Aðalfundur Vantrúar 2010: Kreppa og ekki kreppa

Aðalfundi Vantrúar er nýlokið, en hann fór fram á lokuðu spjalli Vantrúarmanna. Fráfarandi formaður fór yfir það helsta sem gerðist á síðasta ári, svo sem okkar árlega bingó á föstudaginn langa og lát Helga Hóseassonar, sem var eini heiðursfélagi Vantrúar. Hápunktur ársins hjá Vantrú var væntanlega sá að við aðstoðuðum þúsundasta einstaklinginn við að leiðrétta trúfélagsskráningu sína. Á árinu bættust líka við 30 meðlimir í Vantrú. En árið 2009 var kannski fyrst og fremst ár kreppu, kosninga og IceSave.

Enn sér hvorki fyrir endann á Icesave né kreppu og enginn veit hversu mikið púður fer í kosningar. En við höldum áfram baráttu okkar gegn boðun hindurvitna. Brátt geta lesendur síðunnar tekið afstöðu til hinna árlegu Ágústínusarverðlauna, sem við veitum góðfúslega fyrir bjánalegustu athugasemdir ársins í svokallaðri guðfræði. Ný stjórn mun hins vegar fyrst og fremst einbeita sér að eftirfarandi málum:

1. Trúarinnrætingu og trúarlegum áróðri í skólum, á öllum skólastigum!
2. Væntanlegu frumvarpi um breytingar á lögum um skráningu barna við fæðingu í trúfélag móður.
3. Kukli, bulli og gervivísindum.
4. Minnisvarða um Helga Hóseasson í samvinnu við hóp áhugamanna um það á Facebook.