Velheppnað bingó

Í gær, föstudaginn langa, hélt Vantrú sitt árlega bingó á Austurvelli. Mikil stemming var á svæðinu enda er þessi viðburður orðinn fastur liður á þessum degi. Á annað hundrað manns tók þátt í táknrænum gjörningi til að minna á að tengsl ríkis og kirkju á Íslandi eru óeðlileg. Boðið var upp á heitt kakó og kleinur. Eftir að bingóinu lauk var haldin messa í hálftómri Dómkirkjunni.

Bingóhald Vantrúar byggir á forsendum borgaralegrar óhlýðni. Við teljum að lögin sem banna bingóhald á föstudaginn langa, sem og önnur lög er varða forréttindi ríkiskirkjunnar, vera í ósamræmi við þau grundvallarmannréttindi sem trúfrelsi er. Við brjótum lögin til að vekja athygli á óeðlilegu forréttindum ríkiskirkjunnar.

Þrátt fyrir að lögreglunni ætti að hafa verið fullkunnugt um þetta ólöglega bingóhald okkar kom engin til að stöðva það. Lögreglan sá sér ekki heldur fært að stöðva bingóið í fyrra eða árið þar áður. Það virðist ríkja meiri skynsemi hjá lögreglunni en löggjafarvaldinu.

Með tíð og tíma verður öllum lögum sem tryggja forréttindi eins trúarhóps umfram aðra hrundið. Það væri eðlilegast að Alþingi flýti því eins og mögulegt er. Ríkisvaldið ætti ekki að skipta sér að trúarlífi almennings.

Hér eru nokkrar myndir sem Kristján Lindberg tók: