Allar færslur Allir flokkar Sos Um félagið Úrskráning Lógó Spjallid@Vantru Póstfang Vantru@Facebook Vantru@Youtube Vantru@Twitter

Séra Helgi Hróbjartsson barnaníðingur

Helgi Hróbjartsson níðingur

Engill af himnum var hann kallaður, hræsnarinn og kynferðisglæpamaðurinn sem nú á að fara um silkihönskum. En voru brot hans fleiri? Hvað á að gera fyrir þolendur þessa óþokka? Er það kannski aukaatriði?

Fagráð um meðferð kynferðisbrota hefur haft málið til umfjöllunar. Viðkomandi presti voru kynntar þær ásakanir sem hann var borinn. Brotin áttu sér stað fyrir 25 árum og eru því fyrnd að lögum. Viðkomandi prestur hefur ekki gegnt föstu embætti í kirkjunni um árabil. Hann mun sökum brotanna ekki gegna störfum sem prestur né koma fram á vegum þjóðkirkjunnar, safnaða hennar, stofnana eða kristilegra félaga sem starfa innan vébanda hennar. #

Þannig hljóðaði fyrsta fréttin. Af fréttinni mætti ráða að hér sé um gamlan "breyskleika" að ræða og presturinn hafi ekki starfað fyrir Þjóðkirkjuna lengi. Það var þó síðast í vor sem hann starfaði fyrir Glerárkirkju á Akureyri, þar á meðal við fermingarfræðslu. (# pdf) Helgi laðaðist einmitt að ungum drengjum og misnotaði þá. Tölum bara íslensku.

Síðar kom í ljós að um þrjú brot var að ræða og að presturinn hefði játað en flúið land! (#) Það heyrir til undantekninga að prestur játi á sig brot því heðfbundin viðbrögð hjá kirkjunnar þjónum eru afneitun. Helgi fær prik fyrir játninguna, kannski er hann ekki algjörlega samviskulaus. En datt einhverjum í hug að spyrja hann hvort brotin væru fleiri? Það vill svo til að við í Vantrú vitum um fleiri fórnarlömb þessa manns. Við vitum um ungan dreng sem fór illa út úr Helga Hróbjartssyni en hann getur ekki sagt sögu sína því hann tók sitt eigið líf nokkru seinna.

Þegar ég heyrði þessa sögu fyrir þremur árum varð ég reiður. Um þær mundir var ég að berjast gegn svokallaðri Vinaleið í skóla barnsins míns þar sem prestur var búinn að hreiðra um sig í skólanum til að sinna "kristilegri sálgæslu". Þeir sem voguðu sér að gagnrýna aðkomu presta að skólum, sem ættu að vera hlutlausir í trúmálum, fengu óspart að heyra að þeir væru siðlaust pakk sem væri bókstaflega að koma í veg fyrir að ung börn fengju hjálp. Ein eiturpillan sem við fengum var frá bróður Helga, Jón Dalbú Hróbjartssyni prófasti. Jón Dalbú flutti nefnilega prédikun, tveimur dögum eftir að ég frétti af óhæfuverkum Helga, og kallaði hana "Þegar Jesú verður reiður". Þar segir meðal annars:

Andstæðingar kristninnar fara mikinn í nútímanum, hin andlega barátta er hörð og oft óvægin, það er enn reynt að grýta fulltrúa sannleikans og gæskunnar í þessum heimi...

Þegar ég las þetta varð ég reiður, bálreiður, og lái mér hver sem vill. Samstundis settist ég niður og skrifaði grein sem ég kallaði Djöfulssynir, Guðssynir og Hróbjartssynir og lokaorðin voru þessi, takið eftir feitletruninni:

Þessi prédikun er leirburður, bull og þvættingur. Illska og grimmd er sögð náð og mildi, heiðni er sögð kristni. Fáránlegar og barnalegar goðsögur eru sagðar sannleikur og orði menn efasemdir eru þeir sagðir grýta “fulltrúa sannleikans og gæskunnar”. Nei, þeir sem halda fram bulli og vitleysu eru ekki fulltrúar sannleikans. Þeir sem formæla öðrum, hóta angist og kvölum um alla eilífð og myrða afkvæmi sín eru ekki fulltrúar gæskunnar.

Verst er þó skinhelgin sem skín úr hverju orði. Skinhelgi er hræsni, sem hefur á sér yfirskin trúar og helgi. Ég fullyrði að þeir sem halda á lofti bulli og vitleysu eru fulltrúar lyginnar. Þeir sem sveipa sig kufli gæsku en valta svo yfir aðra, brjóta lög og mannéttindi, svívirða börn og sjúka, eru fulltrúar illskunnar. Í röðum kristinna manna er allt of mikið af slíkum fulltrúum (e.t.v. nær en Hróbjartsson heldur).

Nú lítur út fyrir að mál Helga ætli að fjara út. Það er óhæfa. Helgi starfaði lengi í Noregi, sem sendiráðsprestur Íslendinga. Og svo var hann mikið í Afríku þar sem hann var allt að því í guðatölu. # Ég er nokkuð kunnugur í Afríku og get ímyndað mér hver staða Helga hefur verið í Eþíópíu þar sem hann flaug um og gat slegið um sig með fjármunum sem góðviljað fólk á Íslandi hefur gefið til "hjálparstarfs" en fór sennilega að mestum hluta í trúboð. Ég þori að hengja mig upp á að í Eþíópíu er ekkert fagráð í kynferðismálum. Þar þekkist ekki umræða um kynferðislega áreitni, kynferðisbrot presta eða annað slíkt - m.ö.o. er þar gósenland siðblindra öfugugga. Enda hefur kaþólska kirkjan stundað að senda kynferðisglæpamenn sína til Afríkulanda (og reyndar til Íslands #).

Á visir.is í dag er grein sem kallast Áframhaldandi rannsókn á kristniboða ólíkleg og þar segir:

Biskupsstofa staðfestir ásakanirnar og játningar prestsins. Hann muni sökum þessa ekki gegna störfum sem prestur né koma á nokkurn hátt fram á vegum þjóðkirkjunnar.

Heitir þetta ekki að stinga málinu undir stól? Ætlar kirkjan ekkert að gera fyrir þolendurna? Dettur engum í hug að spyrja hvort brotin eru fleiri? Hvar er metnaður kirkjunnar? Hvar er sannleiksástin? Hvar er heiðarleikinn? Hvar er sanngirnin? Oft er maður þakklátur fyrir að það er ekki hátt á þessum höfðingjum risið, en ekki þegar kemur að úrvinnslu svona sora.

Reynir Harðarson 21.09.2010
Flokkað undir: ( Siðferði og trú )

Viðbrögð


Jóhannes Proppé - 21/09/10 12:54 #

Lygin pedó prestaskömm

Perri og níðingur

Helvítis fagráðs handarvömm

Hrjóbjartsson er slyngur.


Reynir (meðlimur í Vantrú) - 21/09/10 17:07 #

Ekkert hefur biskup sagt um málið. Ekki einn einasti prestur hefur tjáð sig. Og biskupsstofa reynir að ljúga sig út úr málinu.

Upplýsingafulltrúinn, Steinunn Arnþrúður Björnsdóttir, lýsti því aðspurð við blaðamann að málið væri „slúður“. Örfáum dögum seinna viðurkenndi Biskupsstofa að málið hefði átt sér stað og presturinn játað.

Já, mikið hefur kirkjan lært síðan 1996. Gerum ekkert, segjum ekkert, sópum þessu bara út fyrir landsteinana og vonum að fólk gleymi þessu.


Dulnefni - 21/09/10 17:53 #

Fróðlegt að lesa en hver ættu viðbrögð kirkjunnar að vera að mati Vantrúar. Á kirkjan að bannfæra manninn að hætti kaþólskra?


Birgir Baldursson (meðlimur í Vantrú) - 21/09/10 18:02 #

kirkjan að bannfæra manninn að hætti kaþólskra?

Hvernig væri t.d. að komast að því hvort brot hafi átt sér stað svo nýlega að þau sé hægt að taka upp sem lögreglumál? Þessi maður á ekki að sleppa við dóm og refsingu ef hann hefur haldið uppteknum hætti frá því fyrir 25 árum.


Reynir (meðlimur í Vantrú) - 21/09/10 18:19 #

Er ekki augljóst hvað kirkjan á að gera? Hún á að rannsaka málið og komast að því hvort um fleiri fórnarlömb er að ræða - og fá út úr Helga hver þau eru/voru. Það á líka að ræða við samstarfsmenn Helga og alla þá sem gætu hafa orðið varir við brot hans eða afleiðingar þeirra.

En mikilvægast af öllu er að kirkjan á að axla ábyrgð, viðurkenna sekt sína og reyna að bæta fyrir brotin - ekki með skipun nefnda og ráða eða nýjum verkferlum og bla bla heldur með því að greiða þolendunum miska- og skaðabætur. Nóg fær hún af milljónum árlega frá almenningi.


Carlos - 21/09/10 18:21 #

Ég held að tillaga Birgis sé eina leiðin sem kirkjan eða saksóknari geta farið. Annað er ekki boðlegt.


Nafnlaus Jónsson - 21/09/10 18:44 #

Ég er einn þeirra sem Helgi braut gegn. Ég vil bara segja það hér að það var Helgi Hróbjartsson sem braut gegn mér en ekki kirkjan. Ég vil líka taka það fram að æsifréttamennska DV varðandi þetta mál er akkúrat það: æsifréttamennska. Kirkjan hefur á engan hátt reynt að þagga þetta mál eða hylma yfir gerandanum eða því sem gert var. Hún hefur hins vegar skyldur til þess að viðhafa vönduð vinnubrögð í máli sem þessu og það hefur hún svo sannarlega haft. Aðdróttanir um annað er skrumskæling á sannleikanum og útúrsnúningar og ég get vissulega vottað að kirkjan hefur mikil lært síðan 1996 og ég hef fengið að njóta þess.

Þá vil ég hvetja þig Reynir Harðarson til þess að koma upplýsingum áfram til fagráðsins ef þú veist um aðra þolendur. Þar er tekið vel á móti fólki en varðandi frekari rannsókn kirkjunnar þá hefur hún takmarkaða möguleika til þess að ná fram einhverju frekar nema þolendur gefi sig fram eða Helgi bjóði sjálfur fram frekari upplýsingar.


Reynir (meðlimur í Vantrú) - 21/09/10 18:50 #

Nafnlaus, "fagráðinu" hefur verið gert viðvart. Ég "hef enga ástæðu til að rengja" það sem fram kemur í DV (svo maður vitni nú í biskupinn).

Þar sem Helgi braut af sér í starfi sínu á vegum kirkjunnar (í því tilfelli sem ég þekki) þá ber kirkjan ábyrgð, brotið er líka hennar.


Nafnlaus Jónsson - 21/09/10 19:11 #

Gott að vita það Reynir að þú hefur meiri trú á því að DV segi sannleikann í þessu máli en ég sem er þáttakandi í því! Ef Steinunn Arnþrúður hefur sagt að hún viti ekkert um málið þá hefur hún ekkert vitað um málið á því stigi enda er það trúnaðarmál á meðan rannsókn þess stendur og játning liggur ekki fyrir. Kirkjan sendir að sjálfsögðu ekki út fréttatilkynningu á alla starfsmenn sína um leið og ásakanir sem þessar koma fram enda gerir hún sér far um að vanda vinnubrögð sín (a.m.k. nú í dag) í þessum málum. Og úr því þú spyrð: "Ætlar kirkjan ekkert að gera fyrir þolendurna?" þá get ég svarað því hér og nú að kirkjan er einmitt að því þótt ég hafi ekki séð ástæðu til þess að básúna það í fjölmiðla enda kemur það engum við nema mér sjálfum og fjölskyldu minni.


Matti (meðlimur í Vantrú) - 21/09/10 19:17 #

Ef Steinunn Arnþrúður hefur sagt að hún viti ekkert um málið þá hefur hún ekkert vitað um málið

Hún sagði meira en að hún vissi ekkert um málið.

enda kemur það engum við nema mér sjálfum og fjölskyldu minni.

Hvað með önnur fórnarlömb þessa manns? Þykir þér trúlegt að fórnarlömbin hafi bara verið fjögur?


Jói - 21/09/10 19:33 #

Þessi kristniboði er náttúrulega ákaflega vel tengdur í kirkjuna. Fyrir utan að vera prestur sjálfur þá er bróður hans prestur, systursonur hans, kona systursonar hans, tvö systkini hennar líka og pabbi þeirra þriggja var biskup. Það er því kannski skiljanlegt að flestir þarna vilji gleyma þessu sem fyrst. Heppilegt fyrir þau að möguleg fórnarlömb eru mörg vel staðsett í myrkviðum Afríku og eiga sér engan talsmann og munu seint hafa samband við fagráð kirkjunnar.


Nýr lesandi - 21/09/10 21:39 #

Sýnið viðbrögð, en vinsamlegast sleppið öllum ærumeiðingum.

Þegar Helgi Hróbjartsson er kallaður óþokki, hræsnari og kynferðisglæpamaður, páfinn er kallaður fábjáni, mannleysa, kjólklæddur apaköttur og karlsauður, hversu langt má maður þá ganga til að það kallist ærumeiðingar?


Einar K. (meðlimur í Vantrú) - 21/09/10 22:31 #

"Sýnið viðbrögð, en vinsamlegast sleppið öllum ærumeiðingum.

Þegar Helgi Hróbjartsson er kallaður óþokki, hræsnari og kynferðisglæpamaður, páfinn er kallaður fábjáni, mannleysa, kjólklæddur apaköttur og karlsauður, hversu langt má maður þá ganga til að það kallist ærumeiðingar?"

Í tilviki HH má vel réttlæta slíka orðnotkun. Er e-ð rangt við þessar lýsingar á barnaníðingi sem hefur játað voðaverk sín og misnotað traust fólks í skjóli meints heilagleika?


Ásdís - 21/09/10 23:12 #

Ég ætla ekki að taka afstöðu með eða á móti kirkjunni hér, og sömuleiðis ekki með eða á móti stefnu Vantrúar.

Ég velti því bara fyrir mér hvort þér finnist þú eitthvað betri en kirkjan ef þú fréttir af misnotkun fyrir þremur árum og gerðir ekkert í því þá? Því ef að Helgi hefur misnotað í skjóli stöðu sinnar í Afríku síðustu þrjú árin hefði verið hægt að koma í veg fyrir það með því að koma fram með þessar ásakanir þá.


Reynir (meðlimur í Vantrú) - 22/09/10 01:26 #

Ég velti því bara fyrir mér hvort þér finnist þú eitthvað betri en kirkjan ef þú fréttir af misnotkun fyrir þremur árum og gerðir ekkert í því þá?

Við vorum í erfiðri stöðu þar sem við höfðum aðeins frásögn vinar þolandans og þolandinn svipti sig lífi. Eins og nærri má geta eru þessi mál vandmeðfarin og þungbær. Við ræddum mikið að rétt væri að gera kirkju- eða barnaverndaryfirvöldum viðvart en vinurinn taldi það ekki þjóna neinum tilgangi og vildi ekki tengja nafn sitt við málið af ýmsum og persónulegum ástæðum. Við svo búið var staða okkar svo að segja vonlaus og fagráð kirkjunnar, barnavernd eða hvaða apparat sem er hefði lítið getað gert með slíka frásögn þriðja aðila.

Konunum í máli Ólafs biskups var ekki trúað, þótt þær væru margar og segðu frá reynslu sinni frá fyrstu hendi. Hefði fulltrúa Vantrúar verið trúað eða hefði verið litið á frásögnina sem tilraun til að grýta "engil af himnum", "fulltrúa sannleikans og gæskunnar í þessum heimi"?


Jói - 22/09/10 07:56 #

Það er enginn vafi á því að kirkjan hefði tekið jafn vel á þessu máli og máli Auðar Eir.


Einar Þór - 22/09/10 18:39 #

"Ætlar kirkjan ekkert að gera fyrir þolendurna?" þá get ég svarað því hér og nú að kirkjan er einmitt að því þótt ég hafi ekki séð ástæðu til þess að básúna það í fjölmiðla enda kemur það engum við nema mér sjálfum og fjölskyldu minni.

Tja, þetta er jú þjóðkirkja Íslendinga og glæpir hennar og hugsaneg yfirbót því á margann hátt viðkomandi allri þjóðinni.


Alveg nafnlaus - 23/09/10 19:12 #

Ég er einn af þeim sem kærðu Helga. Þekki þetta þ.a.l. betur en flestir aðrir. Vil leggja orð í belg:

"Heitir þetta ekki að stinga málinu undir stól? Ætlar kirkjan ekkert að gera fyrir þolendurna? Dettur engum í hug að spyrja hvort brotin eru fleiri? Hvar er metnaður kirkjunnar? Hvar er sannleiksástin? Hvar er heiðarleikinn? Hvar er sanngirnin?"

Nei, þetta heitir ekki að stinga málinu undir stól. Málið er fyrnt, en Helgi fær ekki að koma nálægt starfi kirkjunnar, kristniboðssambandsins eða annara slíkra samtaka.

Kirkjan, eða öllu heldur fagráðið, hefur gert æði mikið fyrir okkur og boðist til að gera miklu, miklu meira. Í greininni er látið í veðri vaka að kirkjan hafi ekkert gert fyrir okkur, en það er alls ekki svoleiðis og þið hafið líklega ekkert fyrir ykkur í því.

Jú, þeim datt í hug að athuga hvort brotin væru fleiri. Það er í athugun, þó það sé erfitt að rannsaka.

Metnaður kirkjunnar - það er ekkert út á það að setja í þessu máli. Kirkjan tók vel, fljótt og örugglega á þessu máli og afgreiddi eins vel og hægt var.

Hvar er sannleiksástin... ég held að það segi sig sjálft, málið var tekið fyrir, rannsakað og afgreitt eins og hægt var miðað við að brotin eru fyrnd. Það er ekkert hægt að setja út á sannleiksást, heiðarleika, sanngirni eða svoleiðis hjá kirkjunni í þessu máli. Þeir stóðu sig miklu, miklu betur en ég þorði að vona.

Eins er engan veginn réttlætanlegt að halda því fram að farið sé um hann silkihönskum. Því fer fjarri.

Varðandi það að Helgi sé farinn úr landi - hvernig á að koma í veg fyrir það? Eins og áður hefur komið fram - málin eru fyrnd. Þar er við löggjafann að sakast, ekki kirkjuna. Jú, og kannski mig fyrir að láta ekki vita fyrr. Kirkjan gerði sitt, algerlega og eins vel og hægt var.

Ef einhver veit um nýrri brot, endilega látið lögregluna vita.


Jón Steinar - 28/09/10 02:06 #

Fórnarlömbin vilja bera blak af kirkjunni hér og er það máske í ýmsu réttlætanlegt að aðskilja glæpinn og stofnunina, en þó er það stofnunin, sem að sögn þeirra hefur veitt þeim einhverjar bætur. Hún er nefnilega ábekingur þjóna sinna og viðurkennir sekt.

Eitt vil ég þó fá að vita og tela að öllum komi það við. Sérstaklega til að koma í veg fyrir illan orðróm, ef ske kynni.

Í hvaða formi hefur aðstoð kirkjunnar við fórnarlömb verið? Sálgæsla? Fégjafir eða fébætur? Ég vil fá að vita hvort hér koma peningar við sögu.


Reynir (meðlimur í Vantrú) - 02/07/11 14:52 #

Helgi Hróbjartsson er farinn aftur til Afríku líkt og ég var reyndar búinn að láta mér detta í hug og nefna í nýrri grein.

Presturinn Helgi Hróbjartsson hefur dvalið í Eþíópíu í að minnsta kosti þrjá mánuði það sem af er árinu. Hann hefur um árabil stundað þar trúboð en hann viðurkenndi nýlega að hafa misnotað þrjá íslenska drengi fyrir um 25 árum síðan. Málið var vinum og kunningjum Helga mikið áfall en Helgi hafði fram að því verið þekktur fyrir óeigingjarnt starf og hafði ósérhlífni hans vakið eftirtekt út fyrir landsteinana.

Samkvæmt heimildum DV hefur Helga verið úthýst úr kristniboðafélaginu sem hann vann áður fyrir og hefur prestum og öðrum starfsmönnum kirkna á svæðinu verið gert viðvart um kynferðisbrot Helga. Þá hafa forsvarsmenn kirkjunnar á svæðinu þar sem Helgi hefur dvalið áhyggjur af veru hans í bænum.

Lokað hefur verið fyrir athugasemdir við þessa færslu. Við bendum á spjallið ef þið viljið halda umræðum áfram.