Miðborgartrúboði Reykjavíkurborgar

Séra Þorvaldur Víðisson miðborgartrúboði

Vísir segir frá því að Þorleifur Gunnlaugsson, fulltrúi VG í borgarráði, hafi lagt til á fundi borgarráðs í síðustu viku að borgin hætti að greiða helming launa miðborgarprests.

Þorleifur telur ekki réttlætanlegt að borgin greiði 4,6 milljónir á ári fyrir hálft starf miðborgarprests á sama tíma og skera þarf niður hjá borginni. Hann telur að þeir peningar sem ríkiskirkjan fær frá skattgreiðendum á ári ættu að duga fyrir "meintri þörf á sálgæslu á svæðinu".

Tillaga Þorleifs var ekki samþykkt þar sem fulltrúar Samfylkingarinnar, Sjálfstæðisflokksins og Framsóknarflokksins greiddu atkvæði gegn henni.

Í fundargerð er hægt að lesa bókun VG.

Mikill niðurskurður í fjárhagsáætlun Reykjavíkur annað árið í röð setur mark sitt á nauðsynlega grunnþjónustu borgarinnar. Við þessar aðstæður er það ekki verjandi að leggja 4,6 milljónir í starf miðborgarprests. Í og við miðborgina er fjöldi presta og annarra starfsmanna þjóðkirkjunnar sem þiggja laun sín af skattpeningum borgarbúa en það fjármagn ætti að duga fyrir meintri þörf á sálgæslu á svæðinu. Af hálfu borgarinnar er öðrum þáttum í starfi miðborgarprests sinnt og má þar nefna starf Þjónustumiðstöðvar Miðborgar og Hlíða, íþrótta- og tómstundasvið og velferðarsvið.

Hver er tilgangur Miðborgarprests?

Það hefur oft vakið furðu okkar hér á Vantrú hvað borgin hefur sett mikið fé í ríkiskirkjuna og félög henni tengdri. Þannig hefur borgin styrkt sumarbúðir ríkiskirkjunnar um milljónatugi og KFUM/K hafa einnig fengið verulega styrki frá borgarbúum. Duga milljarðarnir frá skattgreiðendum virkilega ekki?

Hver er eiginlega tilgangurinn með embætti Miðborgarprests sem séra Þorvaldur Víðisson gegnir um þessar mundir? Við Austurvöll er kirkja þar sem starfa tveir prestar í fullu starfi og tveir æskulýðsfulltrúar, þar á meðal Þorvaldur miðborgarprestur sennilega í hálfu starfi þegar hann er ekki að boða kristni í miðbænum utan Dómkirkju. Að auki hafa tveir prestar á biskupsstofu sérstakar skyldur við Dómkirkjuna. Ekki er langt að rölta frá Austurvelli að Hallgrímskirkju þar sem starfa tveir prestar til viðbótar auk fleiri starfsmanna. Allt er þetta í boði skattgreiðenda og ætti að duga til að sinna þörfum trúmanna sem vafra um miðbæinn.

Markmið miðborgarprests er meðal annars að kristna ungt fólk og það gerir hann í boði Reykjavíkurborgar. Sem útsvarsgreiðandi í borginni mótmæli ég þessu harðlega.

Forveri Þorvaldar vafraði stundum um miðbæinn um helgar og ræddi við ölvuð ungmenni. Sumum ungmennum þótti gaman að grínast í presti og ekki vil ég útiloka að einhverjum hafi séra Jóna Hrönn hjálpað í ölvímu. Mér finnst frekar vafasamt að iðka trúboð meðal fólks í áfengisvímu og veit ekki hvort séra Þorvaldur hefur stundað það.

Séra Þorvald hef ég tvisvar séð undanfarin ár. Fyrra skiptið var þegar ég mætti á bænagönguna árið 2007. Þegar ég rölti í miðbæinn prédikaði Þorvaldur yfir lýðnum um að auka þyrfti kristnifræðikennslu í skólum. Á eftir honum flutti ungur maður ræðu um að sparka þyrfti djöflinum frá Íslandi. Mér þótti þetta furðuleg samkoma sem Þorvaldur tók þátt í þá.

Seinna skiptið mættum við tveir í MR og ræddum um trú og skóla. Það var svo sem ekki eftirminnilegt fyrir utan það að Þorvaldur gerði engan greinarmun á trú og trausti - virtist telja það boðlegan málflutning að líkja saman trú sinni á Gvuð og trausti nemenda til kennara.

Hættum að mismuna

Þarf ég virkilega að greiða Þorvaldi, og þeim sem tekur við starfinu þegar Þorvaldur fær almennilegt brauð, laun gegnum gjöld mín til Reykjavíkurborgar? Fyrir þessar 4,6 milljónir sem presturinn fær á ári frá borginni fyrir hálft starf er eflaust hægt að greiða öðru fólki fyrir að gera eitthvað gagnlegt í fullri vinnu.

Er ekki tímabært að Reykjavíkurborg hætti að mismuna borgarbúum eftir trúarskoðunum?