Allar færslur Allir flokkar Sos Um félagið Úrskráning Lógó Spjallid@Vantru Póstfang Vantru@Facebook Vantru@Youtube Vantru@Twitter

Ágústínusarverðlaun Vantrúar 2007

Vantrú hefur nú í tvö ár veitt verðlaun fyrir framfarir í kristilegum guðvísindum sem prestar og aðrir trúmenn láta útúr sér á hverju ári sem fengið hefur nafnið Ágústínusarverðlaunin. Til stendur að gera þetta að veglegri hátíð í framtíðinni þar sem verðlaunahöfum verða veitt glæsilegt og innrammað viðurkenningaskjal fyrir ívíð kærleiksríkan og kristilegan málflutning. Árið 2007 komu vissulega ýmis gullkorn frá pontum og bloggum trúaðra guðfræðinga rétt einsog árið 2006 og 2005, og vonandi verður engin skortur á viðlíka guðfræðilegum afrekum þetta árið.

6. Guðni Ágústsson formaður Framsóknarflokksins skilgreinir kristið siðgæði:

Það er að standa vörð um kirkjuna. [Kastljós 13.12.2008]

5. Jóna Hrönn Bolladóttir sóknarprestur í Garðabæ um trúboð kirkjunnar í skólum undir veigrunarheitinu „Vinaleið“:

Það er bara ekki hægt að nota þetta orð lengur, trúboð er bara orðið jafnt og ofbeldi. Þannig að það er bara eðlilegt að við notum bara ekki orðið trúboð, en það er það. #

4. Þórhallur Heimisson sóknarprestur í Hafnarfirði sannar upprisu Krists:

Tilvera kristinnar kirkju allt til þessa dags er sönnun fyrir upprisu Jesú Krists. #

3. Jakob Ágúst Hjálmarsson sóknarprestur í Dómkirkjunni um trúboða:

Ég meina að okkur sé ekki aðeins heimilt heldur skylt að krefja trúabragðaboðendur um glóruna í því sem þeir fara með. #

2. Herra Karl Sigurbjörnsson biskup metur stöðuna:

Átök um lífsskoðanir hafa verið áberandi hér á landi nú í vetur. Það er sem hin harða og kalda andstaða gegn kristninni sem einkenndi upphaf fyrri aldar sé gengin aftur í hatrömmum andtrúaráróðri. Hinn andlegi hafís guðleysisins lónar fyrir landi, og ískalda og vonarsnauða þoku stafar frá honum. Gegn því stendur hinn hlýi vorþeyr upprisutrúar og vonar. [Fréttablaðið 24.12.2007 bls.26]

1. Herra Sigurbjörn Einarsson biskup um hjónabönd samkynhneigðra:

Út af fyrir sig skaðar það ekki hjónabandið sem stofnun að þeir giftist. Það er bara algjör fjarstæða." "Óskynsamlegt sé að vatna út hjónabandið með slíkri skammsýni.

Aukaverðlaun fyrir skammtaguðfræði:

3. Dr. Sigurður Árni Þórðarson prestur í Neskirkju:

Svo kemur þessi undursamlega lýsing á drullumallaranum Jesú, sem bleytir leir með munnvatni, klínir í hamin augu mannsins. Einhverjir hafa glennt upp skjáina yfir þessum gerningi og barnið í okkur minnist skemmtilegra stunda bernskunnar við hliðstætt drullumall. Maðurinn er svo sendur til að þvo sér og þetta er allt eins og í góðu handriti. Síðan er unnið úr orðum og gjörningi. #

2. Bjarni Karlsson sóknarprestur í Laugarneskirkju:

Ég spurði áðan hvort þú vissir um einhvern sem finnst þú vera frábær. Guði finnst þú frábær segir vatnið. #

1. Dr. Sigurður Árni Þórðarson prestur í Neskirkju:

Dómsdagur er þegar menn viðurkenna að Jesús sé lífgjafari þeirra, þegar menn taka skrefið frá dauðanum til lífsins. Dómsdagur er þá ekki aðeins eitthvað sem varðar atburð í framtíð, heldur núna, á þessum degi. Dómsdagur í Jesúsamhengi merkir, að í tengslum við hann verður öllum okkar krísum snúið til góðs, ef við viljum horfast í augu við vanda okkar og að Guð kallar okkur til góðra viðbragða. Allt sem áður þrúgaði og íþyngdi er leitt til betri vegar. Það sem við gerðum og sáum eftir er fyrirgefið. Það sem við botnuðum ekki í og var okkur til ills er endurunnið til góðs. Krísan í Kristssamhengi merkir þá, að það sem var vont verði snúið til góðs. Að vera í krísu hjá Kristi er að mega fara “yfir um” - til lífsins! Við þurfum að læra að lifa í þeim anda, að framtíðin hefur brotist inn í nútíðina, á hverju augnabliki er Guð kominn. Við lifum í skurðpunkti tíma og eilífðar. #

Aukaverðlaun fyrir skilning á mikilvægi kristni og kirkju:

3. Örn Bárður Jónsson sóknarprestur í Neskirkju:

Heimurinn er endurleystur fyrir verk Jesú Krists, allur heimurinn. Og af þeim sökum liggur mér við að fullyrða að allur heimurinn sé „kristinn“. #

2. Ólafur Jóhann Borgþórsson prestur í Seljakirkju:

Með því að ryðja kristinni trú úr litlum jólum grunnskólana er sannarlega verið að höggva skarð í menningarsögu þjóðarinnar. #

1. Herra Karl Sigurbjörnsson biskup:

Textar og frásagnir Biblíunnar eru grunntextar okkar menningar og siðar á Íslandi. #

Mannréttindaverðlaunin:

3. Herra Karl Sigurbjörnsson biskup um hjónabönd samkynhneigðra:

Ómaklega vegið að kirkjunni. #

2. Herra Karl Sigurbjörnsson biskup um andstöðu við trúboð í skólum:

Viðleitni kirkjunnar til að sinna börnum og veita þeim sálgæslu, er t.d. fordæmd sem mesta óhæfa. Ótæpilega er alið á hleypidómum gegn trú og kirkju. Í nafni skynsemi, mannréttinda, vísinda og annarra helgra og góðra og mikilvægra verðmæta er kirkjan uppmáluð og úthrópuð fyrir að vera dragbítur á framfarir og mannréttindi. Æ, já. [Í predikun 1. apr. 2007 í Neskirkju]

1. Herra Sigurbjörn Einarsson biskup um þá undarlegu afstöðu menntamálaráðherra að taka mið af úrskurði Mannréttindadómstóls Evrópu í frumvarpi til grunnskólalaga:

Auðvitað er evrópsk móðursýki líka til og hefur aldrei verið keppikefli Íslendinga né æskilegt hlutverk okkar að skríða eftir allri evrópskri sérvisku. [Fréttablaðið 24.12.2007 bls. 26]

Ritstjórn 31.01.2008
Flokkað undir: ( Ágústínusarverðlaunin )

Viðbrögð


Stefán - 31/01/08 11:05 #

[Athugasemdir Stefáns færðar á spjallið - Matti Á.]


Reynir (meðlimur í Vantrú) - 31/01/08 15:46 #

Mér fannst reyndar gott hjá Karli biskupi að viðurkenna að trúin er ákveðinn sjúkdómur, þótt ég sé ekki sammála honum um batahorfur.

Manneskjan er haldin ólæknandi trúhneigð. #


Sigurður Karl Lúðvíksson - 31/01/08 19:20 #

Ég birti hér í algjöru óleyfi blogg eftir séra Svavar Alfreð Jónsson á Akureyri.

"Blessaðir óvinirnir Nú á dögum eiga öll dýrin í skóginum að vera vinir. Nútíminn er óvinveittur hvers konar óvináttu.

Það veit ekki á gott.

Miklu betra er að eiga ærlega óvini en vini fulla af smjaðri og fagurgala.

Er ekki pólitíkin á Íslandi ein sönnun þess?

Hægara er að verjast hnífslagi í brjóstið en rýtingsstungu í bakið.

"Við" skilgreinum okkur út frá "þeim". Hluti þeirrar myndar sem ég geri mér af sjálfum mér er sú mynd sem ég hef af óvinum mínum. Því sem ég er ekki og vil ekki vera. Óvinirnir skerpa sjálfsmynd mína.

Sá sem ekki þekkir óvini sína þekkir ekki sjálfan sig. Firring nútímamannsins stafar meðal annars af því að honum er helst ekki leyft að eiga óvini.

Nútíminn vill bæla niður agressjónir. Það er óheilbrigt og leiðir til yfirborðsmennsku og geðrænna truflana.

Getur nokkur átt vini nema hann kunni líka að eiga óvini?

Óvinir eru dýrmætir - enda eigum við að elska þá.

Hvað værum við KA-menn án Þórsaranna"

Þetta finnst mér texti sem á að fá verðlaun.


Hjalti Rúnar Ómarsson (meðlimur í Vantrú) - 31/01/08 19:43 #

Sigurður, þú gast að minnsta kosti vísað á bloggfærsluna hans ;)


Sigurður Karl Lúðvíksson - 31/01/08 22:46 #

Nei ég ætlaði að leyfa þér að gera það.


Haukur Ísleifsson - 01/02/08 15:07 #

Mér finnst þetta vera mjög góður texti. Skrítið að þetta komi frá Guðs-manni


Lárus Viðar (meðlimur í Vantrú) - 01/02/08 19:06 #

Firring nútímamannsins stafar meðal annars af því að honum er helst ekki leyft að eiga óvini.

Já, ég vil eignast einhvern óvin. Gengur ekki að vera svona firrtur og óvinalaus alltaf.

Ætli SAJ elski Vantrú?


baddi - 01/02/08 22:58 #

við þórsarar étum KA-menn í morgunmat, svo það sé nú alveg á hreinu...


Reynir (meðlimur í Vantrú) - 02/02/08 12:00 #

Svavar er dáður hér á Vantrú, hann á ófá gullkornin. Þessi orð hans hljóta að koma til álita við verðlaunaafhendinguna að ári:

Miklu betra er að eiga ærlega óvini en vini fulla af smjaðri og fagurgala.

Það eru stórtíðindi að guðsmanninum detti KA fyrst í hug en ekki sá í neðra. Mikið er fall hans og hlutverk hans orðið lítið.

En við í Vantrú hljótum þó að standa hjarta Svavars nærri í ljósi eftirfarandi ritningargreina:

Minnst þess, Drottinn, að óvinurinn lastmælir, og heimskur lýður smánar nafn þitt. Sálm. 74:18

Þú djöfuls sonur, fullur allra véla og flærðar, óvinur alls réttlætis, ætlar þú aldrei að hætta að rangsnúa réttum vegum Drottins? Postulasaga 13:10

Lokað hefur verið fyrir athugasemdir við þessa færslu. Við bendum á spjallið ef þið viljið halda umræðum áfram.