Martin Gardner er látinn

Martin Gardner er látinn (21. október 1914 – 22. maí 2010). Hann var einn helsti gagnrýnandi gervivísinda á 20. öld.

Fyrstu kynni mín af honum voru er ég festi kaup á bókinni Fads & Fallacies in the name of science (frá 1957) þar sem hann fjallar um alls konar hjáfræði s.s. kenningar um Atlantis, pýramídana, fljúgandi fruðuhluti, lithimnufræði, smáskammtalækningar, dulskynjun, vísindakirkjuna og margt fleira.

Martin Gardner gat sér fyrst gott orð fyrir stærðfræði sem dægradvöl fyrir almenning. Ein bóka hans um þrautir og þverstæður hefur komið út á íslensku: Aha, ekki er allt sem sýnist. Þrátt fyrir að vera einn helsti gagnrýnandi gervivísinda var hann trúaður, en honum var í nöp við skipulögð trúarbrögð og kallaði sig "heimspekilegan theista".

Í minningu hans birti Scientific American grein um hann frá 2002 þar sem fjallað er örlítið um framlag hans og bókina sem áður var minnst á. Og minningargrein um hann í New York Times.