Eins og flestir lesendur Vantrúar vita þá hafa hin eftirsóttu Ágústínusarverðlaun ekki enn verið gefin í ár. En Ágústínusarverðlaunin eru veitt til lærðra sem leikna guðfræðinga fyrir afrek sín í guðfræðilegum vísindum og hafa verið veitt síðan 2006.
Dómnefnd Vantrúar hefur í tvo mánuði legið yfir ótal tilnefningum sem bárust henni á síðastliðnu ári. Nefndin hefur tilnefnt tíu ummæli og nú eru það lesendur Vantrúar sem ákveða hvaða guðvísindamaður hefur komið með merkasta innleggið í trúmálaumræðuna á Íslandi á árinu 2009
Gefið tilvitnunum eina til fimm stjörnur eftir því hvort þau verðskuldi Ágústínusarverðlaun. Fjöldi stjarna á að vera í beinu samhengi við gæði tilvitnanna, bestu tilvitnarnir verðskulda fimm stjörnur, þær verstu eina. Munið að hér er öllu snúið á haus og sigurvegarinn, sá sem flestar stjörnur mun hljóta, er sú tilvitnun sem ögrar mannlegri skynsemi mest - þau orð sem einungis þrautþjálfur ríkiskirkjufræðingur gæti látið út úr sér að vandlega íhuguðu máli.
Athugið að gefa þarf öllum tilvitnunum stjörnu til að atkvæðið telji. Veljið að lokum Senda neðst á síðunni til að koma atkvæðum ykkar til skila.
Þórhallur Heimisson hefur tvisvar verið tilnefndur og var kosinn verðlaunahafi Ágústínsarverðlaunarinnar 2008. Hann komst að gríðarlega merkilegri niðurstöðu árið 2009:
Það er þess vegna ekki hægt að vera bæði kristinn og fordómafullur.#
Hvort að Hildur hafi ekki bara hitt naglan í höfuðið þegar kemur að muninum milli fullorðna og barna. Fullorðið fólk tekur ekki öllu sem gefnu, en börn gera það, sérstaklega þegar það kemur frá munni fullorðins fólks:
Að prédika fyrir framan fullorðið fólk eins og ég er að gera núna felur ekki í sér sömu ábyrgð vegna þess að hér erum við í jafningjasamskiptum og ég geri ráð fyrir því og ætlast til þess að þið takið við hugrenningum mínum með gagnrýnni hugsun, ég get ekki gert ráð fyrir því þegar ég tala við börn og unglinga, ég verð alltaf að gera ráð fyrir því að þau trúi og treysti öllu sem ég segi. #
Einar Karl Haraldsson fær tilnefningu fyrir mikla uppgötvun á sviði stjórnmálafræði, guðleysingjar virðast vera að taka yfir stærstu stjórnmálaflokka landsins:
Það er mjög merkilegt fyrirbæri sem er í gangi núna og sem kallar kannski á öðruvísi viðbrögð og það er það að það eru ákveðnir hópar sem eru markvisst að fara að vinna inn í stjórnmálaflokkana með viðhorf og skoðanir sem eru beinlínis nánast miðuð gegn kristni og sérstaklega Þjóðkirkjunni.
...
En það eru sem sagt bæði hópur eins og Vantrú og húmanistarnir, Siðmennt, sem eru farnir að skipuleggja sig með þessum hætti inní stjórnmálaflokkunum. Þetta var mjög áberandi bæði á landsfundi Samfylkingarinnar og á landsfundi Sjálfstæðisflokksins. - Í Lóðrétt eða Lárétt á Rás1 þann 10.05.2009
Séra Guðný Hallgrímsdóttir bendir á gömul sannindi:
Það eru gömul sannindi og ný að trúarþörf manneskjunnar er eins rótlæg og leitin að móðurbrjósti. #
Karl biskup fær að sjálfsögðu tilnefningu fyrir að hrekja með sannfærandi hætti málflutning guðsafneitara:
Í Biblíunni segir: „Heimskinginn segir í hjarta sínu: Enginn Guð!“ Og það er víst alveg áreiðanlega satt sem vitur sagði á öldinni sem leið: „Sá sem trúir ekki á Guð trúir ekki engu. Nei, hann trúir öllu!“ #
Séra Gunnlaugur fær tilnefningu fyrir ummæli úr blaðagrein sem má best lýsa sem herópi gegn hatrömmum árásum á sókn Þjóðkirkjunnar:
Engum dylst að fámennir hópar vinna skipulega gegn kristinni trú og kirkju um þessar mundir, oft með látum og stóryrðum. Það er ekkert nýtt að tekist er á um trú og kirkju, en fyrrum var það oftast gert af virðingu með málefnalegum rökum. En það veldur áhyggjum ef tómlæti á meðal fólks gagnvart trú og kirkju eykst og börnin fara á mis við bænagjörð og helga siði í uppvexti. Kristinni trúarfræðslu hefur verið vikið til hliðar í grunnskólunum samanborið við þá tíð þegar ég var í barnaskóla, en þá hófst í mínum bekk hver einasti skóladagur á Faðir vor, og kristinfræði var ein af aðalnámsgreinum skólans. Við skólasystkinin höfum haft á orði hversu þakklát við erum fyrir það allt.
Hefur þessi þróun orðið til góðs? Eru börnin betur undirbúin fyrir lífið án uppeldis í kristinni trú og helgum siðum? Því hefur verið haldið fram, að ofbeldi og virðingarleysi í þjóðlífinu vaxi þegar tómlætið og andófið gegn trúnni eykst. Einnig þegar tilvist Guðs hættir að skipta fólkið máli, þá dofni vitundin um það sem er virðingarvert og kærleiksríkt. Getur það bitnað á fjölskyldulífinu eða á umgengni samferðafólks hvers við annað og stofnanir í dagsins önn? (Þjóð með von - Morgunblaðið 07.11. 2009)
Séra Sigurður gerði stórkostlega uppgötvun á sviði syndafræða í fyrra:
Allt er fyrirgefið í þessum heimi, allt getur Guð umborið, jafnvel það að mæla gegn Jesú sjálfum. Aðeins eitt er ekki fyrirgefið og það er að mæla gegn Heilögum anda. Hvað þýðir það?
...
Að hallmæla gegn Heilögum anda er einfaldlega trúleysi, að hafna Anda Guðs í okkur, sem segir að Guð sé Guð og maðurinn sé heimilislaus án trúar og ástartengslanna við Guð. #
Í þessum hvassyrtu ummælum bendir séra Gunnar á hverjar afleiðingar hins ógeðslega guðleysis eru:
Sé Guð ekki til þá veit ég ekki hvaða von, tilgang, merkingu eða gildi má finna í lífinu yfirleitt þegar allt kemur til alls. Allt er þá einfaldlega eins og það er og hefur ekkert að gera með það sem okkur finnst að eigi að vera. #
Séra Haraldur lét þessi hjartnæmu ummæli falla eftir að hann sagði frá sögu um konu sem reif út augun sín og fékk önnur frá guði:
Ég verð að hryggja efasemdarmanninn með því að segja að það geri ég. Ég trúi þessu og mörgu fleiru sem er miklu ótrúlegra en þetta. #
Sagt í predikun þar sem hann kvartar yfir því að það megi ekki "fræða leikskólabörnin í kristinni trú" þar sem það er svo frábært að "[leyfa börnunum] að koma til Jesú":
Já, það er merkilegt, eiginlega með hreinum ólíkindum, hve markvisst og hatrammlega er barist gegn iðkun og miðlun kristinnar trúar á opinberum vettvangi, einkum þegar börn og ungmenni eiga í hlut. Tilgangurinn helgar meðalið og ekki að sjá að fólk leggi upp úr því að vera sjálfu sér samkvæmt.#
Movable Type
knýr þennan vef