrúar birtist frétt í aðalsjónvarpsfréttatíma RÚV um merkilegt lítið tæki. Tækið var kynnt til sögunnar sem tölva sem mælir frjósemi og lýsir grænu ljósi þá daga sem konur séu ófrjóar en rauðu þegar hætta sé á ferð. Og hvaða aðferð skyldi tækið nú nota til þess? Jú, í ljós kemur að þetta er í rauninni bara hitamælir með innbyggðu dagatali. Þarna er semsagt bara á ferðinni leitin að öruggu dögunum og í sjálfu sér ekkert að því eða hvað?
Jú reyndar. Fyrir það fyrsta kostar tækið tugi þúsunda króna. Og í öðru lagi hélt viðmælandi RÚV í fréttinni því fram, mótbárulaust, að þetta væri 99.3% örugg getnaðarvörn. Þetta er fráleit tala. Samkvæmt Vísindavefnum er leitin að öruggum dögum ekki örugg getnaðarvörn og sagt að algeng þungunartíðni á ársgrundvelli sé um 25%. Ef við berum þetta svo saman smokka þá eru þeir oftast taldir 98% öruggir sem getnaðarvörn séu þeir notaðir rétt en þeir eru einnig, öfugt við frjósemistölvuna, vörn gegn kynsjúkdómum.
Af hverju ætli fólk komist upp með að halda svona augljósu rugli fram athugasemdalaust í sjónvarpsfréttum? Hvað var fréttamaðurinn eiginlega að hugsa? Og lyktaði þessi frétt ekki örlítið af auglýsingu?
Jú, það gerði hún svo sannarlega. Viðmælandi RÚV er kynntur til sögunar sem Lára Bryndís Pálmarsdóttir, kona á barneignaraldri. Á facebooksíðu þar sem frjósemistölvan er falboðin Íslendingum er gefið upp símanúmer. Sé leitað að eigenda númersins á Já.is kemur út skemmtileg niðurstaða. Svo virðist sem Lára Bryndís eigi sér alnöfnu sem selur frjósemistölvuna! Þvílík tilviljun!
Svo að öllu sé haldið til haga: í aðalsjónvarpsfréttatíma RÚV birtist illa dulin auglýsing í gerfi fréttar. Viðmælandi sem kynntur er til sögunnar sem „kona á barneignaraldri" er í raun söluaðili vörunnar sem „fréttin“ er um. Viðmælandinn fær athugasemdalaust að setja í loftið ýmsar fullyrðingar um kosti vörunnar sinnar.
Ef aðstandendum fréttastofu RÚV er annt um orðspor hennar ættu þeir að sjá til þess svona nokkuð gerist ekki aftur. Ef ekki ættu þeir að huga að nafnbreytingu. Mér skilst að Sjónvarpsmarkaðurinn sé á lausu.
Hún talar líka um að hún geti ekki tekið getnaðarvörn sem innihalda hormóna.... Ef hún hefur eignast barn fyrr getur hún fengið koparlykkju, sem innihalda engar hormónar what so ever. Svo ekki nóg með að smokkurinn dugir, þá er til getnaðarvarnir fyrir þær konur sem þola illa hormóna. Svo má líka benda á hitamælir í apótekinu fyrir töluvert lægra verð.
Ég ætla nú ekkert að leggja neinn dóm á gagnsemi eða gagnsleysi þessarar græju sem fjallað var um en fréttin varpar ljósi á það ástand sem nú ríkir á fréttastofu RÚV. Á undanförnum mánuðum hefur tugum reyndra starfsmanna hjá fréttastofu Ríkisútvarpsins verið sagt upp og ungt, fallegt, brosmilt og reynslulaust fólk verið ráðið á lægri launum. Afleiðingarnar eru afar léleg fréttamennska og það er orðið mjög áberandi að aðeins er sagt frá annari hlið máls í hverri frétt, hvort sem um sjónvarp eða hljóðvarp er að ræða.
En varðandi fréttina af "þungunargræjunni" þá er þess skemmst að minnast að um miðjan október sl. taldi RÚV sig tilneytt til að draga til baka frétt af manni á Norðurlandi sem kvaðst vera ánægður með tilteknar aðgerðir ríkisstjórnarinnar. Það hafði nefnilega komið í ljós að hann hafði tengsl við einn stjórnmálaflokkinn. Ég held að nú ætti RÚV að draga ofannefnda frétt til baka sbr. egin yfirlýsingu: “samræmist ekki stefnu Fréttastofunnar að leyna áhorfendur og hlustendur upplýsingum um tengsl viðmælenda við stjórnmálaflokka eða hagsmunasamtök. Fréttin er dregin til baka.” Tilvitnun lýkur.
Væntanlega eru einhverjir hagsmunir þarna á ferðinni en það getur hver sem er sagt sér það að framleiðsla og birting slíkrar "auglýsingar" á besta útsendingartíma hefði kostað mikið fé hefði innflutningsaðili tækisins þurft að borga fyrir það sjálfur. Hver þekkir hvern ?
Fyndið, ég horfði á þessa frétt með öðru auganu og hjó sérstaklega eftir að Lára Bryndís var kynnt sem "kona á barneignaraldri."
Það fyndna er að ég gekk út frá því að hún væri augljóslega hönnuður þessarar græju og að "titillinn" sem fréttastofa RÚV kaus að nota væri til þess gert að vera sniðugt.
Það fer ekkert á milli mála að þetta gæti blekkt marga og er ófaglegt, enda segja mín viðbrögð eflaust meira um mig en RÚV...
Ég sendi til gamans fyrirspurn til auglýsingadeildar ruv.is, um hvað það myndi kosta að kaupa auglýsingu inni í fréttatíma (sem yrði sett fram í viðtalsformi).
Svar hefur ekki borist. Enginn húmor fyrir svona löguðu.
Já, ég held að tölvupóstkerfið á RÚV sé niðri þessa dagana. Ég sendi Óðni Jónssyni fréttastjóra RÚV tölvupóst vegna þessarar fréttar og engin viðbrögð hafa borist.
Hérna eru rannsóknir á tölvunni. http://www.raxmedical.com/clinical-studies.php
Fyrstu rannsóknirnar voru gerðar áður en tölvan var gerð, en þær síðustu voru gerðar á tölvunni eftir að hún var gerð til að kanna öryggi hennar.
Úr þeim rannsóknum kom að tölvan er öryggari en smokkar, hvort sem miðað er við typical use eða correct use. (Lægri Pearl Index).
Ég er á þessari getnaðarvörn og mér sýnist rannsóknirnar legit?????
Þessi getnaðarvörn (sé hún örugg) er The Greatest thing since sliced bread því að hormónalyfin auka líkur á blóðtappa og drepa kynhvöt og lykkjur geta valdið sýkingum og það er scary shit að vera með eitthvað flækt þarna uppi.
Þessar rannsóknir eru alls ekki allar um þessa tölvu, enda eins og þú segir sjálf þá var tölvan ekki til þegar margar þeirra voru gerðar. Þær eru um leitina að öruggu dögunum útfrá breytingum á líkamshita og fleira í þeim dúr.
Auk þess vil ég benda þér á að staðurinn til að leita að hlutlausum upplýsingum um vöru er ekki á heimasíðu framleiðanda hans.
Ef þú vilt borga tugi þúsunda fyrir tölvu sem gerir það sama og blað, blýantur og góður hitamælir þá er það fínt. Gjörðu svo vel.
Þessi grein fjallar hins vegar fyrst og fremst um grímulausa auglýsingastarfsemi og fáránlegar fullyrðingar í sjónvarpsfréttum.
Lokað hefur verið fyrir athugasemdir við þessa færslu. Við bendum á spjallið ef þið viljið halda umræðum áfram.
Karl Neptúnus Hirt - 11/02/11 15:12 #
Svo veltir fólk því fyrir sér hvers vegna maður horfi ekki á sjónvarp.